Serbske Nowiny

Serbske Nowiny

srjeda, 06 meje 2015 14:00

Policija (06.05.15)

Jězbny započatkar wopity był

Budyšin. Po wšěm zdaću z wulkej spěšnosću bě dźens w nocy jězbny započatkar w Budyšinje po puću. W dołhej lěwej křiwicy na Zeppelinowej zhubi wón ně­hdźe w 3 hodź. kontrolu nad swojim Opelom a zajědźe na prawy bok dróhi. Tam přełama najprjedy płót a so na to na dworje priwatneje firmy wjacekróć přećisny. Mjez někotrymi štomikami před železniskim mostom wosta dospołnje skóncowane jězdźidło na boku ležo. Ćežko zranjeneho 19lětneho šofera dyrbješe wohnjowa wobora z awta wuća­hnyć. Hladajo na to, kak demolěrowane wone bě, měješe młody muž zbožo, zo bě sam w nim. Dowjezechu jeho k lěkarskemu zastaranju do chorownje. Při kontroli běchu policisća zwěsćili, zo měješe muž 1,4 promile alkohola w kreji.

srjeda, 06 meje 2015 14:00

Pokiwy (06.05.15)

Akademija wěnuje so pčołkam

Wojerecy. Cyle w znamjenju pčołkow steji přichodne zarjadowanje akademije seniorow Miłočanskeho Křesćansko-socialneho kubłanskeho skutka jutře, štwórtk, w 10 hodź. dźěćacej a młodźinskej farmje we Wojerecach. Karl Koar porě­či wo tym, čehodla su pčołki za přirodu nimoměry wažne a kak móžemy jim dobre žiwjenske wuměnjenja skićić.

Spominaja na znowazałoženje

Chrósćicy. Składnostnje 70. róčnicy znowazałoženja Domowiny wotměje so pjatk, 8. meje, w 19.45 hodź. (po kemšach) wopomnjenske zarjadowanje před statokom Bosćija Wjesele w Chrósćicach. Tam porěči předsyda Domowiny Dawid Statni­k. Chróšćanske dźěći zarjadowanje kulturnje wobrubja.

Přednošuje wo jězbje

Haslow. Wo swojej kolesowanskej jězbje po Europje přednošuje Julian Nyča zajutřišim, pjatk, w 19.30 hodź. pola Bizoldec w Haslowje. Domowinska skupina Baćoń/Haslow wšitkich čłonow kaž tež dalšich zajimcow wutrobnje přeproša.

Wobornicy so dźakuja

srjeda, 06 meje 2015 14:00

Pisane rybički za domjacy haćik

Tak mjenowane koi-wiki prěnju sobotu w meji kóžde lěto tójšto lubowarjow pisanych rybičkow do Hóznje (Petershain) pola Niskeje přiwabjeja. Tež minjeny kónc tydźen­ja sej tam mnozy rybički w najwšelakorišich barbach za swójski haćik kupichu­ a dachu so wo jich plahowanju poradźować. Hatarstwo Armina Kittnera poskićeše nimo toho prawu picu za nic runje tunje zwěrjata. Foto: Jost Schmidtchen

Małowjelkowski prazwěrjenc dóstanje futuristisce wupadace zachodne twarjenje z třomi kuplemi. W nim budźetej nimo foyera a kasy tež kofejownja a multimedialny wobłuk zaměstnjenej. Za to bě dźensa dopołdnja symboliski prěni zaryw. Za lěto chcedźa 1,8 milionow eurow drohi twar přepodać. Loni je 230 000 ludźi prazwěrjenc wopytało. Foto: SN/Maćij Bulank

srjeda, 06 meje 2015 14:00

Koncept za čas po brunicy trěbny

K wólbam Hamorskeho wjesnjanosty 7. junija kandiduje Frank Knobloch z Delnjeho Wujězda jako njewotwisny kan­didat. „Ludźo w našich 18 wsach měli so ja­ko jednota zrozumić. Woni dyrbjeli syl­nišo we wutrobach a we hłowach hro­madu zrosć“, je kredo 48lětneho. Njecyłe lěto je wón čłon gmejnskeje rady a wjesny předstejićer za Tranje, Manjow, Rudej a Delni Wujězd. Powołansce skutkuje hižo 24 lět jako zawěsćenski makler.

Předewšěm na wutrobje leži Frankej Knoblochej hospo­darske spěchowanje. Jako wjesnja­nosta chcył Knobloch pomocne městno za hospodarstwo a turizm wutworić. Wone měło zaměstnjene předewzaća sylnić a nowe přiwabić. „Gmejna trjeba dołhodobny strategijowy koncept za čas po brunicy. Na to dyrbimy so přihotować.“ Dalše wažne temy jemu su, wutwarić Hamor jako šulske městno, spěchować dźewjeć wohnjowych woborow gmejny a hajić zhromadnosć z ra­tarjemi, hajnikami a hatarjemi, kotřiž hladaja lětstotki staru kulturnu krajinu.

srjeda, 06 meje 2015 14:00

Filmowy festiwal Nysa wotewrjeny

Žitawa (SN). Sakska ministerka za wuměłstwo dr. Eva-Maria Stange (SPD) je wčera 12. filmowy festiwal Nysa w Žitawje wotewrěła. Hač do 10. meje pokazuja tam na 16 městnach něhdźe sto filmow. Wobsahowe ćežišćo je migracija. Nimo Němskeje, Pólskeje a Čěskeje wobdźěla so tež Estiska jako hóstny kraj na festiwalu. Tři filmy dawaja dohlad do wšědneho dnja baltiskeho stata, do dóńta wuměłca runje tak kaž do korupcije a mocy. Festiwal dźěła hromadźe z čěskim Centrumom Panorama Varnsdorf, ze załožbu DEFA a z Berlinskim kinomuzejom.

