Jenož hišće štyri dypki předskoka

wutora, 07. apryla 2015
artikl hódnoćić
(0 )
Stefan Höer (Budyšin, třeći wotlěwa) je w hrajnej scenje na wobrazu najwyše skočił a bul na wrota přećiwnika zhłójčkował. Na wro towej liniji pak jón škitar z hłowu wotwobara. Foto: Torsten Zettl Stefan Höer (Budyšin, třeći wotlěwa) je w hrajnej scenje na wobrazu najwyše skočił a bul na wrota přećiwnika zhłójčkował. Na wro towej liniji pak jón škitar z hłowu wotwobara. Foto: Torsten Zettl

ZFC Meuselwitz – FSV Budissa Budyšin 1:0 (1:0)

Zestawa hosći: Jakubov – Kolan, Patka, Vrabec (42. Schikora), Salewski, Klotke (76. Höer), Hoßmang, Kotyza (72. Kral), Reher, Walther, Rosendo

Jutrownu póndźelu nachwatachu koparjo Budissy Budyšin dypkowu hru pola poslednjeho regionalneje ligi Meusel­witza. Z dobyćom móhli sej woni w tabulce předskok dźesać dypkow nadźěłać. Při njerozsudnym wuslědku by při sydom dypkach wostało, chcychu tuž znajmjeńša remis. 684 přihladowarjow, mjez nimi přiwisnicy Budissy Budyšin, mustwje podpěrowaše.

Hosćo mějachu w spočatnej fazy dwě dobrej móžnosći přez Patku (4.) a Wal­thera (10.), wobě pak njewužichu. Běchu dale a njedokładniši. Po foulu Salewskeho na přećiwniskim hrajerju w šěsnatce Budissy postaji sudnik jědnatku, kotruž Luck wěsće přetwori (27.). Hišće do połčasa móhł Vrabec z hłójčku wurunać, wrotar pak wuběrnje reagowaše. Na tamnym boku wotwobara Jakubov dalšu móžnosć domjacych (45.).

Po přestawce so Budissa polěpšowaše. W 73. min. nadźěła sej Salewski prima móžnosć a hłójčkowany bul Hoßmanga bu wot linije kopnjeny (82.). Nětko hra­ješe hósć jenož hišće doprědka. Patka sadźi­ hłójčkowany bul snadnje nimo wrotow (85.) a třělwa Rosenda krótko do kón­ca (90.) dźěše do mróčelow. Zwosta tuž při bolostnym 0:1.

Budyscy ko­parjo dyrbja so dale stopnjować, zo bychu trěbne dypki za zachowanje klasy na konće měli. Po poražce w Meuselwitzu maja woni město dźesać abo sydom nětko jenož hišće štyri dypki předskoka na wčerawšeho přećiwnika. Njedźelu w Nordhausenje njebudźe lóšo.


Clemens Werner

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND