„Wopominanje Jana Husa a jubilej reformacije 2017 – što so tu swjeći?“ rěkaše tema, na kotruž přednošowaše Margot Käßmann wčera w Ochranowje. Něhdźe 600 připosłucharjow pjelnješe cyrkwinsku žurlu tamnišeje wosady hač na poslednje městno.
Ochranow (LM/SN). Přednošk bě jedne ze zarjadowanjow bratrowskeje jednoty, z kotrymiž w Čěskej, Němskej a Šwicarskej čěskeho reformatora Jana Husa wopominaja. Wón bu před 600 lětami, 6. julija 1415, wot Koncila w Konstanzu kecarskich nahladow dla k smjerći zasudźeny a tam spaleny. Jeho mysle pak wostachu žiwe a wobwliwowachu čěskich bratrow. Jich potomnicy zasydlichu so spočatk 18. lětstotka w Ochranowje.