„Filmowy festiwal Nysa wuznamjenja, zo so z respektom a tolerancu kulturam bliži a tak puć k dialogej twori. Zasłužeće sej připóznaće, kak je so wam poradźiło, tule w Němskej tři mjezy překročacy festiwal dale a sylnišo w třikrajowym róžku z Pólskej a Čěskej zwjazać“, chwaleše wčera Stange, patronatka filmoweho festiwala, wuhotowarjow swjatka.

srjeda, 06 meje 2015 14:00

Krótkopowěsće (06.05.15)

Nimale tysac přihladowarjow

Budyšin. Hru „Mój wuměrjeny kraj“ Jurja Kocha w režiji intendanta NSLDź Lutza Hillmanna je sej na šěsć předstajenjach 950 přihladowarjow wobhladało. Nazymu předstaji NSLDź kruch znowa němsce w Budyskim dźiwadle kaž tež w Złym Komorowje. W hrě, kotraž jedna wo wotbagrowanju statoka w serbskej ho­li, su prěni raz slepjanšćinu nałožowali.

Za stawk so wuprajili

Berlin. Po Zwjazku zastojnikow je nětko tež posłužbowe dźěłarnistwo ver.di wobzamknyło w pěstowarnjach stawkować. 92,44 procentow čłonow bě so při wothłosowanju za to wuprajiło, kaž dźensa w Berlinje zdźělichu. Wot pjatka chcedźa tuž w komunalnych pěstowarnjach dźěło złožić. Dźěłarnistwa žadaja sej za 240 000 kubłarjow wyšu mzdu.

Rekord: 38 milionow ćěkancow

srjeda, 06 meje 2015 14:00

Prěnja třećina nimo

Njedźelu, 17. meje, wuhraje swětowy lodohokejowy zwjazk w čěskej stolicy finale swětowych lodohojekowych mišterstwow 2015. Spočatk měsaca zahajene přewjeduja je tuchwi­lu w Praze a Ostravje. Prěnja třećina mišterstwow je tuž hižo nimo, dalšej slědu­jetej. Minjenu njedźelu bě sej tež ducent serbskich lodohokejowych entu­ziastow hrě skupiny A Kanada – Němska 10:0 a Francoska – Šwicarska 1:3 wobhla­dała. Prěni štyrjo w tabulkomaj kwalifikuja so za štwórćfinalne hry, kotrež budu potom wot štwórtka, 14. meje. Foto: Jörg Stephan

srjeda, 06 meje 2015 14:00

Projekt Serbska reja

Wo Lipšćanskim pospyće, nowe puće w folklorje kročić

Što čini poprawom serbska diaspora we wul­kich němskich městach? W Drježdźanach diskutuja wo serbskim přichodźe, kaž na lětušim prěnim sympoziju towarstwa Stup dale. A w Lipsku? Tam woni rejuja a hudźa. Wězo nječinja to wšitcy Serbja z Lipska, za to pak z Hornjeje a Delnjeje Łužicy zhromadnje a ze Slepjanskim spěwnikom.

Tak znajmjeńša to dožiwich, jako po­dach so 9. apryla do města nad Plesnu, zo bych so tam na serbskim rejwanskim wječorje wobdźěliła. Telko wědźach: Rejwanski mišter a bywši rejwar Serbskeho ludoweho ansambla Georgi Marinow z Drježdźan měješe „dźěłarničku“ nawjedować, a zahrać skupina Lipšćanskich hudźbnikow. Zo pak njeje dr. Theresa Jacob­sowa, kotraž bě mi informaciju posrěd­kowała, jako promowowana fachowča na polu serbskeje reje poprawna iniciatorka zarjadowanja, njebě jenička překwapjenka tohole wječora.

Ludowa reja – to tež móžemy!

wutora, 05 meje 2015 14:00

Krótkopowěsće (05.05.15)

Zawod Litarion předaty

Kamjenc. Industrijny koncern Evonik je swoju Kamjensku wotnožku Litarion kanadiskemu předewzaću Electrovaya pře­dał. Po informacijach zawodneje rady su wšitkich 154 sobudźěłaćerjow pře­wza­­li. Nowy mějićel chce w zawodźe Litarion zhotowjeny baterijowy system po wšěm swěće zwičnić, štož činješe dotal sobuwobsedźer Daimler. Tón pak bě so wróćo sćahnył.

Młode ryby wusadźili

Podstupim. Něhdźe 250 młodych jasotrow (Störe) je braniborski wobswětowy minister Jörg Vogelsänger (SPD) w Haboli wusadźił. „Je to wažny krok, drohotnu rybu zaso zadomić“, wón w Podstupimje rjekny. Jasotry pućuja nětko do Sewjerneho morja, zo bychu so za něhdźe 15 lět k njerkanju nawróćili.

Barbu přećiwo demonstrantam

Brno. Při pjatkownych prěnjomejskich demonstracijach radikalnych w Brnje je čěska policija prěni raz wosebite třělwo zasadźiła. Z pomocu z barbu pjelnjenych želejowych kulkow woznamjenichu mjez demonstrantami konkretne wosoby a je pozdźišo zajachu. Třělwo na podobnej bazy wužiwaja hewak za paintball.

Serbska debata

nowostki LND