Chóraj do nalěća koncertowałoj

štwórtk, 30. apryla 2015
artikl hódnoćić
(0 )

Choćebuz (DSŠ/SN). Koncert cyle wosebiteho razu wotmě so wčera wječor w Choćebuskim wuměłstwowym muzeju Dieselowa milinarnja. Chór Łužyca z Choćebuza a chór Budyšin wuhotowaštej tam prěni króć zhromadny program, kotryž steješe pod hesłom „300 lět chórowa hudźba – Serbske ludowe a wuměłske spěwy“. Zarjadowar koncerta bě towarstwo Choćebuska hudźbna nazyma ze swojim nawodu Berndom Weinreichom.

Hosćićeljo pod nawodom Lubiny Žuroweje wotewrěchu prěni dźěl programa z čile přednjesenymi ludowymi pěsnjemi ze wšeje Łužicy. K rjanemu nalětnjemu wjedru derje so hodźaca bě stajnje zaso jewjaca so tema „lubosć“ we wšěch móžnych wariantach. Při tym přewodźachu spěwarjow někotři hudźbnicy. Publikumej předstajichu dosć rědke instrumenty kaž słowaksku fujaru a dudawku.

Hosćo z Budyšina prezentowachu klasisku chórowu tradiciju, zanošujo wobdźěłane ludowe a wuměłske spěwy. Wosebje hnuli su připosłucharjow ćežkomyslne pěsnje, štož so w přiklesku stajnje zaso wotbłyšćowaše.

wozjewjene w: Kultura
Prošu přizjewće so, chceće-li komentar podać

Serbska debata

nowostki LND