Wo lětnej bajce w Južnym Tirolu
Europeada 2016 je nimo. 17. a 18. junija běchu so mužojo a žony Serbskeju koparskeju wubrankow z wulkej nadźiju na puć do Južneho Tirola nastajili. Kak wjeseli a hordźi woni běchu, serbsku narodnosć zastupować směć. Wšitcy běchu so pilnje na tónle sportowy podawk přihotowali.
Žónske mustwo trenowaše nimale kóždu sobotu w Ralbicach abo Biskopicach, hdys a hdys tež w Njebjelčicach. Nimo toho pobychu w čěskim Bedřichovje w sněhakowarskim lěhwje a w Choćebuzu w treningowym lěhwje. Tež někotre testowe hry su měli. Napjatosć a euforija běštej tuž wulkej. Sobotu rano skónčnje w Južnym Tirolu dojědźechu. Přijomny a krasny hotel Alpenhof běše domicil serbskich koparkow.
Poslednja zhromadna hra Schweinsteiger – Podolski
Lille. Stadion Stade Pierre-Mauroy w francoskim měsće Lille běše minjenu njedźelu kruće w rukach němskeje koparskeje wubranki. 44 312 přihladowarjow móžeše tam dožiwić, zo trenar Joachim Löw štyri mjeńšiny po tym zo bě Lukasa Podolskeho zaměnił, tež Bastiana Schweinsteigera na hrajnišćo pósła (76.). Tak steještaj wonaj hač do kónca hry bok poboku na trawniku.
To wšak dyrbješe posledni zhromadny wustup w narodnym mustwje Němskeje być. Snano dóstanjetaj hišće raz wotchadnu partiju, we winowatostnej pak za Němsku cyle wěsće wjace zhromadnje hrać njebudźetaj. Schweinsteiger drje móže so hišće zasadźenja w štwórćfinalu přećiwo Italskej nadźijeć, Podolski pak žane wuhlady wjace nima. „Jogi“ Löw ma na lěwym boku z Götzu a Draxlerom lěpšej alternatiwje. Zo pak bě Löw Podolskemu k dwanatej hrě europskich mišterstwow (EM) dopomhał, dopokazuje, kak wulce sej zasłužby rodźeneho Polaka česći. Bě to wosebity dźak za dwanaće zhromadnych lět, w kotrychž dožiwištaj wobaj wjeršk z dobyćom swětowych mišterstwow 2014 w Brazilskej.
Jendźelska Islandskej a zubnemu lěkarjej podležała
Nizza. Jendźelska nowina The Times pisaše dźensa rano mjez druhim: „Po 959 hrach bě to poniženje w jendźelskich stawiznach – podležeć narodnemu mustwu kraja z 330 000 wobydlerjemi, kotrež trenuje zubny lěkar.“ Wčera wječor su Jendźelčenjo najwjetšej sportowej sensaciji za mału Islandsku dopomhali. Islandska je maćerny kraj kopańcy wušaltowała.
Najprjedy drje je wulki faworit Jendźelska nawjedował. Wayne Rooney přetwori jědnatku k 1:0 (4.). Hižo po 80 sekundach pak Ragnar Sigurðsson wuruna. Dwanaće mjeńšin pozdźišo wón samo hišće na 1:2 zwyši. Čas nadźije za Islandsku so započa. Jědnaće bratrow-koparjow zasadźeše so kóždy za kóždeho. Wojowachu wo kóždy bul, a zatykachu kóždu dźěru. Bój je so wudanił, sensacija bě perfektna. Nětko čakaja njedźelu w štwórćfinalu Francozojo na nich.
Bojowniski wonkowny wuspěch
Natwar Němske Pazlicy
– ST Marijina hwězda 1:2 (0:1)
Zestawa hosći: O. Schmidt – Wróbl (53. Bětnar), Łušćanski, T. Jurš, Lipič, Langer (56. Korjeńk), Winkler, Peschmann, Rab, Pakoßnick (80. P. Schmidt), D. Jurš
Poslednju winowatostnu dypkowu hru we wokrjesnej lize w sezonje mějachu Pančičanscy koparjo w Němskich Pazlicach absolwować. Domjacy běchu kaž hosćo zašłej partiji z dobyćom zakónčili. Mustwje sej tuž na trawniku ničo njedarištej. 0:1 w 15. min. bě dar Němskopazličanskeho wrotarja. Wróbl bě bul ze swójskeje połojcy cyle jednorje raz wysoko do šěsnatki přećiwnika kopnył. Hosćićelski wrotar bul po zdaću wěsće popadny a da jón zaso z rukow. Peschmann spěšnje reagowaše a suny kulowatu kožu do prózdnych wrotow. Slědowaše faza z wjacorymi móžnosćemi na woběmaj bokomaj. Dawid Jurš, Wróbl a Pakoßnick pak njetrjechichu. Na tamnej stronje bě wrotar Schmidt na městnje, a jónu pomhaše jemu žerdź.
13. žabjacy běh
Při horcym a tužnym wjedrje wotmě so minjeny pjatk w Běłej pola Kamjenca mjeztym 13. nócny žabjacy běh po tamnišej hatnej krajinje. Na distancomaj 2 km a 9,6 km wubědźowaše so 971 běharkow a běharjow, mjez nimi tež 15 serbskich. Na 2 km wobsadźichu ze serbskich starterow Florian Čórlich z Konjec 25. městno (sk pod 10), Jonas Glücklich z Kamjenca jědnate (sk pod 12) a Adrijana Matkec z Worklec 9. městno (sk pod 16).
Při chowanju słónca w 21.24 hodź. startowachu tradicionalny a hłowny běh z wutřělemi hońtwjerjow z jich třělbow. Na 9,6 km dźěše wo požadany pokal žabjaceho krala a žabjaceje kralowny. Wubědźiłoj staj sej jón Marc Schulze a Juliane Schmidt, wobaj z Drježdźan. Na tutej distancy, na kotrejž su sta swjatojanskich muškow ze swojim swětleškom atletam dračinu tróšku wolóžili, běštaj najspěšnišej Serbaj Roman Měrćink z Baćonja (sk 20), kiž wobsadźi 6. městno, a Manuela Jurkowa z Łupoje (sk 30) na 5. městnje.
Lubowarjo walkinga wubědźowachu so tohorunja na 9,6 km; woni pak startowachu hižo w 20 hodź. Mjez nimi wojowaše tež serbska atletka Corinna Měrćinkowa z Chelna, kotraž wuwojowa sej mjez žonami cyłkowne 3. městno.
Přećiwnik zasłužbnje dobył
HZ Radwor/Wulka Dubrawa
– HZ Kinspork/Łužnica 1:3 (1:0)
Za Radwor/Wulku Dubrawu zasadźeni: Konrad Noack – Johannes Jatzwauck, Julius Jendrewski, Christoph Jens Puppe, Markus Bolzmann, Leon Hübner, Lukas Spindler, Toni Rudolph, Paul Mehnert, Maximilian Flaton, Tom Kießetz, Pawoł Hančik, Dominic Noack, Tim Muder, Jakob Jatzwauck.
Wróćohru wo titul wokrjesneho mištra w starobnej klasy młodźina A chcyše dwěsćě ludźi widźeć. W Radworju nastupištej Hrajnej zjednoćenstwje Radwor/Wulka Dubrawa a Kinspork/Łužnica. Prěnja hra we Łužnicy bě so 3:3 skónčiła. Po tójšto šansach za wobaj cyłkaj poradźichu so Hančikej překwapjace wrota k nawjedowanju (41.).
Krótko po znowazahwizdanju k druhemu połčasej měješe njetrjebawši foul na kromje šěsnatki fatalne sćěhi. Wólny kop ze zdalenosće 18 metrow zadyri k 1:1 we wrotach (48.) hosćićelow. Woni běchu šokowani a popadnychu sej hišće dwoje dalše wrota (72., 74.).
Widźał, słyšał, napisał (28.06.16)
Awtor dźensa
André Strelow
Europeada 2016, koparske mišterstwa narodnych mjeńšin Europy, bě minjeny tydźeń w italskim Južnym Tirolu. Tež ja běch pódla, a mi zwostanje tójšto rjanych dožiwjenjow w pomjatku. Serbske koparki a serbscy koparjo smědźa woprawdźe spokojom być. Žony, dokelž docpěchu pjate městno, hladajo na ćežke předkoło, w kotrymž dyrbjachu přećiwo finalistkomaj nastupić. W swojej poslednjej hrě chowanče trenarja Pětra Bejmaka a mustwoweho nawody Handrija Rachele pokazachu, zo móža so z druhimi mustwami měrić. Rjenje tež bě, zo wudobychu sej fairplay-pokal. Tón su sej woprawdźe zasłužili.
Wuslědki (28.06.16)
Wokrjesna koparska liga, stafla I
Radwor – ST Budyšin 8:3 (3:3)
1. ST Budyšin 28 100 : 40 68
2. Malešecy 28 75 : 34 58
3. Załom 28 82 : 31 56
4. HZ Budestecy 27 78 : 42 53
5. Kubšicy 28 67 : 32 52
6. Radwor 28 78 : 37 49
Chorwaća so zamołwili
Sand in Taufers. Narodna mjeńšina Chorwatow ze Serbiskeje je so pola organizaciskeho komiteja koparskeje europeady w Južnym Tirolu za cofnjenje połfinala oficialnje zamołwiła. To zdźěli předsyda organizaciskeho komiteja Siegfried Stocker. Lokalny zarjadowar je zamołwjenje přiwzał. W połfinalnej hrě přećiwo Okcitanam běchu so Chorwaća njesportowsce zadźerželi a hrać přestali. W kónčnym hódnoćenju sadźichu jich tuž na 23. městno. Nimo toho njebudu jim kawciju za zapisanje wróćo płaćić.
Jan Hrjehor
Hru wo 12. městno dobyli
Serbska koparska wubranka muži
– Wubranka Sewjernych Frizow 9:0 (6:0)
Za SKWm zasadźeni: Chrystof Gloxyn – Karl Petrick, Fabian Bejma, Pětr Domaška, Simon Žur, Bosćij Bjeńš, Dawid Jurš, Denny Gloxyn, Jonas Krawčik, Antonius Wałda, Dirk Šołta, Bosćij Cyž, Tadej Cyž, Bosćij Bejma, Robert Lejnart, Křesćan Bejmak, Feliks Hrjehor, Denny Kral, Bosćij Kinderman, Fabian Korjeńk, Patrik Woko
