Hłowna tema na posedźenju konwenta kulturneho ruma Hornja Łužica-Delnja Šleska wčera w Zhorjelskim krajnoradnym zarjedźe bě, zo měli so dotalne směrnicy spěchowanja změnić.
Zhorjelc (SN/CoR). Hižo dlěši čas dźěła kulturny rum na směrnicach spěchowanja, wosebje tež tohodla, zo bychu kriterjie za připrajenje a wotpokazanja projektow transparentniše byli. Wšako pjenjezy hižo dawno za wšitke projektowe próstwy njedosahaja. Nimo 44 stron lěta 2011 wobzamknjenych kulturnopolitiskich zasadow, kotrež intencije za kulturne wuwiće regiona wopisuja a ramik za rozsudy konwenta tworja, eksistuja hišće spěchowanske ćežišća a spěchowanske směrnicy. Dokelž pak to z wida konwenta tež hišće njedosaha, běchu 26. měrca zwoprawdźenski koncept kulturnopolitiskich směrnicow wobzamkli.