Ničo wjac noweho w zhromadnym projekće mjez serbskimi a mecklenburgsko-předpomorskimi komponistami? Wězo, tola. Přetož prěnje tři serije koncertow, spěchowane wot Němskeho zwjazka komponistow, Kulturneje załožby Swobodneho stata Sakskeje, Załožby za serbski lud a druhich, njeběchu jenož wuspěšne, ale wopokazachu so tohorunja jako dołhodobnje skutkowace. Loni nazymu zahaji so štwórta serija w Rostocku a Greifswaldźe. Minjenu sobotu slědowaše prěni łužiski koncert na Wojerowskim hrodźe. Tamniši agilny kulturnik Martin Schmidt běše wšón rozbudźeny, kelko je mjez serbskimi hudźbnikami potenciala, kotřiž na wysokim niwowje wšelake směry artificielneje hudźby zastupuja.