22. słowjanska nóc w pólskim klubje ze sylnym serbskim podźělom
Lipsk (gk/SN). Wot swojeho slawofilneho boka je so minjeny pjatk zaso raz Lipsk pokazał – z hudźbu, ze spěwom, reju a lóštnym hejsowanjom na 22. słowjanskej nocy w tamnišim klubje 4 rooms. Organizowane wot Pólskeho kluba je so před šěsć lětami załožene zarjadowanje mjeztym dawno etablěrowało jako centralne zetkawanišćo mnohostronskich słowjanskich kulturow w Lipsku. K tomu słuša wězo tež serbska kultura. Znata folkrock-skupina Kupazukow pod nawodom Lipšćanskeje wuměłče Marion Kwicojc předstaji připosłucharjam zaso spodobne serbske a swójske pěsnje, doniž njeje Lipšćansko-pólska punkrock-band Torpedo Dnipropetrowsk wječor hłósnje zakónčiła.
