Doma přěhrali

štwórtk, 16. apryla 2015
artikl hódnoćić
(0 )

SJ Njebjelčicy

– SV Frankenthal 2:4 (1:1)

Zestawa domjacych: D. Ričel, Šołta, Pawlik,­ Hoier, Haška (78. C. Ričel) Ha­nuza, Kral, Cyž, Dubaw, Hrjehor, Janca (78. Čornak)

Njebjelčanscy koparjo chcychu w tutej domjacej hrě na kóždy pad dypkować. Hrajerjo z Frankenthala běchu jim hižo přeco njepřijomny kontrahent. Nětko skónči so partija znowa z poražku, a to ze samsnym wuslědkom kaž w hrě nazymu. Po někak wurunanej partiji a dwěmaj móžnosćomaj za Hanuzu a Dubawa hosćo w 36. min. nawjedowachu. Hłójčkowany bul skoči njezbožownje wot žerdźe­ do wrotow. Hišće do přestawki Worklečanski kapitam Chrystof Dubaw w 45. min. po rjanym soloběhu w druhim pospyće wuruna.

Hnydom po zasozahwizdanju wot­wo­bara Daniel Ričel wótru třělwu. Spěšny soloběh Hrjehorja přez prawu stronu žane dalše wrota za domjacych njewunjese. Wotfalšowany kop dyri do nutřkowneje žerdźe a wottam skoči zaso na hrajnišćo. Dalšej móžnosći Dubaw (58.) a Janca (68.) njewužištaj, a tak dwě mjeńšinje pozdźišo hosćo přez wótru nisku třělwu na 1:2 zwyšichu. W prawym wokomiku poradźi so hosćićelam znowa wurunać (72.). Rony­ Hanuza suny po přihotowanju Jancy­ bul přez liniju. Trěbna wěstota pak w Njebjelčanskich rjadach přiwšěm njezaćahny, a tak hosćo po mjeńšinomaj wospjet nawjedo­wachu. Dalši zmylk w škitnym pasmje domjacych zmóžni Frankenthalčanam, wuslědk samo na 2:4 zwyšić (77.).
Bjarnat Deleńk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND