Volleyballisća SGB znowa dominuja

wutora, 02. januara 2018 spisane wot:

Volleyballisća Serbskeho gymnazija Budyšin­ (SGB) steja w cyłkownym wo­krjesnym hódnoćenju šulow ze šty­rjomi prěnimi a štyrjomi druhimi městnami znowa před Goethowym gymnazijom Biskopicy na čole.

Hižo mnohe lěta wotměwaja so pod hesłom „Młodźina trenuje za olympiju“ tež w hali na Budyskim Třělnišću šulerske wokrjesne wurisanja we volleyballu z najstaršej starobnej skupinu I (11. do 13. lětnik). Wukónc wubědźowanjow, kotrež zakónčichu so krótko do hodownych prózdnin, bě z wida SGB tróšku njezbožowny. Najprjedy přěhrachu naše šulerki finalnu partiju přećiwo Schillerowemu gymnazijej z 20:25 a 21:25 a krótko po tym dyrbjachu so naši hólcy w napjatym kónčnym rozestajenju Goethowemu gymnazijej Biskopicy ze 17:25 a 16:25 kłonić.

Basketballowe mustwo U 18 MSV Budyšin hraje tučasnje wuspěšnje wo wobwodne mišterstwa U 18 Drježdźany. Tež wjacori Serbja su čłonojo mustwa – tak na přikład Jan Šołta z Hornjeje Kiny, kotrehož widźimy tu při pospyće, bul do basketballoweho koša ćisnyć. Po štyrjoch hrach maja Budyšenjo štyri dypki. Tež wrotowy poměr z 28 plusowymi dypkami je pozitiwny. Foto: Jörg Stephan

Awtor dźensa Jan Hrjehor

Twjerdźu, zo njeje w stawiznach kolumny Widźał, słyšał, napisał (WSN) hišće ženje jedyn a tón samsny pisar WSN-lěto zahajił a zakónčił. Móžno to wězo je, prawdźepodobnosć pak je skerje snadna. W nowym planje mjenujcy steji, zo směm ja dźensa kaž tež 27. decembra 2018 pisać. Cyłkownje je 53 přinoškow planowanych, kotrež su pola 13 awtorow skazane. Jan Macka hižo njepisa, nowu pisarku/noweho pisarja njeje sportowa redakcija Serbskich Nowin zdobyć móhła. Snano so jej to w běhu tohole lěta poradźi.

WSN-lěto 2018 zahajam z podawi­znu, kotraž je so loni kónc nowembra pola nas doma w Róžeńće stała. Zhromadnje z někotrymi wjesnjanami běchmy sej na 13. hrajnym dnju zwjazkoweje koparskeje ligi duel mjez Borussiju Dortmund (BVB) a FC Schalke 04 wobhladali. Fanow Schalke we wsy po zdaću nimamy – ju jedyn dźěła w Róžeńčanskej swěčkarni –, za to pak někotrych BVB-přiwisnikow, wjacorych fanow FC Bayern Mnichowa stajnje po jednym přiwisniku za Herthu BSC, FC Energiju Choćebuz a FC Rudne horiny Aue. Mamy pak tež kopicu fanatikarjow, hołdowacych Dynamu Drježdźany.

Pod tymle hesłom startowachu w Němskich Pazlicach tež někotři wopytowarjo diskoteki Herbert 25./26. decembra. Hač do ranja w sedmich woni tam swjećachu a stejachu hižo w dźesaćich zaso při sportowym centrumje, zo bychu so druhi hodowny swjaty dźeń na pjećkilometrowsku čaru wokoło Němskopazličanskeho wulkeho hata podali.

Byrnjež njebjo chětro šěre było, je 260 wólnočasnych sportowčow a sportowcow 26. hodownika do Němskich Pazlic přišło. Mjez nimi bě samo sportowc na jednokolesu (Einrad) z Großröhrsdorfa. W cilu přijachu wšitcy wopismo za 16. wotběhanje hodowneje husycy a napoj hosćićela.

Sportowe towarstwo Natwar Němske Pazlicy so sponsoram ludosportoweho zarjadowanja wutrobnje dźakuje a přeje wšěm wšo najlěpše w nowym lěće.­

Jutry póndźelu su potom wšitcy na 12. wotběhanje jutrownych jejkow přeprošeni. Norbert Adler

Přihoty Budissy na druhu połseriju

wutora, 02. januara 2018 spisane wot:

Koparjo regionalneho ligista Budissy Budyšin maja w januarje wobšěrny přihotowanski program za druhu połseriju zmištrować. Hra 27. wulkeho róžka přećiwo FC Hornjej Łužicy Neugersdorf so jenož přewjedźe, wostanje-li kónc tydźenja bjez nachwatanskeje dypkoweje hry.

03.01.  prěnja treningowa jednotka 2018 Budyšin

10.01. – 14.01.   treningowe lěhwo  Sokolov (CZ)

13.01.  FSV Budissa Budyšin – VFC Plauen Sokolov

17.01.  19:00 FSV Budissa Budyšin – Radebeulski BC Budyšin

20.01.  11:00 FSV Budissa Budyšin – Jednota Kamjenc  Budyšin

27.01. 11:00 FSV Budissa Budyšin – FC HŁ Neugersdorf  Budyšin Kilian Hrjehor

Sport (29.12.17)

pjatk, 29. decembera 2017 spisane wot:

Na silwesterski běh

Sportowe towarstwo Čerwjeno-běli Budyšin 90 přewjedźe njedźelu, 31. hodownika, na Budyskej Młynkec łuce 51. silwesterski běh. Start za hłownej distancy 10,6 a 5,3 km je za 9.30 hodź. planowany, tón za krótšu čaru 2,5 km budźe dźesać mjeńšin pozdźišo.

Ludosportowy turněr blidotenisa

5. januara we 18 hodź. zetkaja so wólnočasni blidotenisća z Kulowa a wokolnych wsow na 1. ludosportowy blidotenisowy turněr po Nowym lěće, a to w małej Kulowskej sportowej hali. Organizatoraj stej TV Hózk/Kulow 1974 a wotrjad blidotenis Módro-běłych Kulow.

Zymski wrotowy festiwal

Kulowminatije a United Clubs for Kulow přeprošeja wšitkich koparjow z města a wsow na zymsku ediciju najwjetšeho wrotoweho festiwala kołowokoło Kulowa. 6. januara změja tam pjaty nakład zymskeho Kulow-cupa. Zakop we wjacezaměrowej hali je w 12 hodź. Přizjewjene su tele mustwa: Dołha garda, Zelena garda, Company of Kulow, Team Toplife, Gut Kickerz, Wjesni hłupacy, Söffner a Kulowminatije.

Halowy turněr TCM

Faworitso přesadźił

štwórtk, 28. decembera 2017 spisane wot:

Módro-běli Wojerecy – ST Coswig-Mišno 3:1 (18:25, 25:13, 25:20, 25:13)

ST 1896 Wulka Dubrawa – ST Coswig-Mišno 1:3 (20:25, 25:23, 23:25, 15:25)

ST 1896 Wulka Dubrawa – Módro-běli Wojerecy 1:3 (16:25, 21:25, 26:24, 13:25)

Volleyballisća Sportoweho towarstwa 1896 Wulka Dubrawa móžachu najebać dwě poražce w krajnym pokalnym kole z pozběhnjenej hłowu domjacu halu wopušćić. Před 50 zahorjenymi fanami, potajkim wjac hač na někotrych koparskich we wokrjesnej wyšej lize, móžachu hosćićeljo přećiwo wyšoklasowymaj zastupjerjomaj stajnje jednu sadźbu dobyć.

W prěnjej hrě dnja přewiny faworit Módro-běli Wojerecy (sakska liga) Sportowe towarstwo Coswig-Mišno (sakska klasa) z 3:1 po sadźbach. Překwapjace wšak bě, zo Wojerowčenjo prěnju sadźbu z 20:25 přěhrachu. Tři dalše přechody pak z wobhladanjahódnymi nadběhami dobychu. Wulkodubrawčenjo so hosćom z Mišna chětro wobarachu, tak zo traješe hra 85 mjeńšin. W druhej sadźbje poradźi so jim samo wuspěch 25:23.

Wšitke tři hry běchu wabjenje za volleyball, wšako maja tež we Wulkej Dubrawje wulke ćeže z dorostom.

Heinz Noack

Šulerki a šulerjo 10. lětnika šule „Michał Hórnik“ Worklecy su do hodownych prózdnin w tamnišej sportowni prěni volleyballowy turněr mjez serbskimaj­ wyšimaj šulomaj z Worklec a Ralbic dobyli. Na dalšimaj městnomaj sćěhowaštej mustwje 9. lětnika z Ralbic a 9. lětnika z Worklec.

Na mjezyšulskim volleyballowym turněrje bě so šěsć volleyballowych cyłkow wobdźěliło. Nimo třoch mjenowanych běchu to hišće Ralbičanski 10. lětnik kaž tež Worklečanske a Ralbičanke holcy 9. a 10. lětnika. Ralbičanscy šulerjo so za přeprošenje z Worklec tule hišće raz wutrobnje dźakuja. Sportowaj wučerjej, knjeni Diana Šołćina a knjez Křesćan Bejmak, běštaj turněr iniciěrowałoj.

Pawk nócny wolejbul wotměł

srjeda, 27. decembera 2017 spisane wot:
Wolejbulowy team Kamehameha je nócny wolejbulowy turněr Pawka dobył. W finalu přewiny wón lońšeho dobyćerja­ Dwójna nula II.

Hižo wosmy raz je Serbske młodźinske towarstwo Pawk dohodowny nócny wolejbul w Pančičanskej sportowni wotměło. Dwanaće mustwow bě so přizjewiło, zo bychu hač do pózdnjeje nocy wo dobyće wojowali. Nimo wjesnych młodźinskich a sportowych cyłkow su tež lětsa zaso studenća z Lipska a Drježdźan pódla byli. W direktnym duelu móžachu so studenća Sorabije přećiwo skupinje Bjarnat Krawc z 19:17 snadnje přesadźić.

Wupisanje za 36. sokołski volleyballowy turněr

srjeda, 27. decembera 2017 spisane wot:

termin turněra: 10. měrca 2018

městnosć: sportowa hala

  na Budyskim Třělnišću

čas: 8 do 16 hodź.

zarjadowar: Serbski Sokoł z.t.

wuhotowar: Sokoł Budyšin z.t.,

  Škit Budyšin,

  Mustwo 1296

kontaktna adresa:

zaměr turněra: Pod sokołskim hesłom „Sportej a narodej – zdar!“ chcemy so zetkać k lóštnemu sportowanju a wjesołej zabawje. Zdobom chcemy styki mjez serbskimi volleyballistkami a volleyballistami a dalšimi sportowčemi a sportowcami skrućić a k popularizowanju Serbskeho Sokoła přinošować.

přeprošene mustwa: Na turněr witane su mustwa dotalnych turněrow a nowačcy. Volleyballowe cyłki z wukraja njejsu přeprošene. Kóždy volleyballist, kotryž so do jednoho mustwa zarjaduje, njech so w swójbje sportowčow/sportowcow derje čuje.

Serbska debata

nowostki LND