11. firmowy běh z přizjewjenskim rekordom
W Budyšinje wotmě so minjenu srjedu 11. firmowy běh (SN informowachu). Organizował bě jón MSV Budyšin 04 z.t. Wuhotowarjo móžachu so zdobom nad rekordnej ličbu starterow wjeselić, wšako běše so lětsa 1 396 sportowcow za běh přizjewiło. Tež sydom sobudźěłaćerjow a sobudźěłaćerkow Serbskeho instituta bě nastupiło. Na swojich specielnje za běh naćisnjenych zelenych T-shirtach běše bukowy štom widźeć, pod kotrymž steješe mjeno mustwa – „Serbske heje“. Ideja za motiw, kotryž bě Marleen Schindler naćisnyła, wuchadźa z lětsa w instituće załoženeje iniciatiwy „Zeleny institut“. Z iniciatiwu chcedźa so sobustawojo za naslědnosć w najwšelakorišich wobłukach w instituće zasadźić.
Nowe zestawy staflow
Přez prezidij Zapadołužiskeho koparskeho zwjazka bu staflowe rozdźělenje mužace cyłki za nowu sezonu wobkrućeny. Hrajny wuběrk skedźbnja hišće raz na to, zo su na 1. hrajnym dnju změny hrow z přihłosowanjom přećiwnika darmotne. Staflowe hrajne plany wozjewja so w přichodnych 14 dnjach, ručež je přidźěło Sewjerowuchodneho a Sakskeho koparskeho zwjazka dóšło. Jurij Bjeńš
Wokrjesna wyša liga 2023/2024
1. ST Horni kraj Sprjewja
2. Módro-běli Kulow
3. Biskopičanske KT II
4. KT Ottendorf-Okrilla
5. ST Radwor
6. Hlinowske SC
7. Sokoł Ralbicy/Hórki
8. SC Großröhrsdorf
9. ST Hnašecy-Dobruša
10. TSV Połčnica
11. Natwar Němske Pazlicy
12. SZ Großnaundorf
13. Drohotka Ramnow
14. TSV Wachau
15. ST Ćisk
16. HZ Łaz/Běły Chołmc
Jubilejny koparski turněr
We wobłuku stotych narodnin sportoweho towarstwa Sokoł Ralbicy/Hórki kopachu njedźelu popołdnju tři cyłki wo dobyće. Nimo prěnjeho mustwa delanskich koparjow a Serbskeho mustwa, namaka so tež 15 něhdyšich hrajerjow Sokoła Ralbicy/Hórki a tworješe z tym třeće mustwo. Sudniski kolektiw z Měrćinom Ćóšku, Pascalom Budarjom a Enricom Försterom wjedźeše wšitke tři partije à 45 min.
Za Sokoł Ralbicy/Hórki hrajachu: Christoph Gloxyn, Titus Žur – Pius Šołta, Křesćan Bejmak, Florian Ričl, Balthasar Heidorn, Aleksander Wałda, Pětr Domaška, Dawid Šołta, Stani Šewc, Denny Gloxyn, Tomaš Rawš, Paul Rachela, Michał Matka, Antonius Wałda, Filip Šiman, Toni Kunze, Měrćin Kurjat, Fabian Korjeńk a Adrian Woko
za něhdyšich Sokołow hrajachu: Willi Schöne – Stefan Bjeńš, Pětr Hajdan, Uwe Młynk, Frank Młynk, Fabian Pöpel, Alexander von Köding, Martin Schöne, Michał Šrajer, Fabian Ćěsla, Matijas Möller, Damian Matik, Jeffrey Raab a Antonius Škoda
We wobłuku 45. ADAC motocrossa je němsko-francoska dwójka Tim ...
25. koparski camp
Lěćny čas, čas prózdninow a čas kopańcy. To su tři hesła, kotrež su wot soboty, 8. julija, w dorostowym centrumje Humboldthain program. Přetož zaćehnje 34 přichodnych rjekow jědnatkow a dribblingow do koparskeho campa EWB do dorostoweho centruma. Camp wotměje so lětsa 25. króć.
Při wysokim saku wuspěšni
Po jubilejnym 30. wolejbulowym duelu mjez wučerjemi a dwanatkarjemi w minjenym lěće sćěhowaše tydźenja dalši duel.
