Normalita je wšo!

pjatk, 03. januara 2020 spisane wot:
Nowa doba započnje so póndźelu za Serbski rozhłós a jeho připosłucharjow: Štyri hodźiny kóžde rano wusyłaja potom program w hornjoserbskej rěči – třećinu wjace a telko kaž ženje dotal. To je na kóždy pad postup do praweho směra, a směr rěka: medijowa normalita. Štož je wužadanje rozhłosownikam a zdobom polěpšenje publikumej, móžeš přiwšěm jenož jako symbolisku prezencu hornjoserbšćiny na medialnym swěće hódnoćić (połhodźinski telewizny magacin je najjasniši wuraz toho). Medialna normalita je něšto druhe, a měritko je tule wězo dominantna rěč: Wšojedne hdy, přeco hdyž chceš, móžeš sej rozhłós abo telewiziju w swojej rěči naposkać abo wobhladać. Štóž praji, zo to za tajki mały ludźik kaž Serbow móžno njeje, njech hlada do Šwicarskeje. Tam wusyłaja 24 hodźin w retoromanšćinje – za něhdźe 60 000 rěčacych. A hišće něšto k normaliće słuša: Serbska hudźba w němskim programje! Cordula Ratajczakowa

Wuměnk njerěka so kamery wzdać

póndźela, 30. decembera 2019 spisane wot:
Fotograf Maćij Bulank je wšudźe w Serbach znaty prosće jako „te wobličo“ serbskeho wječornika. Jako wučomnik w Ludowym nakładnistwje Domowina je pola fotografoweho mištra Schmidta w Budyšinje zakłady rjemjesła nawuknył a po wukubłanju do redakcije tehdyšeje Noweje doby zastupił. Pozdźišo zabsolwowa dalokostudij fotografije w Lipsku. Zwěčnjene su jeho fota tež w někotrych w serbskim nakładnistwje wušłych wobrazowych zwjazkach. Šefredaktor Janek Wowčer je Maćija Bulanka z redakcije rozžohnował, wšako je wón wot 1. januara wuměnkar. Dźakujemy so! Na jeho fota pak njejsmy jenož my w redakciji dale wćipni. Foto: SN/Hanka Šěnec

Hižo dźensa z Předźeznakom

pjatk, 27. decembera 2019 spisane wot:

Hač do silwestra drje zbywaja nam hišće někotre dny, a póndźelu, 30. decembra, dóstanjeće poslednje lětuše wudaće Serbskich Nowin. Dźensa pak wšitkich swojich abo­nentow hižo­ z kónclětnej zabawu serbskeho wječornika, z Pře­dźe­­zna­kom pře­kwa­­pjamy. To zwi­suje z tym, zo njebychu hewak ći čitarjo, kotřiž jenož kónctydźenske wudaće Serb­skich Nowin dóstawaja, silwestersku přiłohu hišće w nachilacym so lěće w listowym kašćiku měli.

Přejemy wam, lube čitarki a lubi čitarjo, wjele wjesela při čitanju!

Z hodownym Předźenakom

pjatk, 20. decembera 2019 spisane wot:

Pjatk je našim čitarjam dźeń z kónc­tydźenskej přiłohu Předźenakom. Pjatk do štwórteho adwenta je lětsa zdobom pjatk do patoržicy. Wćipnosć do wobradźenja z darami pod hodowny štom wšudźe z kóždej hodźinu přiběra. Zo bychu tež wšitcy abonenća kónctydźenskeho wudaća SN swoju lekturu k swjatym dnjam sčasom dóstali, su hodow­ny Předźenak kaž tež strony z postrowami a zabawu hižo dźensa našemu wječor­nikej připołožene.

Přejemy wam, lube čitarki a lubi čitarjo, wjele wjesela při čitanju!

Žadyn dźeń njewobžarowała

srjeda, 18. decembera 2019 spisane wot:

Borbora Felberowa, nowinska rěčnica Domowiny a wosobinska referentka jeje předsydy, poda so na wuměnk

Wona njebě nihdy přećelka wulkich słowow, a přiwšěm wě słowa wušiknje sadźeć­ a je samo do narěčow splesć. Ze swo­jim dźěłom njeje so nihdy hordźi­ła a móže přiwšěm na něštožkuli zdokonjane zhladować. Borbora Fel­berowa, nowinska rěčnica Domowiny a wosobinska referentka předsydy Dawi­da Statnika, so kónc 2019 po 16 lětach w zastojnstwje na wuměnk poda.

Wjele lět w cuzbje

Lěta 1956 w Komorowje pola Rakec jako Borbora Wuhlerjec rodźena wotrosće w serbskim staršiskim domje, chodźeše w Rakecach do šule a maturowaše na Serbskej rozšěrjenej wyšej šuli w Budy­ši­nje. Přizamkny so wolontariat pola te­hdy­šeje Noweje doby a štyri lěta trajacy studij­ žurnalistiki, kotryž z diplomom zakónči. 1980 nawróći so do Łužicy a dósta bydlenje w Budyskim Serbskim domje. W redakciji Noweje doby bě štyri lěta­ wotrjadnica za nutřkownu politiku.

MDR wotkrywa „Swět za durjemi“

póndźela, 02. decembera 2019 spisane wot:

Budyšin (SN/MiR). „Swět za durjemi“ rěka prěnja słuchohra za swójby, kotruž je Budyske studijo Serbskeho rozhłosa na cejdejku nahrawało. Wčera je rozhłós stawizničku połnu dyrdomdejow prěni króć po swojich žołmach wusyłała. Wot dźensnišeho je CD w mnohich łužiskich předawanišćach, mjez druhim w Budyskimaj Serbskej kulturnej informaciji a Smolerjec­ kniharni kaž tež w pjekarnjach we Wotrowje, Kulowje, Chrósćicach, Rakecach a w Ralbičanskej kwětkarni „Kostrjanc“ na předań. Serbske šulske towarstwo a Křesćansko-socialny kubłanski skutk a Serbske šulske towarstwo dóstaštej ju za swoje dźěćace dnjowe přebywanišća, hdźež serbšćinu posrědkuja.

Kritizuje medije wuchoda dla

pjatk, 25. oktobera 2019 spisane wot:

Mnichow (dpa/SN). Jednaćelka powěsćoweho sćelaka n-tv Tanit Koch kritizuje medije we wobchadźenju z wuchodom Němskeje. „Rozprawnistwo wo wuchodnej Němskej runja so we wulkim dźělu safaristwu“, rjekny wona wčera na Mnichowskich medijowych dnjach. Tam wumjetowaše žurnalistam „moralisku nadutosć“. Hdyž medije cyłe kónčiny jako přewažnje prawicarske wočornjeja, „nje­trjebamy so dźiwać, zo mamy jako branša problemy sej dowěru zdobyć“. Scyła je w redakcijach Němskeje přemało mnohotnosće a přemało rozdźělnych biografijow, rjekny bywša šefredaktorka nowiny Bild, kiž je dźensa tež šefredaktorka centralneje redakcije medijoweje skupiny RTL. „Je ćežko w redakciji konserwatiwneho katolika namakać.“

Programowy direktor telewizijneho sćelaka ARD Volker Herres wupraja so za to, w žur­nalistiskim dźěle „rozumnje jednać, nic tak jara z rozhorjenosću: Dajće nas mjenje kaž Trump jednać.“ Politiske diferency měli so wudiskutować, bjez „mora­liskeje heje“. Zamołwitosć žurna­listow je wo dialog so prócować, runje tam, hdźež to wosebje boli.

Medialne splećenje

srjeda, 23. oktobera 2019 spisane wot:

Budyšin (SN/bn). Sakski wukubłanski a wupruwowanski kanal (SAEK) a Serbski rozhłós pokročujetej z tradiciju a wuhotujetej tuchwilu „IV. šulersku akademiju medije“. Lětsa wopytuje cyłkownje wosom šulerkow a šulerjow 6. do 12. lětnika prózdninski poskitk w Budyskim studiju předewzaća MeKoSAx – Medijowa kompetenca za Saksku. Wjetšina z nich přisłuša redakciji Radija Satkula a je so hižo znajmjeńša jónu na akademiji wobdźěliła.

„Zo mamy wjacorych šulerjow, kotřiž wjace nowačcy njejsu, nam wězo pomha. Tak móžemy na to nawjazać, štož smy loni z nimi zdźěłali. Za studentow je nažel ćežko na kursach so wobdźělić. Wšako je nowy semester runje zaběžał“, rozłožuje rozhłosownica Andreja Chěžcyna, kotraž zhromadnje z nawodu SAEK Michałom Cyžom akademiju zamołwja.

Pisajće nam!

pjatk, 27. septembera 2019 spisane wot:
Lětsa zhladujemy na 30. róčnicu powalenja murje a tak na towaršnostny přewrót w Němskej. Kóždy je chětro napjaty čas hinak dožiwił. Napisajće nam tuž swoje dopomnjenki, kak sće wy, lubi čitarjo, přewrótowy čas dožiwili a posrědkujće je nam. Zawěsće namakaće tež hišće historiske foto, kotrež so k tomu hodźi. Pósćelće nam wšitko za wozjewjenje hač do 1. oktobra pak postalisce na: Serbske Nowiny, Sukelnska 27 (Tuchmacherstr. 27), 02625 Budyšin pak elektronisce na: . Jako hesło podajće prošu „Róčnica“. Wutrobny dźak! Redakcija Serbskich Nowin

Pisajće nam!

wutora, 24. septembera 2019 spisane wot:
Lětsa zhladujemy na 30. róčnicu powalenja murje a tak na towaršnostny přewrót w Němskej. Kóždy je chětro napjaty čas hinak dožiwił. Napisajće nam tuž swoje dopomnjenki, kak sće wy, lubi čitarjo, přewrótowy čas dožiwili a posrědkujće je nam. Zawěsće namakaće tež hišće historiske foto, kotrež so k tomu hodźi. Pósćelće nam wšitko za wozjewjenje hač do 1. oktobra pak postalisce na: Serbske Nowiny, Sukelnska 27 (Tuchmacherstr. 27), 02625 Budyšin pak elektronisce na: . Jako hesło podajće prošu „Róčnica“. Wutrobny dźak! Redakcija Serbskich Nowin

nawěšk

SERBSKE NOWINY podpěruja:

Novi Sad – kulturna stolica Europy

nowostki LND