Lětsa žane mócne haleluja křižerjow?

srjeda, 25. měrca 2020 spisane wot:

Sakska krajna direkcija jutrowne jěchanje zakazała

Drježdźany/Budyšin (SN/JaW). Křižerjo njesmědźa lětsa jěchać. Tak je Sakska krajna direkcija w Drježdźanach rozsudźiła a křižerske procesiony zakazała. To wozjewi wčera Budyski krajnoradny zarjad w swojej wšědnej rozprawje wo aktualnym stawje nastupajo coronapandemiju.

We wozjewjenju wobkruća krajna direkcija rozsud z tuchwilu płaćiwymi postajenjemi přećiwo rozpřestrěću corony. „Hač do 5. apryla płaći powšitkowne postajenje socialneho ministerstwa, kotrež rjaduje krute wobmjezowanje swobodneho pohibowanja. Nimo toho je powšitkowny wukaz z 19. měrca k zakazej wšitkich zjawnych a njezjawnych zarjadowanjow kaž tež zhromadźenja ludźi hišće hač do 20. apryla płaćiwy. Tež při nałožowanju tohole postajenja njeje móžno jutrowne jěchanje zarjadować“, w spisu rěka.

Serbske mjena sydlišćow online

srjeda, 25. měrca 2020 spisane wot:
Choćebuz (SN). Kak rěka mjeno městnosće delnjoserbsce? Móže delnjoserbske mjeno sydlišća wšelakim němskim wotpowědować? Kotre delnjoserbske sydlišćowe mjena dźensa eksistuja? Na tele prašenja wotmołwja nowa internetna strona Serbskeho instituta. Sobudźěłaćerjo slědźenišća su z mnohich žórłow mjena delnjoserbskich sydlišćow zběrali, strukturowali a systematizowali. Wuslědk je nowa internetna informaciska słužba k serbskim mjenam – najprjedy raz k mjenam sydlišćow. Na informaciskim portalu www.niedersorbisch.de/www.dolnoserbski.de wu­tworichu nowu stronu „Dolnoserbske městne mjenja“ jako dźewjatu rubriku, w kotrejž móžeš za informacijemi pytać. „Tematika serbskich mjenow so w našich slědźenjach přeco zaso jewi a wulki zajim wuwabja. Tuž smy rozsudźili, nowy informaciski serwis online stajić“, rozłožuje rěčespytnik a direktor Serbskeho instituta dr. Hauke Bartels. ­Dotal je portal na serbski sydlenski rum w Braniborskej wobmjezowany. Přichodnje ma so wo mjena po cyłej Braniborskej rozšěrić. Tež serbske před- a swójbne mjena chcedźa přiwzać.

Kompromis móžny?

srjeda, 25. měrca 2020 spisane wot:
Nětko je jasne: Křižerske procesiony su zakazane. Strach infekcije z coronawirusom je přewulki. Mnozy su z tym ličili, a wjacori maja rozsud za prawy. Dalši maja tworjeny fakt za njepředstajomny. Sam sedźu mjez stólcomaj. Na jednym boku je mi wozjewjenje jutrowneje powěsće jako křižer nade wšo wažne a zdobom wuznaće kruteje wěry. Na tamnej stronje mam wobmjezowanje wirusa dla za runje tak rozumne. Strowota a žiwjenje stej našej najdrohotnišej kuble. Argumenty kaž te, zo su křižerjo stajnje jěchali, tež za čas wójny, su wšitkim znate. Tehdy su so sami do stracha podali, dźensa bychu tež swojich sobučłowjekow wohrozyli. To měli wobmyslić. Přiwšěm postupowanje zarjadow kritizuju. Njejsu ani z potrjechenymi rěčeli, što dźe a što nic, ale su jednorje rozsudźili. Hač je kompromis hišće móžny, njewěm. Nadźiju pak přeco hišće cyle spušćił njejsym. A mnozy dalši křižerjo zawěsće tež nic. Janek Wowčer

