Sewjerofriziski institut skutkuje mjeztym 50 lět

póndźela, 26. oktobera 2015
artikl hódnoćić
(0 )

Kónc awgusta 1965 wotewrěchu w małym schleswigskim měsće Bredstedt/Bräist tak mjenowany Nordfriisk Instituut (NI). Wón přewza nadawk, rěč, stawizny a kulturu Sewjernych Frizow hajić a přepytować. Institut z dwanaće sobudźěłaćerjemi na šěsć planowych a dalšich wobmjezowanych městnach je hač do dźensnišeho centralne zarjadnišćo k zachowanju a spěchowanju mjeńšinowych aktiwitow we wokrjesu Sewjerneje Friziskeje (NF), kotrež ma swoje sydło w přistawnym měsće Husum. Institut podpěruje tuž – na politisce neutralnej bazy – hižo 50 lět čestnohamtske mocy w specifiskich towarstwach runje tak kaž kubłanje abo medije. Sam wudawa štwórćlětnje časopis Nordfriesland.

Dźěławosć instituta zawěsća „Verein Nordfriesisches Institut“ z nimale 1 000 sobustawami. Towarstwo, 1948 přez friziske hibanje załožene, je starše hač slědźenišćo same. Tradicionelne ćežišća instituta namakaja wuraz w dźěłowych skupinach za rěč a literaturu, stawizny, swójbne slědźenja a ludowe twarstwo. K tomu přińdźe biblioteka z 15 000 zwjazkami a 70 000 nowinskimi wurězkami. Archiw chowa daty a dokumenty tysacow wupućowarjow z Friziskeje do Sewjerneje Ameriki. Wot lěta 2007 je NI uniwersiće w Flensburgu přirjadowany, hdźež skutkuje zdobom jenički friziski seminar w Němskej. Hišće lětsa poswjeća při hłownym twarjenju cyle nowy přitwar, kotryž poskići rum za multime­dialne wustajeńcy a magacin ze wšela­kimi wobstatkami.

Institut běše w swojej eksistency dru- hdy wohroženy. Wjetši dźěl stajnych kóštow zaruna dźensa kraj Schleswigsko-Holsteinska, płaćacy swoju přiražku wot njedawna we wobłuku ciloweho dojednanja. Nimo přirady z regionalnej kompetencu funguje kuratorij ze zastupjerjemi politiki a wědomosće, mjez nimi wot 1995 tež direktor Serbskeho instituta. Sewjerofriziske zarjadnišćo twori wot wšeho spočatka móst mjez teoriju a praksu za nimale 20 000 Sewjernych Frizow; wone­ móže mjeztym na wjace hač 400 knižnych wozjewjenjow pokazać. Nawod instituta wukonja hižo 30 lět historikar prof. dr. Thomas Steensen, kiž bě po přewróće wjackróć z hosćom na konferencach a přednoškach we Łužicy. Aktualna předsydka towarstwa, přełožowarka Inken­ Völpel-Krohn, zwurazni k jubilejej swoje přeswědčenje, zo kroči zasłužbny Bredstedtski dom „sebjewědomje do srjedźodobnje wěsteho přichoda“.

wozjewjene w: Róčnica
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND