ST Wóslink/Skaskow

– ST Marijina hwězda 1:2 (1:2)

Zestawa hosći: O. Schmidt – Wróbl, Łušćanski, T. Jurš, Lipič, Peschmann, Pakoßnick (76. Langer), Bělk, P. Schmidt (36. Njek), Winkler, D. Jurš

Při krasnym nalětnim wjedrje podachu so koparjo prěnjeho mustwa Marijineje hwězdy do Skaskowa. Tam chcychu předposlednjeho tabulki z hrajerskimi srědkami přewinyć. To pak so njeporadźi, dokelž běše trawnik-łuka w chětro špatnym stawje. Nimo toho njepokazachu swoje běhanske zamóžnosće. Domjacy agěrowachu z dołhimi třělwami, kotrež docpěchu zwjetša agilneho Tamku. W 16. min. zjewi so wón nadobo sam před wrotarjom Schmidtom, tón pak bul wotwobara. 0:1 nasta we 18. min. Dawid Jurš bě po přihrawce Wróbla dospołnje swobodny. W druhim pospyće wothra wón kulowatu kožu Pakoßnickej, a tón posłuži Winklera, kiž z 12 metrow lesćiwje do dołheho kuta přetwori. Krótko po tym prasny Winklerowa třělwa jenož do łaty. Sydom mjeńšin do połčasa poradźichu so Pakoßnickej druhe wrota. Wón wotpopadny wotkop Olivera Schmidta, wuhra třoch přećiwnikow a smokny bul do wrotow. Hnydom po zakopje pak hosćićeljo přez Tamku na 1:2 (39.) skrótšichu.