Wuslědki (15.05.17)
Krajna koparska klasa
Nowe Město – Laubegast 2:3 (1:0)
Radebeul – Chrósćicy 1:1 (0:0)
Weixdorf – Trjebin3:0 (1:0)
1. Radebeulski BC 21 50 : 17 53
2. Laubegast 21 59 : 28 45
3. Čerwj.-běli Mužakow 21 49 : 29 45
4. FC Neugersdorf II 20 51 : 26 34
5. FSV Nowosólc-Hródk 21 45 : 37 33
6. SJ Chrósćicy 22 34 : 36 29
7. LSV Nowe Město 20 38 : 37 28
8. SZ Horni kraj-Sprjewja 21 46 : 51 27
9. SG Weixdorf 21 37 : 46 26
10. Drježdźanski SC 21 34 : 43 25
11. ST Trjebin 22 32 : 60 20
12. Zschachwitz 21 41 : 64 19
13. Biskopičanske KT II 20 16 : 58 0
wokrjesna wyša liga
Ćisk – Rakecy5:2 (2:0)
Ralbicy/Hórki – Wjelećin 7:1 (3:0)
Kinspork/Łužnica – Kulow 1:3 (1:1)
1. ST Ćisk 26 92 : 20 64
2. Sokoł Ralbicy/Hórki 26 70 : 32 52
3. Rakečanske ST 26 68 : 46 51
4. ST Hnašecy-Dobruša 26 55 : 42 48
5. LSV Hory 26 60 : 45 38
6. SC Großröhrsdorf 26 37 : 33 38
7. Póst Germ. Budyšin 26 45 : 53 34
8. Motor Kumwałd 26 47 : 61 34
Sport (12.05.17)
Němske mišterstwa lochkoatletiki
Město Budyšin je jutře, 13. meje, hosćićel Němskich mišterstwow lochkoatletiki na čaromaj 10 000 metrow (žony, mužojo, dorost U 20, seniorojo) a 5 000 metrow (holcy U 20). Z cyłeje Němskeje wočakuja w Budyšinje najlěpšich běharjow. Nimo krajnych mišterstwow chcedźa so načolni sportowcy za europske a swětowe mišterstwa kwalifikować. Zarjadowar je Němski lochkoatletiski zwjazk a wuhotowar Sakski lochkoatletiski zwjazk. Němske mišterstwa na městnje wuhotuje Wuchodosakski lochkoatletiski zwjazk. Wubědźowanja budu wot 13.30 do 22 hodź.
Hwězdźički před cilowej liniju
Druhe a třeće volleyballowe mustwo Marijinych hwězdźičkow zakónči zajutřišim, njedźelu hrajnu dobu 2016/2017 z třomi hrami, a to w sportowej hali Wojerowskeho Focaultoweho gymnazija. Dźeń započnje so w 10 hodź. z hru Wojerecy II – Pančicy III, přizamknjetej so w 11 hodź. partiji Pančicy II – Pančicy III a Pančicy II – Wojerecy II.
Dalši koparski camp
Načolne zetkanje
Traktor Malešecy
– ST Horni kraj Sprjewja II 2:1 (1:1)
Zestawa domjacych: Riedesel – C. Meier, Swakon, Günther, Stewig, Benad (79. Seiler), Steffek, Koksch, Unger (40. L. Meier), Hoferichter, Bolz
W kónčnej fazy sezony 2016/2017 stejitej mustwje we wokrjesnej koparskej lize, stafli I na čole tabulki. Wot zakopa postajowaše Traktor tempo na trawniku, ale bjez wulkich móžnosćow. Hosćo móžachu swoju klětku derje zakitować a spytachu ze spěšnymi konterami sami wrota třělić. Tajku składnosć wuži Herrmann k njenadźitemu 0:1 (31.). Dwě mjeńšinje pozdźišo pak Jan Hoferichter po róžku wuruna. Ze sprawnym mjezywuslědkom skónči so prěni połčas.
Po přestawce dyrbješe najprjedy domjacy wrotar paradu pokazać, zo njeby k dalšemu zastatkej dóšło. Marco Benad staraše so wo strašne situacije, ale přećiwnik jeho často z njefairnymi dwubojemi zadźerža. Lukas Meier přetwori direktnje do delnjeho kuta k 2:1 w 63. min. Tón předskok zakitowachu Malešenjo z prócu a klewernosću hač do wothwizdanja. Kurt Lorenc
Rjany wuspěch žnjeli
ST Arnsdorf
– SJ Njebjelčicy 1:2 (1:1)
Zestawa hosći: Ričel – Zeller, Haška, Pawlik, Hrjehor, Hanuza, Korjeńk (90. Hahn), Hommel, Šołta, Janca (82. Čornak), Lejnart
Rjane to dobyće, kotrež móhło hišće wyše wupadnyć. Scyła běše to hakle prěni połny wuspěch Njebjelčanskich koparjow w Arnsdorfje. Woni mějachu partiju pod kontrolu, ale po hratych 18 mjeńšinach nawjedowachu nadobo domjacy. Na lěwej stronje přesadźi so jich nadběhowar a wottřěli hnydom tak, zo tež wrotar Daniel Ričel zastatkej 0:1 zadźěwać njezamó. Chowancy trenarskeje dwójki Detlef Panic/Handrij Krawčik pak dale wo kóždy bul wojowachu. Bjez hektiki woni nadběhowachu. Po róžku Roberta Lejnarta zhłójčkowa Pawl Hrjehor bul wrotarjej do rukow (24.), na to zwrěšći Lejnart dwójce za sobu tohorunja na wrotarju (35.). Skónčnje, w 43. min., hosćo wurunachu. Dołhu přihrawku přiwzawši bě Jakub Šołta bul z połneho běha diagonalnje do domjaceje klětki trjechił.
Po porjadnej hrě znowa bjez dypka
FSV Budissa Budyšin
– FC Schönberg 1:3 (0:1)
Zestawa domjacych: Große – Heppner, Hausdorf, Iliadis (79. Baudis), Kolan, Hoßmang, Rosendo (46. Žuljević), Kloß, Müller (46. Němec), Barth, Herrmann
Torsten Gütschow, trenar Budissy Budyšin, chcyše hru přećiwo FC Schönbergej wězo dobyć. Bohužel pak dyrbješe so wosom koparjow wzdać. Přećiwnik, kotryž so po sezonje z regionalneje ligi wróćo sćehnje, pokaza angažowanu partiju. Hižo zahe wón přez wrota Masamija Okady z 1:0 (6.) nawjedowaše. Po tym měješe Budissa někotre dobre móžnosće. Třělwa Ezequiela Horacija Rosenda pak prasny do žerdźe. Dalše wrota hosći sudnik nimohry dla njepřipózna. Wuběrnu šansu k wurunanju spřihotowa Max Herrmann za Daniela Bartha, tón pak zwrěšći z krótkeje distancy na wrotarju.
Kontrahent runohódny był
ST 1922 Radwor
– ST Lubuš 3:1 (2:0)
Zestawa domjacych: Šěrak – Henka, Zähr, Omran, von Karwin, Nuk, Winar, Mark (59. Buša), Wjeńka, Kurjat (85. Hančik), Schulze (22. Bejmak)
Radworscy koparjo wočakowachu njedźelu sylne mustwo z Lubuša. Hižo prěni nadběh bě po přećach domjacych. Daniel Nuk pósła Franca Winarja z rjanej přihrawku na puć. Swobodnje před wrotarjom so jewjo Winar wěsće k 1:0 přetwori (3.). Hosćo z Lubuša, kotřiž běchu swoju wuběrnu formu w druhej hrajnej dobje přeco zaso wobkrućili, mějachu w prěnim połčasu samo wjacore dobre móžnosće. Te pak móžeše Chrystof Šěrak hromadźe ze zadnim mustwom zmištrować. W 37. min. mějachu domjacy zbožo, zo sudnik na ominozny dypk njepokaza. Nadběhowar hosći dósta w šěsnatce wěsty „impuls“ wotzady. Slědowacy nadběh Radworčanow přinjese zwyšenje mjezywuslědka na 2:0 (39.). Matej Wjeńka zakónči krasnu přihrawku Křesćana Bejmaka.
Młodźi běharjo w crossu wuspěšni
Při přijomnym wjedrje wotměchu so kónc apryla za šulerjow a šulerki wokrjesa Budyšin crossowe běhi. Bohužel bě wobdźělenje zakładnych šulow w Budyskim Humboldtowym haju snadne. Najwjetši dźěl běharjow a běharkow startowaše za Montessorisku šulu Budyšin, za Zakładnu šulu Wjelećin a za Budysku Serbsku zakładnu šulu.
Młodźi crossowi běharjo njedachu so wottrašić a absolwowachu čaru z połnej paru. Najmłódši sportowc Serbskeje zakładneje šule Budyšin William Jochmann doby w starobnej klasy M7 (650m) złotu medalju. Trójny wuspěch swjećachu holcy w starobnej klasy W8 (950m). Złoto wubědźi sej Jitka Schade, slěbro Luisa Neterec a bronzu Julia Lehmannec. Tohorunja trójny wuspěch poradźi so holcam w starobnej klasy W9 (950m). Tam přesadźi so Maja Lodni před Hannu a Hildu Woschickec. Dalše wuspěchi: 1. městno Georg Kochan (M9), 3. městno Sebastian Rentsch (M10), 1. městno Cora Dutschmannec (W10) a 3. městno Vincent Reimann (M11).
Rododendrony za najlěpšich
Pastwina hora w Kamjencu je daloko znata za swoju nalětnju pychu. We wšěch barbach kćěje rododendron w meji a njewabi jenož k wuchodźowanju. Tudyše sportowe towarstwa a město Kamjenc su hižo dołho spóznali, zo sportowe wubědźowanje před tajkej rjanej kulisu mnohich přiwabja. Tuž přeprosychu minjenu njedźelu hižo 19. raz na swój kćenjowy běh. Zo pak njebychu jenož běharjo přišli, wotměwaja tam hišće wjace wurisanjow. Łužiske kolesowanje a hórski duatlon – potajkim kombinacija wobeju sportoweju družin – stej tohorunja hižo něšto lět kruty wobstatk tohole wubědźowanskeho dnja.
Lětsa prěnju poražku poćerpjeli
TSV Połčnica
– Sokoł Ralbicy/Hórki 1:0 (1:0)
Zestawa hosći: Ch. Gloxyn – Rawš, Zynda, Korjeńk, Lulak (55. Šěn), D. Gloxyn, S. Bjeńš, Wowčerk, B. Bjeńš, Kurjat (71. J. Bjeńš), Bejma
Zo so koparjo Sokoła Ralbicy/Hórki z Połčnicy bjez dypkow nawróća, z tym fachowcy zawěsće ličili njejsu. Znowa falowaše trenarjej Tomašej Henčlej kopica stajnych hrajerjow. Nimo toho bě trawnik jara špatny, a sudnik njeměješe swój najlěpši dźeń. Najwjetši problem pak bě, zo njemějachu Sokoljo před wrotami domjacych tónkróć trěbne zbožo. Při natwarje hry zhubichu woni njetrjebawši bul, a nadobo běžachu třo přećiwniscy hrajerjo na wrota. Fabian Korjeńk njezamó jich w tym wokomiku jako jenički defensiwny hrajer dodźeržeć a hižo steješe 1:0 za Połčnicu. Pomału so delanscy koparjo zhrabachu a přez křidle strašnje do šěsnatki flankowachu. Přeco pak běchu škitarjo hosćićela krok spěšniši a hdys a hdys jich wrotar derje wotwobara. Najčasćišo pak dźěchu pospyty pódla abo wyše wrotow.
Z wjeselom při wysokim saku
Składnostnje wobnowjenja a dotwara sportoweje hale we Worklecach přeprosychu sej pedagogojo tamnišeje šule „Michał Hórnik“ wučerjow dalšich serbskich kubłanišćow na zhromadny volleyballowy turněr.
Wučer Křesćan Bejmak wotewrě turněr serbskich pedagogow-volleyballistow 26. apryla w rjanej Worklečanskej sportowni. Štyri mustwa běchu přitomne, a kóžde hraješe přećiwo kóždemu dwě sadźbje hač do 15 dypkow. Po skoro dwuhodźinskim boju přesadźichu so wučerjo Budyskeho Serbskeho gymnazija, kotřiž běchu wšitke partije z 2:0 dobyli. Volleyballisća z Pančic-Kukowa, z Ralbic a z Worklec prezentowachu so na hrajnym polu jara wurunani. Wšitke duele při wysokim saku skónčichu so njerozsudnje 1:1. Dobyli su na kóncu wšitcy, dokelž mějachu, pohibujo so při wysokim saku, wjele wjesela. Turněrej přizamkny so lóštna zabawa při kołbasce a napoju. Dźak słuša Worklečanskej šuli „Michał Hórnik“, kotraž je poradźeny wječor wuhotowała a sponserowała. Měrko Korjeńk
