Budyšin (SN/CoR). Tež lětsa namołwja Spěchowanski kruh za serbsku ludowu kulturu znowa wšitkich dorosćenych lajskich wuměłcow z cyłeje Łužicy so na wubědźowanju wo najrjeńše serbske jutrowne jejko wobdźělić, kotrež so 67. raz wotměwa. Wotedać móža zajimcy kolekcije hač do pjatka po popjelnej srjedźe, 28. februara, w Budyskim Serbskim domje abo w regionalnych běrowach Domowiny a Załožby za serbski lud. Dobyćerjow wubědźowanja za dorosćenych chcedźa na swjedźenskim zahajenju 29. serbskich jutrownych wikow 7. měrca w Serbskim domje w Budyšinje wozjewić a mytować. Wubědźowanje za dźěći a młodostnych so přizamknje. Termin za wotedaće je tu 15. apryl.
Nimo hižo nazhonitych lajskich wuměłcow chcedźa wosebje tež wšitkich tych narěčeć, kotřiž hižo dołho doma do jutrow jejka wóskuja, ale kotřiž so hišće njejsu přewinyli, swoje najrjeńše debjene jejka wotedać.
Choćebuz (HA/SN). Na dokładnje tym dnju, na kotrymž bě so znaty delnjoserbski moler a grafikar Fryco Latk narodźił, su dostojnje na njeho spominali a jeho počesćili. Minjeny pjatk wotewrichu składnostnje 125. narodnin wuměłca wosebitu personalnu wustajeńcu „Fryco Latk – Domownja“ w nowej „Galeriji Braniborska“ w bywšim „Großenhainskim dwórnišću“ w Choćebuzu. Partnerski wuhotowar přehladki je Serbski muzej w Choćebuzu, kiž je za nju cyłkownje 16 twórbow ze swójskeho wobstatka kaž tež z priwatneho wobsydstwa k dispoziciji stajił. Wjetšina wobrazow je runje tak kaž 25 dalšich požčonkow prěni raz docyła zjawnje wustajenych. Mnoho eksponatow pokazuje krajiny kołowokoło Picnja a Noweje Jsy, zwotkelž Fryco Latk pochadźa.
11. februara 1945 skónči so w Jalće na połkupje Krim wuznamna konferenca třoch wulkomocow wo powójnskim porjedźe w Europje a na swěće, kotraž bě so 4. februara zahajiła. Knježerstwowe delegacije hosćićelskeho Sowjetskeho zwjazka (ZSSR), USA a Wulkeje Britaniskeje pod nawodom předsydy knježerstwa ZSSR Józefa W. Stalina, prezidenta USA Franklina D. Roosevelta a jendźelskeho premiera Winstona Churchilla wuradźowachu w Liwadijowym palasće, bywšej lětnjej rezidency ruskich carow. Do stawiznow zapisana je konferenca jako wjeršk „wulkich třoch“.
Budyšin (SN). „Land.Leben – Na jsy“ rěka titul w Ludowym nakładnistwje Domowina wušłeho wobrazoweho zwjazka, kotryž wěnuje wudawaćel Jürgen Maćij Thomasej Kläberej. Maćij tak swój wuspěšny rjad wo łužiskich fotografach dale wjedźe. Z nowej zběrku dokumentuje wón dźěło Kläbera wot lěta 1968 do 2018.
Wosebitosć wobrazow w Gołkojcach bydlaceho fotografa je jich zhusćenje. Hižo před połsta lětami nastachu prěnje motiwy wo žiwjenju „na jsy“, kotrež je so za Kläbera k najwažnišej temje wuwiło. Srjedź 1980tych lět wěnowaše so wón přiběrajcy wsam wokoło Choćebuza.
Haslow (SN/MWj). Z trójnej „Sławu“ dźakowaše so publikum sobotu w Haslowje za njewšědnje wurjadny koncert chóra Lipy. Pod hesłom „“ dožiwi 220 wopytowarjow přewšo wotměnjaty a zabawny hudźbny wječor, na kotrymž chór pod nawodom dirigentki Jadwigi Kaulfürstoweje jeno swoje spěwne kmanosće njepředstaji, ale tež swoje žortne stronki pokaza. Wo dwurěčnu moderaciju postara so šarmantnje a čerstwje Julija Jankowscyna.
Hižo spočatk koncerta bě hinak hač zwučeny, jako Lipjenjo hwizdajo na jewišćo přińdźechu a na to ze šlagrowym hitom „Nětk zaklinči zas“ přitomnym připowědźichu, zo jich tón wječor hłownje popularne a zwjetša z radija znate melodije wočakuja. To běštej mjez druhim „Quo vadis Łužica“ a „Maći luba“. Jako premjera zaklinča šlager „Raj mój ródny raj“. Při spěwje „Nastajnosći mysl ćěka“ wusahowaše Michaela Melcerowa jako solistka.