Cyłkownje běchu pedagogojo 21 razow wuspěšni a tónraz tomu tež tak bě. Woni přesadźichu so w prěnimaj sadźbomaj 25:21 a 25:10 a wotedachu třeći přechod ze 17:25. Partiju je suwerenje sudźił jědnatkar Anton Wićaz a wulki fanowy blok našich maturantow postara so 15. junija popołdnju w sportowni SŠZC Budyšin wo rjanu atmosferu. Spočatk duela při wysokim saku bě hač k stawej 8:8 wurunany. Sćěhowachu dobre nadaća Franza Friedricha a sylne wuspěšne smeše Metoda Šołty k nawjedowanju 13:9 pedagogow. Tutón předskok hač do kónca prěnjeho přechoda zakitowachu.
Druha sadźba so pola dwanatkarjow cyle nimokuli. Start bě skepsany přez mnoho nadaćow zwonka pola, přijimanje bula bě njedokładne. Z tym ćerpješe kwalita přihrawkow. Wučerski blok steješe kaž murja. Wšitko to wjedźeše k jasnemu 10:25 z wida abiturientow.
Pokal doma wuspěšnje zakitowali
Składnostnje 100 lětneho wobstaća Sokoła Ralbicy/Hórki wotmě so pjatk wječor turněr wo pokal Serbskeho Sokoła w Ralbicach. Přeprošenju sćěhowachu štyri mustwa. To běchu nimo domjaceho mustwa: SJ Njebjelčicy, ST 1922 Radwor a mustwo ST Marijineje hwězdy. Hraješe so přeco dwaceći mjeńšinow, a to po modusu kóždy přećiwo kóždemu.
Kolesowar Tadej Pogačar ze Słowjenskeje je wčera bjez problemow ...
Plany Dynama Drježdźany
Třeći ligist Dynamo Drježdźany bě srjedu, 21. Junija, z prěnim treningom do sezony 2023/24 startował. Ale bjez wupožčeneho Ahmeta Arslana. Dokelž njebě SJ Drježdźany takrjec připrajenu kupowansku opciju sćahnyła, bě najlěpši třělc minjeneje hrajneje doby (25 wrotow) wróćo k Holsteinej Kiel přešoł a mjeztym k druhemu zwjazkowemu ligistej, 1. FC Magdeburg, změnił. Wěste je tež hižo, zo změje něhdyši kapitan Dynamowćanow Tim Knipping, z ligowym konkurentom w Sandhausenje nowe sportowe towarstwo. Tež Sven Müller (wrotar) změni mustwo. Jako nowy třeći wrotar postupi za to 18lětny Erik Herrmann. Wón je 1,97 metrow wulki a přińdźe wot U19 mustwa k profijam. 19lětny Julius Hoffmann, kotryž njeje ani jeničku hru za Saksow absolwował, bu do Babelsberga wupožčeny. Drježdźanskemu cyłkej přizamknył bě so Tobias Kraulich (zakitowar) wot ST Meppen. Wón podpisa jednolětne zrěčenje při Łobju. Něhdyši hrajer Karlsruheskeho SC Lucas Cueto (wonkowny nadběhowar) chce w Drježdźanach znowa přestartować. Změna 27lětneho do Drježdźan je perfektna.
Maturantki 15. jubilejny wolejbulowy duel dobyli
Serbski gymnazij wučerki –
Serbski gymnazij maturantki 0:2
Mjeztym 15. jubilejny duel při wysokim saku mjez wučerkami a maturantkami Serbskeho gymnazija Budyšin (SGB) skónči so srjedź junija z wuspěchom 2:0 za młódšu generaciju.
Prěnja tajka wolejbulowa hra wotmě so póndźelu, 20. junija 2005, w małej sportowni Serbskeho šulskeho a zetkawanskeho centruma Budyšin. Tehdy dobychu abiturientki wokoło Christiny Rachelic z 3:0. Po štyrjoch sportowych duelach sćěhowachu přetorhnjenja wot 2009 do 2012 a dźakowano zahoritym wučerkam za tutu bulosportowu družinu poradźi so jim lěto pozdźišo zaso jedne mustwo na nohi stajić, kotrež po sylnym boju dwanatkarkam 0:2 podleža. Tež w dalšich dźesać wolejbulowych hrow juskachu technisce a atletisce lěpše šulerki.
Rezultaty na hrajnišću njejsu pak rozsudne, ale dobra nalada a wjeselo při hraću. Tak běchu tučasne pedagogowki w jubilejnym duelu z wuslědkom 17:25 a 15:25 spokojom a sej předewzachu, w přichodnym šulskim lěće husćišo zhromadnje trenować.
