Serbske ewangelske towarstwo ma tójšto idejow za lěto 2026

Budyšin (SN/MiR). Serbske ewangelske towarstwo (SET) je znowa na reformaciskim dnju, zašły pjatk, swoju sobustawsku zhromadźiznu přewjedło. W Michałskej cyrkwi w Budyšinje so wjace hač 30 ludźi zetka, zo bychu potom zhromadnje ze serbskim superintendentom Krystofom Rummelom nutrnosć swjećili. Přizamkny so zhromadźizna na wosadnej žurli, štož je přeco tež składnosć za serbsku bjesadu. Dotalny a tež nowy předsyda SET Mato Krygaŕ rjekny, zo towarstwo z wulkimi wočakowanjemi na lěto 2026 zhladuje. Tak chcedźa z nahrawanjemi serbskich kěrlušow za Bože słowo w serbskim rozhłosu hromadźe z chórom Budyšin pokročować. „W tym zwisku planujemy tež dźěłarničku za zajimcow, kotřiž bychu teksty za to pisali a rěčeli. Za to pytamy pomoc a podpěru z boka towarstwa.“ Klětu w juniju wotměje so cyrkwinski dźeń we Wojerecach, kotryž wuhotuja ewangelscy wěriwi zhromadnje z 20. serbskim domizniskim dnjom. Dalši projekt je serbski ewangelski kónc tydźenja w aprylu w Hainewaldźe. Dr.