Faworitaj so jasnje přesadźiłoj

póndźela, 05. decembera 2022 spisane wot:

Jendźelska steji po dobyću 3:0 přećiwo Senegalej w štwórćfinalu WM w Katarje. Jendźelčenjo přewzachu spočatnje hru, dachu bulej kružić a spytachu sćerpnje senegalski škit přewinyć. Pas do hłubiny dóńdźe k Jude Bellinghamej, kiž so nalěwo přesadźi a nisko na Jordana Hendersona prěki połoži. Liverpoolski profi dokónči akciju z dwanaće metrow bjez problemow (39.) a trjechi k 1:0. Hišće do połčasa Jendźelčenjo přez Harryja Kanea na 2:0 zwyšichu (45. + 3.). W druhej połojcy so potom Bukayo Saka ze swojimi třećimi wrotami na WM wo kónčny staw postara (57.). Za Jendźelsku dźe sobotu w 20 hodź. z duelom přećiwo Francoskej dale. Teamaj trjechištej při swětowych mišterstwach hakle dwójce jedyn na druheho, 1966 a 1982. Wobaj razaj přesadźi so Jendźelska. Francozojo wostajichu přećiwo zmužitym Polakam we wosmifinalu tójšto ležo, přesadźichu pak so na kóncu suwerenje z 3:1.

Tójšto sportowcow a sportowčow w starobje mjez wosom a 56 lětami bě so kónc nowembra we Wojerowskej Łužiskej kupjeli na čarach 50 metrow a 100 metrow wubědźowało. Tež płuwarki a płuwarjo Wuchodosakskeho płuwanskeho a sportoweho towarstwa OSSV (na wobrazu) běchu so wobdźělili. Tójšto holcow a hólcow polěpši swój wosobinski płuwanski čas. Zamołwići podźakuja so na tutym městnje wobdźělnikam, trenarjam a sudnikam. Foto: Jan Zarjeńk

Widźał,słyšał, napisał (05.12.22)

póndźela, 05. decembera 2022 spisane wot:

Awtor dźensa

Beno Šołta

Što je so w předpolu přez swětowe mišterstwa diskutowało, tež hišće jako su so zahajili? Mjeztym pak je měrnišo. Haj, nimo sportowych wuslědkow so wjele mjenje wo wobstejnosćach dokoławokoło rěči. A što budźe po turněrje? Najskerje zabyte, hdys a hdys budźe so jednotliwje hišće na zarjadowanje w Katarje zhladować. Wulku kritisku bilancu, kiž sprawnje wšitko wuhódnoći, pak najskerje ženje dožiwjeć njebudźemy. Při wšěm sym sej wěsty, zo maja mnozy dale brjušebolenje při tym. Ale tež to słyšiš: Njezaměń politiku ze sportom! Sprawnje prajene je sport dawno hižo politiski. Hižo na tym městnje, hdyž praji sej šef swětoweho koparskeho zwjazka FIFA Gianni Infantino, zo su to krasne hry, haj najrjeńše hry wšěch časow tu w Katarje. Jako njeby druhdźe krasnych koparskich duelow dawało. Abo dobrych městnow za turněry.

ST Radwor mytowane

póndźela, 05. decembera 2022 spisane wot:
Nico Buša (srjedźa, Radwor) dósta njedawno jako zastupjer ST Radworja sportowu plaketu zwjazkowneho prezidenta a k tomu hišće pjenježny darik. Za dołholětne skutkowanje a za wuwiće sporta dźakowaše so Radworčanam sakski minister nutřkowneho Armin Schuster (CDU). Nimo Schustera přepoda jimaj myto tež předsyda krajneho sportoweho zwjazka Ulrich Franzen. Foto: Julien Glücklich

Boji so DFB noweho spočatka

póndźela, 05. decembera 2022 spisane wot:

Costa Rica – Němska 2:4 (0:1)

Thomas Tuchel – Stefan Kuntz – Per Mertesacker, tak by na přikład nowe sportowe wjednistwo němskeje narodneje wubranki wupadać móhło. Struktury a wu­směrjenje DFB dyrbjeli so dospołnje předźěłać a zdźěla změnić. Tajkeho kaž Thomasa Tuchela, kiž ma charakter z róžkami a kantami, pak njebudźe sebi DFB tučasnje do swójskeho hnězda sadźić. Přewulki je strach, zo narěča so njedostatki pře jasnje, a zo sćěhuja z toho tež personelne změny. Podobna je situacija wokoło Stefana Kuntza. Tež wón je za swój čas jako trenar němskeje U21 husto na negatiwne wuwiće pokazał. Znajmjeńša Bierhoff pak by sam pytnyć dyrbjał, zo je jeho čas, w kotrymž swjećachmy 2014 w Brazilskej tež wulki triumf, jako teamowy manager nimo. Wo Hansiju Flicku so jara kontrowersnje diskutuje. Hłosy a měnjenja přiběraja, zo je wón Joachimej Löwej přepodobny, a zo njeje so z tym prawy nowozapočatk zešlachćił. Hłowne brachi w cyłku tež wón hač dotal wotstronić njemóžeše.

Wuslědki (05.12.22)

póndźela, 05. decembera 2022 spisane wot:

Kopańca, regionalna liga muži

Borussia Berlin – Lichtenberg 2:0 (2:0)

Viktoria Berlin – ZFC Meuselwitz 2:0 (2:0)

BFC Dynamo – VSG Altglienicke 2:1 (1:1)

SV Babelsberg – Carl Zeiss Jena 0:1 (0:0)

Čer.-běli Erfurt – Ener. Choćebuz 2:2 (0:1)

Greifswaldski KK – Luckenwalde 1:1 (0:0)

1. FC Čerwjeno-běli Erfurt 15 36 : 13 31

2. FC Energija Choćebuz 15 36 : 15 30

3. Berlinski AK 14 25 : 12 28

4. Kamjeničanski FC 14 27 : 13 27

5. BSG Chemija Lipsk 14 26 : 19 27

6. Lok Lipsk 14 27 : 18 26

7. SV Babelsberg 15 25 : 19 25

8. Carl Zeiss Jena 15 20 : 11 24

9. VSG Altglienicke 15 33 : 22 23

10. BFC Dynamo 15 21 : 18 23

11. Greifswaldski KK 15 20 : 19 17

12. FC Viktoria Berlin 15 15 : 21 17

13. Hertha BSC II 14 22 : 30 17

14. ZFC Meuselwitz 15 16 : 32 15

15. Lichtenberg 15 13 : 30 13

16. Luckenwalde 15 14 : 23 11

17. Borussia Berlin 15 12 : 49 7

18. Germania Halberstadt 14 10 : 34 3

Regionalna liga žonow

Rostockski FC – Biskopičan. KT 1:4 (1:1)

FC Hertha – SFC Stern 0:0 (0:0)

M.B. Hohen Neuend. – U. Berlin 0:6 (0:2)

Viktoria Berlin – Carl Zeiss Jena II 5:0 (2:0)

Babelsberg – Magdeburgski FFC 4:0 (2:0)

1. Viktoria Berlin 12 81 : 8 33

2. Türkiyemspor Berlin 11 40 : 8 27

3. FC Union Berlin 12 42 : 12 26

4. RB Lipsk II 11 28 : 8 22

5. Magdeburgski FFC 11 29 : 20 21

6. Biskopičanske KT 12 25 : 18 19

7. FFV Erfurt 11 19 : 24 18

8. Carl Zeiss Jena II 12 23 : 21 17

9. FC Hertha 12 17 : 37 13

Najebać dobyće dale njepřišli

pjatk, 02. decembera 2022 spisane wot:
Dołho je trało, doniž njeje němska koparska wubranka wčera wječor přećiwo mustwu Costy Riki prawje do hry namakała. Jasne dobyće 4:2 pak njeje dosahało, zo bychu chowancy narodneho trenarja Hansija Flicka wosmifinale swětowych mišterstwow w Katarje docpěli. Po poražce přećiwo Japanskej a remisu přećiwo Španiskej běchu Němcy na připomoc druhich pokazani, zo bychu dale přišli. Ta pak je wuwostała, wšako su Japančenjo w skupinje E tež faworizowany španiski team z 2:1 porazyli. Nadběhowar Niclas Füllkrug cyle poražny na trawniku leži, wulki són je so rozbuchnył. Dźensa je so mustwo do domizny wróćiło. Foto: pa/GES/Marvin Ibo

Smy dwójce přěhrali

pjatk, 02. decembera 2022 spisane wot:

Na spočatku je so mustwo Němskeje na swětowych mišterstwach kopańcy w Katarje swojeje „one love“-demonstracije wzdało, dokelž hrožeše FIFA ze šmórnjenjom dypkow. A na kóncu smy „my“ cyle njewotwisnje wot politiki sportowsce přěhrali. Njeběše w Katarje tajka „bajka“ kaž w lěću 2006 pola nas doma. Zo smy sej tute krasne lěćo kopańcy tehdom wočiwidnje tež „kupili“ kaž Katar swój lětuši wjeršk, při aktualnej debaće wo přesadźenju „europskich hódnotow“ žanu rólu njehraje. Hladajo na stawizny – wutupjenje indigenych ludow, wuklukowanje surowiznow druhich kontinentow atd. – bych sej tak a tak skromniše wustupowanje „našich ludźi“ přał. Njech wšitcy k tomu přinošuja, zo póńdźe přichodnje prěnjotnje wo sport. Nimo toho njeje nichtó nuzowany, so kóždej mjezynarodnej kekliji wěnować – je we łužiskich stadionach kóždy kónc tydźenja dosć napjatych dramow, kaž móžeš póndźelu w SN čitać.

Marcel Brauman

Znowa kónc w skupinskej fazy

pjatk, 02. decembera 2022 spisane wot:

Němske narodne koparske mustwo muži je druhi króć pospochi w předkole swětowych mišterstwow zwrěšćiło. W třećej skupinskej hrě WM w Katarje drje dobychu Němcy ze 4:2 přećiwo Costa Rice (hlej rozprawa póndźelu), dokelž pak w paralelnej hrě Španiska 1:2 přećiwo Japanskej přěhra, wosta Němska najebać dobyća na třećim městnje. Japanjenjo dobudu z tym skupinu E a trjechja we wosmifinalu na Chorwatsku. Španiska na druhim městnje dóstanje w přichodnym kole Marokko. Najprjedy pak bě wšitko za triumfom Španiskeje wupadało. Najebać pjeć změnow mjez prěnimi jědnaćomi trenarja Luisa Enrique nawjedowaše Španiska přez Álvaro Moratu, kotryž flanku Césara Azpilicuety do saka zhłójčkowa (11.). Mało japanskich ofensiwnych akcijow běchu njedokładne a hektiske. K połčasej pak přińdźe pola Japanskeje z Ritsu Doanom hrajer SC Freiburga, kotryž bě hižo přećiwo Němskej trjechił. A spěšnje je znowa wurunanje třělił (48.). Krótko na to docpě hrajer z Düsseldorfa Ao Tanaka po přihrawce tohorunja zaměnjeneho Kaourija Mitomy, samo nawjedowanje (51.).

Sport (02.12.22)

pjatk, 02. decembera 2022 spisane wot:

Duel tabulkoweju susodow

We wokrjesnej lize stafla dwaj nachwata so jutře dypkowa hra mjez Pančanami a Łutowčanami. Hrać ma so w Pančicach na trawniku. Swój lětuši posledni hrajny dźeń změja Chróšćenjo w krajnej klasy a předposledni Ralbičanscy Sokoljo we wokrjesnej wyšej lize.

03.12. 13:00 Biskopičanske KT 08 –

  FC Grimma

03.12. 13:00 Budissa Budyšin –

  FC Eilenburg

03.12. 13:00 ST Marijina hwězda –

  FSV Łuty

03.12. 13:00 HZ Łaz/Běły Chołmc –

  Sokoł Ralbicy/Hórki

03.12. 13:30 VfB Běła Woda 1909 –

  SJ Chrósćicy

04.12. 13:00 ST Kinspork/Łužnica –

  ST Radwor

Koparski camp při morju

Tež klětu budźe Zapadołužiski koparski zwjazk (WFV) zaso swój prózdninski koparski camp ewag Kamjenc při Baltiskim morju přewjesć. Mjeztym jědnate wudaće planuje WFV za čas wot 8. do 15. julija 2023 druhi raz w młodowni w Ribnitz-Damgartenje. Přizjewić smědźa so holcy a hólcy lětnikow 2010 do 2013. Cyłkownje 46 městnow ma WFV k dispoziciji. Dalše informacije a přizjewjenske modality steja na internetowych stronach koparskeho zwjazka.

Worklečenjo nastupja w Budyšinje

nawěšk

nowostki LND