Wulka podpěra najebać poražku
Němki z Južneho Tirola – Łužiske Serbowki (SKWž) 5:0 (2:0)
Zestawa SKWž: Jadwiga Richterowa – Janika Bětnarjec, Franciska Hellnerowa, Klawdija Hejdušcyna (51. Nadja Zamora), Michaela Młynkec (80. Julia Młynkec), Michaela Domaškec (88. Lubina Mičkec), Lenka Fryčec, Sophia Bejmakec, Anna Richterec (65. Lara Brücknerec), Marie-Luise Pjetašec, Chrystina Pašcyna
Wčerawša poražka Serbowkow njeje překwapjaca, wšako bě do hry jasne, zo maja hosćićelki jara sylny cyłk. Překwapił pak je wukon SKWž. Wot wšeho započatka hry forměrowaše so škitny zwjazk, kotryž bě hač do 8. min. bjez dźěrow. Hakle kapitalna třělwa Južnotirolčanki ze zdalenosće něhdźe 22 metrow wjedźeše k nawjedowanju. Wrotarka Jadwiga Richterowa bě bul přepozdźe widźała a njeměješe šansu ju wotwobarać. Slědowaše pak faza, w kotrejž wubědźichu sej serbske koparki samo róžk. Dwójce, trójce jewjachu so tež před šěsnatku přećiwnika, kotryž pak wšitke nadběhi suwerenje wotpopadny. Hišće do přestawki dóńdźe k njetrjebawšemu 0:2 (44.). Třělwa z něhdźe 16 metrow prasny do žerdźe a wottam do wrotow.
Wuspěšna ministrantska kopańca
Šěsć ministrantskich cyłkow 3. do 6. lětnika a štyri mustwa 6. do 8. lětnika su so minjenu sobotu na ministrantskej kopańcy w Pěskecach wobdźělili. Po zhromadnym nyšporje, kotryž swjećeštaj Radworski farar Beno Jakubaš a Kulowski farar Gabriš Nawka, podachu so ministrantske skupiny na Pěskečanske sportnišćo. Ći mjeńši hrajachu w dwěmaj staflomaj. Kónčnu hru dobychu Róžeńčenjo přećiwo Chrósćicam 1:0, a to z direktnje přetworjenym wólnym kopom Konstantina Hrjehorja. Najlěpši dypkowy a wrotowy poměr pola wjetšich ministrantow mějachu Kulowčenjo. W tej kategoriji bě so turněrowy nawoda farar Jakubaš za system kóždy přećiwo kóždemu rozsudźił.
Wutrobne zapłać Bóh wšitkim sudnikam, fararjomaj a dekanatnemu dušepastyrstwu za dźěći za přewšo poradźeny turněr. Kilian Hrjehor
Wuslědki (21.06.16)
Koparska europeada
mužojo
Krimscy Tartarojo
– Madźarojo z Rumunskeje 1:6
Ladinojo – Wubranka z Pustertala* 3:0
* Wubranka z Pustertala zastupuje Zapadothrakiskich Turkow, kotřiž so na turněrje wobdźělić njemóža. Wuslědki wubranki so njehódnoća.
Karačajenjo z Ruskeje
– Wubranka mjeńšin z Estiskeje 10:0
Romojo z Madźarskeje
– Retoromanojo 2:3
Łužiscy Serbja
– Madźarojo ze Słowakskeje 2:2
Korutanscy Słowjency
– Němcy z Danskeje 12:0
Danojo z Němskeje – Aromunojo 6:0
Okcitanojo – Słowacy z Madźarskeje 4:1
Sewjerni Frizojo – Manksojo 3:2
Němcy z Južneho Tirola
– Němcy z Pólskeje 3:1
Němcy z Ruskeje
– Južni Serbja z Chorwatskeje 0:0
Cymbrojo z Italskeje
– Němcy z Madźarskeje 2:2
žony
Němki z Južneho Tirola
– Łužiske Serbowki 5:0
Retoromanki – Ladinjanki 1:2
Delanscy koparjo šlager wokrjesneho pokala dobyli
SJ Chrósćicy – Sokoł Ralbicy/Hórki 0:4 (0:1)
Zestawa SJC: Králíček – Schulze, Cyž, Šafář, Dórnik, Žur, Runt, T. Domaška, Dehn (64. Młynk), Šmit (83. Kunze), Věchet
Zestawa Sokoła: Gloxyn – Šewc, B. Bjeńš, Lulak, Schultz, Šołta, S. Bjeńš, Bejma, Korjeńk (87. Matka), Wałda, P. Domaška (78. von Köding)
Mało wrotow na kóncu druheho tydźenja EM
Saint Etienne. Čěska koparska wubranka hraješe pajtk přećiwo narodnemu mustwu z Chorwatskeje. Hač do 75. min. wšitko za tym wupadaše, zo Chorwaća tež druhu hru dobudu. 1:0 docpěchu w 37. min. přez Ivana Perišića. Po 2:0 (59.) přez Ivana Rakitića bě poprawom wšo jasne a rozsudźene. Zaměnjeny Milan Škoda pak w 76. min. z krasnymi hłójčkowanymi wrotami na 2:1 skrótši. A z přetworjenej jědnatku postara so Tomáš Necid wo 2:2 (90.+3) a wo wulke wjeselo w rjadach Čechow. Horcy duel nasta mjez Italskej a Šwedskej. 87 mjeńšin bě hra wurunana. Potom pak přidruži so Italčanam dwanaty hrajer – zbožo. Eder Citadin Martins wuhra cyły šwedski škit a wotzamkny akciju z rjanymi wrotami. Samsny dźeń, pjatk, přewiny Španiska Turkowsku z 3:0. Španiska bě jasnje lěpše mustwo. 1:0 (34.) Álvaro Morata třěli 2:0, Manuel Nolito (37.) a znowa Morata 3:0 (48.). Třeće wrota pak njeměli płaćić, dokelž steješe Jordi Alba při pasu Andrésa Iniesty w nimohrě. Španiska je třeće mustwo po Francoskej a Italskej, kotrež je so hižo za wosmifinale kwalifikowało.
Widźał, słyšał, napisał (20.06.16)
Zastupuju tule dźensa Njebjelčanskeho koparja, kiž bu krótkodobnje hišće za europeadu nominowany. Wězo to rady činju a přeju jemu, jeho mustwu kaž tež serbskim koparkam dale dosć mocow, wjesela a wuspěcha w Južnym Tirolu. Prěnja chwalba słuša na tymle městnje hižo raz serbskim medijowym zastupnikam, kotřiž wobě wubrance do Italskeje přewodźachu. Hač je to zajimawy blog na serbskej stronje sćelaka MDR, wobrazy na Facebooku, rozprawy tu w SN abo samo livestream ze serbskim komentatorom – fanojo tu doma su po najspěšnišim puću jara derje informowani.
Chrystina Pašcyna čestne wrota třěliła
Serbska koparska wubranka žonow – Koparska wubranka Okcitančankow 1:12 (0:7)
Za SKWž hrajachu: Jadwiga Richterowa – Janika Bětnarjec, Franciska Hellnerowa, Klawdija Hejdušcyna, Lara Brücknerec (61. Michaela Domaškec), Nadia Zamora-Gonzales (18. Lubina Mičkec/75. Marija Škodźina), Lenka Fryčec, Chrystina Pašcyna (91. Jana Mejglowa), Sophia Bejmakec, Michaela Młynkec, Marie-Luise Pjetašec
Najebać wysoku poražku Serbskeje koparskeje wubranki žonow (SKWž) k zazběhej europeady bě nalada po hrě w mustwje dobra a w sylnym serbskim fanowym bloku fenomenalna. SKWž dźakuje so na tymle městnje něhdźe 200 serbskim přiwisnikam, kotřiž su so w stadionje SSV Mühlwalda wo njezapomnitu atmosferu a podpěru starali.
Na hrajnišću a trawersach Serbja dominowali
Serbska koparska wubranka muži – Němcy z Danskeje 5:1 (3:1)
Za SKWm hrajachu: Hubertus Čórlich – Karl Petrick, Denny Kral (75. Antonius Wałda), Bosćij Bejma (46. Křesćan Bejmak), Robert Lejnart (81. Pětr Domaška), Dawid Jurš, Jonas Krawčik, Bosćij Kinderman, Denny Gloxyn, Fabian Bejma, Tadej Cyž.
Wuslědki (20.06.16)
Koparska europeada
mužojo
Ladinojo – Madźarojo z Rumunskeje 2:1
Wubranka z Pustertala*
– Krimscy Tatarojo 0:3
*Wubranka z Pustertala zastupuje Zapadothrakiskich Turkow, kotřiž so na turněrje wobdźělić njemóža. Wuslědki wubranki so njehódnoća.
Romojo z Madźarskeje
– Wubranka mjeńšin z Estiskeje 4:0
Karačajenjo z Ruskeje
– Retoromanojo 5:2
Korutanscy Słowjency
– Madźarojo ze Słowakskeje 0:1
Łužiscy Serbja – Němcy z Danskeje 5:1
Okcitanojo – Aromunojo 4:1
Danojo z Němskeje
– Słowacy z Madźarskeje 2:3
Němcy z Južneho Tirola – Manksojo 3:0
Sewjerni Frizojo – Němcy z Pólskeje 5:5
Cymbrojo z Italskeje
– Južni Serbja z Chorwatskeje 0:8
Němcy z Ruskeje
– Němcy z Madźarskeje 9:0
žony
Okcitančanki – Łužiske Serbowki 12:1
Němki z Ruskeje – Ladinjanki 1:0
Sport (17.06.16)
11. třělenje jědnatkow
Pjatk, 17. junija, wot 18.30 hodź. započnje so na sportnišću w Blunju 11. třělenje jědnatkow. Kóžde mustwo startuje z pjeć třělcami a jednym wrotarjom. Přizjewjenja su hač krótko do wubědźowanja móžne, a to pod .
Krajne mišterstwa w jěchanju
Sakski jěchanski dorost wubědźuje so wot 16. do 19. junija w Moritzburgu. Tež Hannah Lehderec z Njeswačidła, krajna mišterka 2015 w dresurje, budźe tam trójce startować. W kategoriji ponyje do 16 lět je so Njeswačanka tež zapisała a potom hišće za skakanje z wulkimi konjemi.
Wulki serbski koparski derby