Zajim na spěchowanju přiběra

wutora, 24. měrca 2020 spisane wot:

Drježdźany (SN/bn). Sakske statne ministerstwo za regionalne wuwiće zdźěla, zo je ličba zajimcow za druhe koło idejoweho wubědźowanja Sakski fonds „Čiń sobu!“ porno lońšemu wurisanju wo ně­hdźe třećinu přiběrała. Cyłkownje je hač do poslednjeho termina 15. měrca 1 974 namjetow za strukturnu změnu aktiwnje formowace projekty dóšło. Wjacore juryje, zestajane z wobydlerjow, zastupjerjow wokrjesow, komunow, wysokich šulow, šulow, kultury, hospodarstwa, dźěłarnistwow a knježerstwa, chcedźa je přichodnje pruwować a mytowanych wuzwolić. Hač jich tež lětsa zjawnje wuznamjenja, tuchwilu hišće jasne njeje. Nimo toho móže zaso publikum swojeho faworita pomjenować.

Hódać „to go“, wjeselo měć a při tym něšto nowe wuknyć – wabjenje to, kotrež tež Michała Cyža přeswědča. Kahoot! je platforma, na kotrejž móža zajimcy ­sami kwisy zestajeć a je dale dawać.

Budyšin (jak/SN). „Rano w štyrjoch mějach ideju, w běhu dweju hodźin swójski kwis zestajeć a jón online stajić“, powěda nawoda Budyskeho studija Sakskeho wukubłanskeho a wupruwowanskeho kanala Michał Cyž. Wažne jemu při wuzwolenju platformy Kahoot! předewšěm bě, zo móža wužiwarjo w app a na webstronje serbsce čitać. Temy kwisa su katolska nabožina, jeje nałožki a pozadki. Te wón na zajimawe a žortne wašnje prezentuje. Jeho zaměr je zaběra z nabožinu. Hrajer ma na přikład na prašeni wotmołwić, kelko serbskich katolskich wosadow je, abo kotru wulkosć čriji Jězus ma.

Internet, internet ...

wutora, 24. měrca 2020 spisane wot:
Chwalu sej ideju nawody Budyskeho studija Sakskeho wukubłanskeho a wupruwowanskeho kanala Michała Cyža, zo dźěćom na internetnej platformje Kahoot! zmóžnja serbsce čitać. Tele dny je tajka zaběra ćim wažniša a słuša k tomu, zo so šulerjo ze serbskej rěču rozestajeja. Nadźijam so, zo móža mnozy poskitk wužiwa, trjebaja dźě internet za to. Wšitcy pak hišće njewobmjezowany přistup k derje wutwarjenej syći nimaja a dyrbja tuž wotwažować, za čo chcedźa swoje megabity wužiwać. Prěnjorjadnje su to nětko domjace nadawki, kotrež šulerjo internetnje dóstawaja. Dźeń a wjac staršich tež w home officu dźěła. Dale myslu na Bože mšě, kotrež njedźelu tohorunja w interneće sćěhujemy. A je-li potom hišće něšto megabitow zbywa, móža je dźěći za hry dóstać. Tuchwilu najbóle pytnjemy, na čim w Němskej klaca, a to je njewobmjezowany přistup. Za mnohich tuž rěka z megabitami lutować. Bianka Šeferowa

Nadarjeny basnik, spisowaćel a redaktor

wutora, 24. měrca 2020 spisane wot:

Dźensa by Gerat Libš 85ćiny swjećił. Rodźeny we Wěteńcy do swójby mulerja a domjaceje studowaše wón po maturje slawistiku w Lipsku. Tehdy a dalše lěta bě aktiwny kopar w Njebjelčicach a tak znaty a woblubowany pola młodźiny wokolnych wsow. Po studiju dźěłaše w lektoraće za wučbnicy w Budyšinje, wot lěta 1959 do 1981 bě redaktor dźěćaceho časopisa „Płomjo“. Po tym skutkowaše znowa někotre lěta jako lektor a jako redaktor ­Noweje doby. 1. awgusta 2012 wón doma w Pančicach-Kukowje zemrě.

Basniske spočatki Libša sahaja do jeho studentskich lět. Pozdźišo wozjewješe prawidłownje, zwjetša pod pseudonymom „Lindaš“. Za swoje młode čitarstwo pisaše basnje wo přirodźe a zwěrjatach. Prěnja zběrka „Z połnej karu“ wuńdźe 1970, tři lěta po njej powědka w hrónčkach „Čepjela a Prynka“. We wjazanej rěči předstaji dźěćom mjez druhim „Kózlika Pryzlika“ a „Jěžika-Wšitkowědźika“. Dalšej zběrce wuńdźeštej 1981 a 1989: „Swinjemišter Dunč“ a „To swět koči čini woči“.

Wostudu njepasć

póndźela, 23. měrca 2020 spisane wot:

Budyšin (SN). Tež lětsa so najebać coronawirus wubědźowanje wo najrjeńše serbske jutrowne jejko za dźěći a młodostnych do 24 lět dale přewjeduje. To zdźěli Weronika Suchowa, zamołwita za projekty Spěchowanskeho kruha za serbsku ludowu kulturu. Na zwučene wašnje maja kolekcije hač do srjedy po jutrach zapodate być, potajkim 15. apryla. Tónraz je jenički puć wotedaća póstowy. Zarjad Domowiny w nadawku jeje čłonskeho towarstwa přiwzaće kolekcijow přewozmje, pod tutej adresu: Domowina – Zwjazk Łužiskich Serbow z.t., hesło: jutrowne jejka, PF 16 28, 02606 Budyšin / Bautzen. Štóž so wobdźěli, njech njezabudźe podać mjeno, adresu, starobu zapósłarja a techniku. Wotedać maja wobdźělnicy kolekcije z dwěmaj wudutymaj kokošacymaj jejkomaj (swójske kreacije, swójbne a regionalne tradicije). Preměrowane budu tradicionalne serbske techniki wóskowanje, bosěrowanje, škrabanje.

Serbja w nowej ludowej komorje

pjatk, 20. měrca 2020 spisane wot:

20. měrca 1990 wozjewi kaž wšitke dźeniki NDR tež Nowa doba nachwilny wuslědk wólbow Ludoweje komory NDR. Dwaj dnjej do toho, 18. měrca, móžeše 12 426 443 staćanow prěni króć po towaršnostnym přewróće w NDR swobodnje wolić. Z nich je 11 604 418 ludźi swój hłós wotedało. To wučinješe 93,22 procentow, a swědčeše wo njewšědnje wulkim wobdźělenju. 11 541 155 płaćiwych hłosow wólbni pomocnicy wuličichu.

„Krabat steji za tolerancu“

štwórtk, 19. měrca 2020 spisane wot:

Kulowski slědźer podpěruje wosebitu wustajeńcu w Zagrebje

K čitanju přeprosyć a diskusiju nastorčić – to je wotmysł přehlad­ki. W Etnografiskim muzeju Zagreb wěnuje so hač do 10. apryla přistupna wosebita wustajeńca temje „Chorwaća – Čłowjekojo za mytosom – Janko Šajatović a chorwatske woso­binske gardy Europy“. Zakładny wobstatk tekstow, fotow­, kartow a dokumentow podał bě Hans-Jürgen Schröter, Kulowski slědźer swójbnych a dźědźičnych stawiznow. Andreas Kirschke je so z genealogom, kiž mjeztym dźesać lět po cyłej Europje slědy Janka Šajatovića intensiwnje přepytuje, wo motiwaciji a wobsahu wustajeńcy rozmołwjał.

Knježe Schrötero, što je wotmysł wosebiteje wustajeńcy w Zagrebje?

Serbska debata

nowostki LND