Michał Nuk na dobyćerskim podesće

srjeda, 15. apryla 2015
artikl hódnoćić
(0 )

38. Biskopičanske běhi

na dlěše distancy

Tradicionalny, a to hižo 38. Biskopičanski běh na dlěše distancy wotmě so při poměrnje přijomnym wjedrje. Hosćićelske Biskopičanske sportowe towarstwo TV 1848 běše tež lětsa z cyłkownje 496 startowacymi běharkami a běharjemi jara spokojom. Najsylnišo zastupjena ze serbskich wobdźělnikow běše Krawcec swójba – staršej a dźěsći – z Budyšina, startowaca za Hrubjelčicy. Nan Jan Krawc běhaše na najdlěšej distancy 21,1 km (106 w cilu, z nich 23 žonow). Wón bu w sylnje wobsadźenej starobnej klasy (sk) dwanaty (1:47:14 hodź.). Cyłkownaj dobyćerjej w połmarathonje běštaj Nico Pietsch (1:16:35 hodź.) a Marina Helas (1:39:00 hodź.), wobaj z Drježdźan.

Na 10 km zawěsći sej Budyšan Silvio Schade w sk 45 w spěšnych 38:33 min. jasne dobyće. Cyłkownaj dobyćerjej na 10 km (175 w cilu, z nich 57 žónskich) běštaj Marco Friedrich z Budyšina (34:28 min.) a Eva Lamm z Pirny (39:48 min.)

Na 4,5 km (109 w cilu, z nich 56 žónskich) doby Budyšan Michał Nuk w sk 35 (17:07 min.) a wubědźi sej cyłkowne 5. městno. Na samsnej čarje wojowaštaj tež Krawcec młodostnaj, gymnaziastaj Budyskeho Serbskeho gymnazija, kotrajž wobsadźištaj w swojej sk 7. městno. Oskar Krawc pod 14 (21:43 min.) a Paula Krawcec pod 18 (28:06 min.). Jeju mać Anja bu w sk 40 z 28:09 min. pjatnata.

Na distancy 2,5 km (20 w cilu) wubědźi sej Budyski šuler Janoš Nuk cyłkowne 4. městno (9:37 min.).
Jurij Nuk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND