Lipsk (SN). Iris Hanika, Heike Behrend a Timea Tankó su minjeny pjatk Myto Lipšćanskich knižnych wikow 2021 we wobłuku zarjadowanja „Lipsk čita ekstra“ dóstali. Sydomčłonska jury z předsydu Jensom Biskyjom wuznamjeni Iris Haniku w kategoriji beletristiki za twórbu „Echos Kammern“ a Heiku Behrend w kategoriji wěcna kniha/esejistika za knihu „Menschwerdung eines Affen. Eine Autobiografie der ethnografischen Forschung“. W kategoriji přełožk hódnoćichu Timeju Tankó za přełožk madźarskeho romana „Apropos Casanova – Das Brevier des Heiligen Orpheus“. Dohromady 389 twórbow bu za lětuše Myto Lipšćanskich knižnych wikow zapodatych.
Wčera zakónči so wosebite wudaće Europskeho najwjetšeho čitanskeho swjedźenja „Lipsk čita“. Wjace hač 400 zarjadowanjow na něhdźe 80 městnach w měsće wotmě so we wobłuku štyrjoch dnjow, kotrež móžachu zajimcy zwjetša online sćěhować. Něhdźe 100 zarjadowanjow je publikum direktnje na městnje čitanja awtorkow a awtorow dožiwił. Přichodne Lipšćanske knižne wiki maja so klětu wot 17. do 20. měrca wotměć.
Budyšin (CRM/SN). Lětuše pišćelowe lěćo je z 15 koncertami kóždu srjedu wječor napoł wosmich w ewangelskim dźělu cyrkwje swj. Pětra hač do kónca awgusta planowane. Wobdźěleni su nimo wuznamnych pišćelerjow z cyłeje Němskeje tež hudźbnicy z Italskeje, Jendźelskeje, Danskeje a Japanskeje.
Minjenu srjedu zahaji so pišćelowy swjatk z kantorom ewangelskeje wosady Michaelom Vetterom a katolskeje wosady Friedemannom Böhme, kotrajž hraještaj na wobojich hłownych pišćelach.
Hižo při durjach witaše iniciator Michael Vetter swój stajny publikum. Tachantski farar Wito Sćapan je připosłucharstwo, kotrež wobsadźi wězo z poručenym wěstotnym wotstawkom městna wotprědka hač dozady, němsce kaž tež serbsce postrowił. Wón skedźbni na to, zo ma Budyšin z mjenowanymaj interpretomaj wirtuozneju organistow. Nimo toho staj runje wonaj z dalewjedźenjom koncertowanja na wotpowědnje disponowanymaj instrumentomaj žadnostku simultaneho Božeho domu jara wuspěšnje přez wjele lět dale hajiłoj.
Budyšin (SN/CoR). Hornjoserbska rěčna komisija (HRK) je hornjoserbske Braillowe pismo na swojej internetnej stronje k downloadej wozjewiła. Pismo bazuje na prěnjotnym naćisku studenta linguistiki Harrisa Mowbrayja z Kaliforniskeje (SN rozprawjachu) a je po wuměnje myslow ze sobudźěłaćerjemi Serbskeho instituta a po diskusiji ze serbskorěčnymi wužiwarjemi Brailloweho pisma, wosebje z Robertom Lombinom, złaha modifikowane. W běhu tohole procesa su tež nětko wuformulowane prawidła nastali.
„Hornjoserbska rěčna komisija wita wuwiće serbskeho Brailloweho pisma a doporuča, jeho wužiwanje w praksy wupruwować“, rěka we wozjewjenju. Zdobom HRK na to skedźbnja, zo njewidźi so „za postajenje a wobzamknjenje woprawnjena. To čini so za druhe rěče wot wotpowědnych zwjazkow slepych/njewidźacych resp. specielnych komisijow za Braillowe pismo.“
Hač jeho namjet tež za delnjoserbske Braillowe pismo akceptuja, njeje hišće jasne, kaž Harris Mowbray zdźěli. Mjeztym je wón hornjo-a delnjoserbski alfabet za gestikulacisku rěč namjetował.
Aktualne čisło Rozhlada steji w znamjenju róčnicow. Tak wěnuje so Christina Boguszowa žiwjenju a skutkowanju Boženy Nawka-Kunysz, kotraž by w juniju 75. narodniny woswjećiła. Wuměłča horješe so čas žiwjenja za wuměłstwo, studowaše w Pólskej a skutkowaše najwjetši dźěl žiwjenja w Katowicach. Dósta přistup k tamnišej awantgardistiskej scenje a zaběraše so z naraciju přez metafry, kotraž zaběra w pólskim wuměłstwje wusahowace městno. Tak přinjese Nawka-Kunysz tež nowy raz a hinaši rukopis do serbskeho wuměłstwa.