Wšitko někak přespěšnje šło

srjeda, 15. apryla 2015
artikl hódnoćić
(0 )

Rakečanske ST

– Sokoł Ralbicy/Hórki II 4:1 (1:0)

Zestawa hosći: Měškank – Statnik, Woko, M. Matka, Šnajder, Młynk, Šěn, Róbl (82. Budar), Mět, J. Matka (72. T. Matka), Kobalc

Njedźelu nastupichu koparjo Sokoła Ralbicy/Hórki II pola susoda w Rakecach, kotryž steji na 4. městnje tabulki. Hižo w prěnich pjeć mjeńšinach dyrbješe Mě­š­kank dwójce zakročić, w 10. min. pak běše­ bjezmócny. Ralbičenjo wotwobarachu třělwu překrótko a Jakub Čornak smokny bul z 22 metrow do saka. Najwjetšu składnosć wurunać měješe Mět. Dołhi wólny kop połoži Jurij Matka prěki, ale Mět prasny kulowatu kožu z pjeć metrow wyše wrotow. Na tamnym boku wuchowa žerdź Měškanka.

Tež w druhim połčasu domjacy hru postajachu. Po jednej hodźinje wuchowa za Sokoł znowa žerdź. Pjeć mjeńšin po tym pak ležeše bul w saku. Spěšny nadběh přez lěwy bok bu dosrjedźa hraty a Reinecke přetwori. 3:0 trjechi Wichmann. Čestne wrota so Ralbičanam přez Měta tež hišće poradźichu. Někak dźěše wšitko přespěšnje za hosći. Znowa bu bul dosrjedźa hraty a wottam třěli jón Wichmann k 4:1 do saka.

Sokoł móže so jeno z tym tróštować, zo stej direktnej sobukontrahentaj z Kulowa a Wětnicy/Hole tohorunja přěhrałoj. K přichodnej hrě pak přijědźe načolnik z Łutow do Ralbic.
Maik Brězan

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND