Serbski gymnazij Budyšin sněhakowanske lěhwo w Čěskej přewjedł

štwórtk, 09. apryla 2015
artikl hódnoćić
(0 )

Prěni raz w stawiznach Serbskeho gymnazija Budyšin (SGB) wukmanichu so w sněhakowanskim lěhwje w čěskich Jánskich Láznjach tři holcy a pjećo hólcy­ 8. lětnika w sportowej družinje snowboard. Kurs přewza wučerka SGB za čěšćinu Jana Štillerová, jedna ze šěsć wukubłarjow w Kyrkonošach.

Do małeho města blisko Čorneje hory dojědźechu sej hišće dalšich 56 šulerjow, sportowaj wučerjej Gabriela Jendrew­scy­na a Měrko Korjeńk, wučer za wu­měłske kubłanje Hagen Kambach a student wučerstwa Damian Bogusz. Tež lětsa bě pen­sija „Protěž“ kwartěr Budyskich gym­na­ziastow. Dalša nowosć bě wukubłanje našich młodostnych na pisće Duncan blisko města Svoboda nad Úpou. Čěskaj wu­čerjej Iva a Roman kaž tež hižo mjenowany student běchu zamołwići za techniske nawuknjenje wot­jězda pola 23 započatkarjow. Woni mějachu wjele wje­sela při zymskim sporće. Po stajnje pjeć­hodźinskim zwučowanju přizamkny so wječor wuhódnoćenje z pomocu wideja. Mnozy šulerjo so prěni raz sami widźa­chu a spóznachu, što hižo zamóža a što nic. Wjeršk sněhakowanskeho lěhwa bě znowa wubědźowanje w slalomowym bě­hu. Holču konkurencu dominowaše Luiza Šubertec z Kamjenca. Druhe městno wobsadźi Sofija Hejduškec z Noweho Łusča, třeće Anabelle Meh­nertec z Budyšina. Pola hólcow přesadźi so Johannes Jatzwauk z Chelna přećiwo Francej Matješkej z Hórkow a Oskarej Krü­ge­rej z Berlina. Tež srjedźna skupina, započatkarjo a snowboarderojo su swojich najlěpšich slalomowcow zwěsćili.

Na kóncu wuprajichu wučerjo wšitkim wulki kompliment za angažement na a zwonka pistow Čorneje hory. Rjane zymske dožiwjenje w Jánskich Láznjach wostanje młodostnym SGB zawěsće dołho w pomjatku.
Měrko Korjeńk

Wuslědki slalomoweho běha

3. skupina

holcy: 1. Luiza Šubertec (40,90 sek.), 2. Sofija Hejduškec (41,81 sek.), 3. Anabelle Mehnertec (42,13 sek.)

hólcy: 1. Johannes Jatzwauk (39,81 sek.), 2. Franc Matješk (40,20 sek.), 3. Oskar Krüger (40,66 sek.)

2. skupina

holcy: 1. Cecilija Neterec (43,69 sek.), 2. Emily Sauer (45,28 sek.), 3. Judith Pjetašec (45,34 sek.)

hólcy: 1. Richard Juros (43,59 sek.), 2. Edwin Schenk (46,55 sek.)

započatkarjo

holcy: 1. Luise Garbe (38,43 sek.), 2. Emily Schulze (39,26 sek.), 3. Julia Šnajderec (41,50 sek.)

hólcy: 1. Aleksander Wałda (36,77 sek.), 2. Lucas Pěčak (40,48 sek.), 3. Feliks Winar (41,42 sek.)

snowboard

holcy: 1. Judith Wićazec (1:42,45 min.), 2. Lynn Bormann (2:01,99 min.), 3. Emily Perez (2:05,88 min.)

hólcy: 1. Max Pfeifer (1:07,35 min.), 2. Chrystofer Wjenka (1:30,31 min.), 3. Lucas Spahn (1:31,09 min.)

wozjewjene w: Sport

Galerija

dalši wobraz (1) Při delnjej staciji štyrisydłoweho lifta cyle blisko pensije „Protěž“ zestupaštej so dwě z dohromady šěsć skupin lětušeho sněha kowanskeho lěhwa Budyskeho Serbskeho gymnazija k zhromadnemu fotu. Na lěwym wobrazu cyle naprawo steji nawo da lěhwa, sportowy wučer SGB Měrko Korjeńk. Foto: Hagen Kambach
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND