Tajki jusk knježił, kaž bychu dobyli
SJ Njebjelčicy
– ST Großnaundorf 2:2 (0:0)
Zestawa domjacych: Hahn – Zeller, Hommel, Pawlik (85. Janca), Kral, Haška, Šołta, Cyž, Hrjehor (46. Hoelzel), Čornak (60. Korjeńk), Lejnart
W poslednjej hrě lěta předstaji so, kaž wočakowane, w Njebjelčicach sylnje wustupowacy načolnik wokrjesneje koparskeje ligi stafle tři z Großnaundorfa. Z wulkej koncentraciju dachu so domjacy tuž do partije. Wulce wuhrate a strašne sceny přihladowarjo na žanej stronje w prěnim połčasu dožiwili njejsu, dokelž běštej wobaj cyłkaj na to wusměrjenej přećiwniskim wrotam zadźěwać.
Snadnje přěhrali
Změna na čole wobwodneje volleyballoweje ligi
JTVG Koblicy – Viktoria Worklecy 3:1 (24:26, 25:19, 25:17, 25:15)
Widźał, słyšał, napisał (21.11.16)
Pismikaj RB stejitej aktualnje za njepřestajnu debatu w koparskim swěće. Wšudźe so wo tym w němskich medijach rozprawja a tež na kromje serbskich sportnišćow so mócnje diskutuje. Kawsa RB Lipsk dźěli, kaž to tydźenja w nowinje LVZ čitach, přiwisnikow kopańcy kaž něhdy profet Mójzes Čerwjene morjo. Po kóncu tydźenja dóstanje tale tematika zawěsće přidatny pohon, dokelž je mustwo RB Lipsk po dobyću přećiwo Leverkusenej a po poražce Bayerow w Dortmundźe načolnistwo prěnjeje koparskeje zwjazkoweje ligi přewzało. Z tym do sezony zawěsće nichtó ličił njebě! Za někotrych woznamjenja to dotalny wjeršk dospołneho wutupjenja koparskeje kultury. Tamni widźa w tym skónčnje zaso šansu, zo bój wo němske mišterstwo na napjatosći dobywa.
Fakt je: W běhu jeno sydom lět poradźi so konstruktej RB Lipsk razantny postup z pjateje ligi na čoło tabulki prěnjeje koparskeje ligi. Prěni raz po 14 měsacach njesteja nětko Bayerojo na prěnim městnje, ale nowačk z Lipska.
Wuslědki (21.11.16)
Wokrjesna koparska liga, stafla III
Großröhrsdorf II – Wachau 0:2 (0:0)
Hermsdorf – Frankenthal 2:1 (2:1)
Liegau-Augustusbad – Arnsdorf 0:2 (0:1)
Němske Pazlicy – Drjewnica 3:1 (1:1)
Sepicy – Wóslink/Skaskow 1:0 (1:0)
Njebjelčicy – Großnaundorf 2:2 (0:0)
Marijina hwězda – Haselbachtal 1:2 (0:1)
1. SG Großnaundorf 13 46 : 15 30
2. TSV Wachau 13 44 : 19 29
3. Natw. Němske Pazlicy 13 35 : 16 29
4. SJ Njebjelčicy 13 22 : 15 24
5. SV Haselbachtal 13 27 : 16 22
6. Zeleno-běli Sepicy 13 35 : 27 20
7. SG Frankenthal 13 31 : 23 20
8. ST Marijina hwězda 13 22 : 20 18
9. Arnsdorfske KT 13 20 : 21 18
10. SC Großröhrsdorf II 13 25 : 28 15
11. SV Hermsdorf 13 18 : 34 13
12. SZ Wóslink/Skaskow 13 14 : 40 7
13. ST Drjewnica 13 10 : 45 6
14. Liegau-Augustusbad 13 15 : 45 5
Sport (18.11.16)
Volleyball w Pančicach
Klóšterske volleyballistki prěnjeho mustwa Marijineje hwězdy hraja sobotu dwójce doma w Pančicach. Wot 14 hodź. přećiwo cyłkej MSV Budyšin 04 a po tym přećiwo holcam SZ Kupoj Nowa Łuka.
Dźiwje micki w Ralbicach
Volleyballistki Viktorije Worklecy budu sobotu wot 14 hodź. hosćićelki, a to w Ralbicach. Tam wočakuja we wobwodnej klasy holcy MSV Budyšin II.
Serbski derby w Chróstawje
W Chróstawje wuhraja srjedu we wokrjesnej klasy serbski volleyballowy derby mjez cyłkom Sokoła Budyšin a mustwom Marijineje hwězdy. Započatk hrajneho dnja, na kotrymž hraje tež cyłk ST Chróstawa, budźe 19.45 hodź.
Přednošuje wo turje po Americe
Serbski krosnowar a kolesowar Ronny Liebal ze Smjerdźaceje přednošuje dźensa wječor w Rehnsdorfje w hosćencu „K lipje“ wo kolesowarskej turje po Južnej Americe. Přednošk započnje so 19 hodź.
Geyer dźensa w Budyšinje
Eduard Geyer, posledni trenar narodneho koparskeho mustwa NDR, je dźensa wječor hósć w Budyskim dźiwadle na hrodźe. Dwuhodźinski přednošk zahaji so w 19.30 hodź. Zastupne lisćiki předawaja při wječornej kasy.
Žana překwapjenka
SZ Großnaundorf
– ST Marijina hwězda 3:0 (2:0)
Zestawa hosći: O. Schmidt – Wróbl, Rab, T. Jurš, Lipič, Smoła, Hawš, Bělk, P. Schmidt (60. Vacek), D. Jurš (46. Pěčka), Pakoßnick
Partiju jasnje dominowali
ST Wóslink/Skaskow
– SJ Njebjelčicy 0:2 (0:1)
Zestawa hosći: Hahn – Zeller, Hommel, Pawlik, Šołta (79. Janca), Kral, Haška, Cyž, Hrjehor (71. Čornak), Hoelzel (46. Korjeńk), Lejnart
Na trawniku w Skaskowje dominowachu chowancy trenarskeje dwójki Detlef Panic/Handrij Krawčik partiju wot wšeho spočatka. W pjatej mjeńšinje přesadźi so Robert Lejnart derje, trjechi pak jenož žerdź. Wotskočeny bul sadźi tež Leopold Hoelzel nimo klětki. Dźesać mjeńšin po tym přeběža Jakub Šołta hač do šěsnatki přećiwnika a smokny kulojtu kožu k 0:1 do syće. Dalše derje wuhrate nadběhi sćěhowachu, nažel pak bjez dalšich wrotow. Wužiće dobrych šansow w tutym hrajnym lěće wostanje dale problem w rjadach Njebjelčanow.
W druhim wotrězku bě hrajna situacija podobna. We 58. min. pak so Lejnartej poradźi z wysokej třělwu ze zdalenosće bul w hornim třiróžku k 0:2 zaměstnić. Njebjelčenjo wuwojowachu sej w naslědnym času někotre šansy, ale wrota nochcychu žane padnyć.
Nětko wočakuja Njebjelčenjo w poslednjej hrě prěnjeje serije doma načolnika tabulki z Großnaundorfa. To budźe wulke wužadanje za młody cyłk.
Volleyballisća Marijineje hwězdy derje započeli, słabje skónčili
Po sylnej hrajnej dobje 2015/2016 ze staflowym dobyćom a kónčnym štwórtym městnom we wokrjesu witachu volleyballisća ST Marijina hwězda kónc oktobra mustwje MSV Budyšin IV a ST Sokolnik Wjazońca w swójskej hali. W kadrje nichtó wulce njepobrachowaše, tuž běše nadźija na dobyći wulka.
ST Marijina hwězda – MSV Budyšin IV 2:0 (25:14; 25:20)
Prěnja sadźba započa so furioznje. Domjacy njemějachu žane zmylki w hrajnym natwarje, přistajerjej Benedikt Smoła a Pedro Libš swojich nadběhowarjow derje posłužowaštaj. Tak so jedyn bul po druhim do saka Budyšanow smokny. Chětro zahe steješe 9:2 za Marijinu hwězdu. Dodać pak so dyrbi, zo bě kontrahent słaby, tak zo měješe hižo při přijimowanju wulke ćeže. Tón abo tamny zmylk zworachu domjacy na to tež, sadźba pak so na kóncu jasnje z 25:14 na dobro serbskich hrajerjow skónči.
Faworita jasnje porazyli
Sokoł Ralbicy/Hórki II – ST Ćisk II 3:0 (1:0)
Zestawa domjacych: Cyž – Materna, Šnajder, Bogusz, Šołta, Młynk, Čórlich, Kobalc, Matka, M. Kurjat, G. Kurjat
Dokelž běše trawnik chětro hłuboki, hrajachu koparjo Sokoła II na twjerdym hrajnišću, štož wukopa so jako wulki plus. Faworit z Ćiska, kiž hraje dotal wuspěšnu sezonu, bě tuž hižo do zahwizdanja tróšku zludany, dokelž chcyše Ralbičanow na trawniku z kombinacijemi wuhrać. Wot prěnjeje do poslednjeje mjeńšiny pak mějachu Sokoljo wotežki w rukomaj. Přez bojowniske dwuboje a z tójšto dźěłom bjez bula hosćom hru natwarić dać njedachu. Nawopak spytaštej škit a srjedźne polo stajnje swojej nadběhowarjej – Kurjatec bratraj namakać. Wonaj dźeržeštaj stajnje zaso bule kruće a postaraštaj so wo njeměr w přećiwniskej šěsnatce. Jedyn z tajkich bulow docpě po dźesać mjeńšinach Gabriela Kurjata, kiž z distancy zymnokrejnje k nawjedowanju přetwori. Hosćo njenamakachu dale swoju hrajnu nitku a Ralbičenjo wěsće stejachu.
