Předawaja lisćiki

wutora, 29. měrca 2016 spisane wot:
Budyšin. Zastupne lisćiki za lětuše dźiwadłowe lěćo Němsko-Serbskeho ludoweho dźiwadła započnu sobotu, 2. apryla, w 11 hodź. předawać. Wot 3. apryla poskića potom lisćiki tohorunja internetnje. Lětsa pokazaja na dworje Budyskeho hrodu inscenaciju wo Olsenowej cwólbje. Premjera budźe 9. junija.

Do zwěrjenca

štwórtk, 24. měrca 2016 spisane wot:
Jutře wjeseli so jutrowny zajac „Baba“ we Wojerowskim zwěrjencu na pućowanje. Kaž kóžde lěto su dźěći ćichi pjatk wot 10 do 14 hodź. na dundanje a wěcywustojne wodźenje po coologiskej zahrodźe witane. Foto: Stefanie Jürß

Korbiki plesć

štwórtk, 24. měrca 2016 spisane wot:
Nimo debjenja jutrownych jejkow jutře a jutrowničku wot 13 do 17 hodź. móža dźěći na Rěčičanskim Erlichtec dworje jutře wot 10 hodź. zajacej pomhać, jutrowne korbiki plesć. Foto: Marion Girth

Z jutrownej paru

štwórtk, 24. měrca 2016 spisane wot:
Jutře, ćichi pjatk, zahaja sezonu Mužakowskeje lěsneje železnicy. Z jutrownej paru móža so pućowacy z Běłeje Wody do Mužakowa z ćahom po kolijach ko­lebać dać. Prěni do Kromolanskeho parka wot­jědźe w 10.15 hodź. Foto: J. Rjela

Lětni čas zahaji so lětsa w jutrownej nocy, dokelž su jutry posledni kónc tydźenja w měrcu. Jutrowničku rano w dwěmaj přestaji so čas wo hodźinu do­- prědka na třoch. Štóž doma škričkowy časnik nima, w kotrymž impuls korekturu nastorči, njech na to njezabudźe. Lětni čas skónči so w nocy wot 29. na 30. oktober. Foto: SN/Maćij Bulank

Olaf Wirths je tele dny za swój projekt LaBieratorium w Choćebuzu wabił. Na Karla Liebknechtowej ma nastać piwarnja, kotraž wěnuje so předewšěm eksperimentowanju při warjenju piwa. Hižo nětkole wari Wirths wjacore družiny sylneho piwa, z kotrymiž chce zajimcow přeswědčić za projekt pjenjezy přewostajić. Wšako chce wón w swójskej Choćebuskej piwarni piwo warić. Nastać­ ma tam zetkawanišćo za wuměłske a kulturne zarjadowanja, hdźež samowarjene piwo poskićeja. Foto: Michael Helbig

Lipsk (SN). We wobłuku Lipšćanskich knižnych wikow so tele dny tež serbscy awtorojo prezentuja. Ze swojeho němskorěčneho powědančka za dźěći „Abessinka, wo bist du?“, kotraž wuńdźe w nakładnistwje Lychatz, čita Jurij Koch jutře, štwórtk, w 16 hodź. w „Lesebude 2“. Zetkanje­ z awtorom je premjera „detektiwki“, kotruž je Thomas Leibe ilustrował.

Beno Budar a Benedikt Dyrlich staj sobu zastupjenaj w nowej antologiji „Das andere Dresden“. Knihu předstaja jutře, štwórtk, w 10 hodź. w hali 4, stejnišćo E505. Moderaciju změje Benedikt Dyrlich. Samsny dźeń na samsnym městnje spřistupnja zajimcam w 11 hodź. literaturu serbskich awtorow a jich přećelow w časopisu „Bawülon“. Zastupjeni w antologiji „Brücken im Zugwind“ su mjez druhim Milan Hrabal, Tomasz Nawka, Marion Kwicojc, Karl Vouk, Dietrich Šołta a dalši. Na zarjadowanje přeprošatej nakładnistwo­ POP a Zwjazk serbskich wuměłcow.

Na hornčerske wiki

srjeda, 16. měrca 2016 spisane wot:
Rěčicy. Nalětnju wustajeńcu a hornčerske wiki změja kónc tydźenja na Rěčičanskim Erlichtec dworje. W tamnišej dźiwadłowej bróžni pokaza floristka Ute Mühle sobotu, 19. měrca, swoje kreatiwne nalětnje wudźěłki. Nazajtra zetkaja so tam hornčerjo zbliska a zdaloka, zo bychu mjez starožitnymi kładźitymi domami swoje keramiske twory prezentowali. Wo hudźbne wobrubjenje 18. hornčerskich wikow na tymle městnje postara so Drježdźanska kapała TAM TAM. Wiki traja wot 10 do 17 hodź. Organizatorojo nadźijeja so bohateho wopyta.

Kaž tydźenja we Wojerowskej Łužiskej hali móža lubowarjo debjenych jutrownych jejkow tež tónle kónc tydźenja na mnohich městnach ludowym wuměłcam při pisanjenju owalnych drohoćinkow přihladować. Mjez druhim debja je jutře wot 13 hodź. w Budyskim Serbskim muzeju. Tohorunja wobdźiwać móžeće filigrane wuměłstwo jutře na 19. Slepjanskich jutrownych wikach kaž tež póńdźelu, 14. měrca, wot 11 do 16 hodź. w Budyskej Serbskej kulturnej informaciji. Foto: Manfred Laduš

Z wječornikom do cirkusa

wutora, 08. měrca 2016 spisane wot:

Malešecy (SN/MWj). „Rewolucija manežoweho wuměłstwa“ rěka program, z kotrymž přijědźe cirkus William z Mün­cheberga, městačka wuchodnje Berlina, přichodne dny do Malešec. Na tamni­šim sportnišću při Hućinjanskej dróze natwarja swój wulki cirkusowy stan a w nim­ wot štwórtka hač do njedźele wjacore razy swoje pokazki prezentuja.

Cirkus „William“ zjednoća moderne kaž tež tradicionalne dźěle cirkusoweho wuměłstwa a kombinuje dresury zwě­rjatow z naročnymi artistiskimi poskićenjemi. Tak dožiwja wopytowarjo kumšty dźesać swětłych kamelow runje tak kaž swětłych a ćmowych konjow. Jedyn z wjerškow zwěrjećich pokazkow budźe prezentacija wulkich kóčkow, w kotrejž budu lawy a tigry zhromadnje w maneži widźeć. Ale tež artistisce ma cirkus „William“ někotre wosebitostki w programje, kotrež su samo jónkrótne w Němskej. Tak prezentuje Deniro Wille postoj na rukomaj (Handstand), a to na powjazu. Dale změja w programje smjertne koło, westernsku show a wězo klawna. Mjez wuhotowarjemi programa su tohorunja čěscy artisća.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND