Jubilejny koparski turněr

wutora, 04. julija 2023 spisane wot:

We wobłuku stotych narodnin sportoweho towarstwa Sokoł Ralbicy/Hórki kopachu njedźelu popołdnju tři cyłki wo dobyće. Nimo prěnjeho mustwa delanskich koparjow a Serbskeho mustwa, namaka so tež 15 něhdyšich hrajerjow Sokoła Ralbicy/Hórki a tworješe z tym třeće mustwo. Sudniski kolektiw z Měrćinom Ćóšku, Pascalom Budarjom a Enricom Försterom wjedźeše wšitke tři partije à 45 min.

Za Sokoł Ralbicy/Hórki hrajachu: Christoph Gloxyn, Titus Žur – Pius Šołta, Křesćan Bejmak, Florian Ričl, Balthasar Heidorn, Aleksander Wałda, Pětr Domaška, Dawid Šołta, Stani Šewc, Denny Gloxyn, Tomaš Rawš, Paul Rachela, Michał Matka, Antonius Wałda, Filip Šiman, Toni Kunze, Měrćin Kurjat, Fabian Korjeńk a Adrian Woko

za něhdyšich Sokołow hrajachu: Willi Schöne – Stefan Bjeńš, Pětr Hajdan, Uwe Młynk, Frank Młynk, Fabian Pöpel, Alexander von Köding, Martin Schöne, Michał Šrajer, Fabian Ćěsla, Matijas Möller, Damian Matik, Jeffrey Raab a Antonius Škoda

We wobłuku 45. ADAC motocrossa je němsko-francoska dwójka Tim Brümmer/Rodolphe Lebreton njedźelu w Jaworje na motocrossowej čarje „Při Kaponicy“ wobaj běhaj lětušeho němskeho mišterstwa pobóčnych wozow dobyła. Pjatu z cyłkownje wosom stacijow dominowaše tež pólski kwadpilot Roman Gwizda na swojim Yamahakwadźe. Na woběmaj dnjomaj sćěhowaše w Jaworje běhi krajnych młodźinskich hrow a němskeho mišterstwa 3 700 přihladowarjow. Foto: Konstantin Hrjehor

25. koparski camp

wutora, 04. julija 2023 spisane wot:

Lěćny čas, čas prózdninow a čas kopańcy. To su tři hesła, kotrež su wot soboty, 8. julija, w dorostowym centrumje Humboldthain program. Přetož zaćehnje 34 přichodnych rjekow jědnatkow a dribblingow do koparskeho campa EWB do dorostoweho centruma. Camp wotměje so lětsa 25. króć.

Při wysokim saku wuspěšni

wutora, 04. julija 2023 spisane wot:

Po jubilejnym 30. wolejbulowym duelu mjez wučerjemi a dwanatkarjemi w minjenym lěće sćěhowaše tydźenja dalši duel.

Cyłkownje běchu pedagogojo 21 razow wuspěšni a tónraz tomu tež tak bě. Woni přesadźichu so w prěnimaj sadźbomaj 25:21 a 25:10 a wotedachu třeći přechod ze 17:25. Partiju je suwerenje sudźił jědnatkar Anton Wićaz a wulki fanowy blok našich maturantow postara so 15. junija popołdnju w sportowni SŠZC Budyšin wo rjanu atmosferu. Spočatk duela při wysokim saku bě hač k stawej 8:8 wurunany. Sćěhowachu dobre nadaća Franza Friedricha a sylne wuspěšne smeše Metoda Šołty k nawjedowanju 13:9 pedagogow. Tutón předskok hač do kónca prěnjeho přechoda zakitowachu.

Druha sadźba so pola dwanatkarjow cyle nimokuli. Start bě skepsany přez mnoho nadaćow zwonka pola, přijimanje bula bě njedokładne. Z tym ćerpješe kwalita přihrawkow. Wučerski blok steješe kaž murja. Wšitko to wjedźeše k jasnemu 10:25 z wida abiturientow.

Pokal doma wuspěšnje zakitowali

wutora, 04. julija 2023 spisane wot:

Składnostnje 100 lětneho wobstaća Sokoła Ralbicy/Hórki wotmě so pjatk wječor turněr wo pokal Serbskeho Sokoła w Ralbicach. Přeprošenju sćěhowachu štyri mustwa. To běchu nimo domjaceho mustwa: SJ Njebjelčicy, ST 1922 Radwor a mustwo ST Marijineje hwězdy. Hraješe so přeco dwaceći mjeńšinow, a to po modusu kóždy přećiwo kóždemu.

Kolesowar Tadej Pogačar ze Słowjenskeje je wčera bjez problemow druhu etapu lětušeje kołojězby Tour de France zmištrował a po 209 kilometrach do španiskeho San Sebastiana dojěł. Pogačar, tule w běłym trikoće najlěpšeho kolesowarja pod 25 lětami, bě wubědźowanje 2020 a 2021 dobył. Lětsa je sej z prěnimi dypkami hižo dobry zakład stworił. Foto: pa/AP/Thibault Camus

Plany Dynama Drježdźany

póndźela, 03. julija 2023 spisane wot:

Třeći ligist Dynamo Drježdźany bě srjedu, 21. Junija, z prěnim treningom do sezony 2023/24 startował. Ale bjez wupožčeneho Ahmeta Arslana. Dokelž njebě SJ Drježdźany takrjec připrajenu kupowansku opciju sćahnyła, bě najlěpši třělc minjeneje hrajneje doby (25 wrotow) wróćo k Holsteinej Kiel přešoł a mjeztym k druhemu zwjazkowemu ligistej, 1. FC Magdeburg, změnił. Wěste je tež hižo, zo změje něhdyši kapitan Dynamowćanow Tim Knipping, z ligowym konkurentom w Sandhausenje nowe sportowe towarstwo. Tež Sven Müller (wrotar) změni mustwo. Jako nowy třeći wrotar postupi za to 18lětny Erik Herrmann. Wón je 1,97 metrow wulki a přińdźe wot U19 mustwa k profijam. 19lětny Julius Hoffmann, kotryž njeje ani jeničku hru za Saksow absolwował, bu do Babelsberga wupožčeny. Drježdźanskemu cyłkej přizamknył bě so Tobias Kraulich (zaki­towar) wot ST Meppen. Wón podpisa jednolětne­ zrěčenje při Łobju. Něhdyši hrajer Karlsruheskeho SC Lucas Cueto (wonkowny nadběhowar) chce w Drježdźanach znowa přestartować. Změna 27lětneho do Drježdźan je perfektna.

Serbski gymnazij wučerki –

Serbski gymnazij maturantki 0:2

Mjeztym 15. jubilejny duel při wysokim saku mjez wučerkami a maturantkami Serbskeho gymnazija Budyšin (SGB) skónči so srjedź junija z wuspěchom 2:0 za młódšu generaciju.

Prěnja tajka wolejbulowa hra wotmě so póndźelu, 20. junija 2005, w małej sportowni Serbskeho šulskeho a zetkawanskeho centruma Budyšin. Tehdy dobychu abiturientki wokoło Christiny Rachelic z 3:0. Po štyrjoch sportowych duelach sćěhowachu přetorhnjenja wot 2009 do 2012 a dźakowano zahoritym wučerkam za tutu bulosportowu družinu po­radźi so jim lěto pozdźišo zaso jedne mustwo­ na nohi stajić, kotrež po sylnym boju dwanatkarkam 0:2 podleža. Tež w dalšich dźesać wolejbulowych hrow juskachu technisce a atletisce lěpše šulerki.

Rezultaty na hrajnišću njejsu pak rozsudne, ale dobra nalada a wjeselo při hraću. Tak běchu tučasne pedagogowki w jubilejnym duelu z wuslědkom 17:25 a 15:25 spokojom a sej předewzachu, w přichodnym šulskim lěće husćišo zhromadnje trenować.

Widźał, słyšał, napisał (03.07.23)

póndźela, 03. julija 2023 spisane wot:

Awtor dźensa

Tadej Cyž

Wulki jubilej woswjeći kónc tydźenja Sokoł Ralbicy/Hórki. Tamniše sportowe towarstwo wobsteji nětko hižo 100 lět. Wužadanja za sportowe jednotki budu w přichodźe mjenujcy dale wulke a wobšěrne. Čim wažniše je a budźe čestnohamtske dźěło. Jubilejny swjedźeń a program w Ralbicach bě tuž dopokaz za dobre zhromadne dźěło w tamnišim towarstwje. Dale tak!

Jedyn z programowych dypkow bě hra mjez młodźinu D Sokoła a serbskej koparskej wubranku młodźiny D. Pjatk popoł­dnju dožiwichu přihladowarjo spěšnu a wotměnjacu hru w, kotrejž so chowancy Reneja Zyndy z 4:2 přesadźichu. Mustwo wudoby sebi w tutej hrajnej doby tež mišterstwo we wokrjesnej krajnej lize a postupi tuž do wokrjesneje wyšeje ligi. Budźe to nowe wužadanje za serbski cyłk, kotryž nastupi potom přećiwo mustwam kaž Biskopicy, Wojerecy abo Połčnica.

Sport (30.06.23)

pjatk, 30. junija 2023 spisane wot:

Wohnjowoborny sport

Kameradki a kameradojo dobrowólnych a dalšich wohnjowych woborow z cyłeje Sakskeje wubědźuja so 1. julija w Trjebinje wo Sakski cup. Zarjadowar budźe Krajny woborny zwjazk Sakskeje, wuhotowar Trjebinska dobrowólna wohnjowa wobora. Dorost, žony a mužojo wubědźuja so wot 10 hodź. na sportowym arealu w hašenju, skupinska stafeta, łaženje po rěblu a běh přez zadźěwki.

Dźensa jubilejny turněr

W Ralbicach swjeći sportowe towarstwo Sokoł Ralbicy/Hórki wot dźensnišeho do 2. julija „100 lět sport w Delanach“. Dźensa wot 18 hodź. kopa stara garda Sokoła Ralbicy/Hórki, ST Marijineje hwězdy, ST Radwor a SJ Njebjelčicy. Mjenowane cyłki su so za jubilejny 25. turněr starych knjezow wo pokal Serbskeho Sokoła přizjewili. Sobotu a njedźelu w Ralbicach potom přez cyły dźeń sportuja.

Dynamo w měsće

Prěnje koparske mustwo Dynama Drježdźany hraje jutře, sobotu na Budyskej Młynkec łuce přećiwo prěnjemu koparskemu zastupnistwu Budissy Budyšin. Sudnik přihotowanskeje partije, kotraž započnje so w 16 hodź., budźe serbski referee Michał Neter z Njeswačidła.

nowostki LND