Stare městno – nowe wójsko

štwórtk, 28. měrca 2024 spisane wot:

Bataljon za logistiku 471 změje w přichodźe „domiznu“ we Łužicy

Nadrózna Hrabowka (SN/MiP). We łužiskej holi, njedaloko produkciskich halow předewzaća TDDK w Nadróznej Hrabowce, běše wčera popołdnju njewšědnje wjele awtow na lěsnych pućikach po puću. Sylny wobchad „zawinił“ běše zwjazkowy minister za zakitowanje Boris Pistorius (SPD). Hromadźe z ministerskim prezidentom Sakskeje Michaelom Kretschmerom (CDU), je wón tu, na arealu něhdyšeje kaserny NLA, symbolisce natwar noweho stejnišća Zwjazkoweje wobory zahajił. Jeju přewodźachu dalši politikarjo z regiona, mjez nimi wjesnjanosta Njedźichowa Harry Habel (CDU), Wojerowski wyši měšćanosta Torsten Ruban-Zeh (SPD), Budyski krajny rada Udo Wićaz (CDU), serbski zapósłanc CDU w sakskim krajnym sejmje Alojs Mikławšk kaž tež w Baršću rodźena čłonka frakcije SPD w zwjazkowym sejmje Kathrin Michel.

Dalše nalěty w Libanonje

štwórtk, 28. měrca 2024 spisane wot:

Beirut (dpa/SN). Israelska armeja je znowa objekty w Libanonje nadběhowała. Při nalětach wojerskich lětadłow su po ­li­ba- nonskich informacijach znajmjeńša dźewjeć ludźi morili. Israelske wójsko zdźěla, zo su lětadła terorowe srjedźišćo zepěranišća libanonskeje milicy Hisbollah trjechili. Mjeztym so po diplomatiskich pućach dale prócuja, nowy termin za wopyt israelskeje delegacije we Washingtonje namakać, medije USA rozprawjeja.

Blinken přijědźe do Europy

Washington (dpa/SN). Wonkowny mi­nister USA Antony Blinken přijědźe přichodny tydźeń do Europy. Planowane je mjez druhim zetkanje z francoskim prezidentom Emmanuelom Macronom w Parisu, wonkowne ministerstwo zdźěla. Při tym póńdźe wo podpěru Ukrainje, wo Gazasku wójnu a wo druhe temy. Po tym pojědźe Blinken do Brüssela, zo by so na zetkanju wonkownych ministrow NATO k 75. róčnicy załoženja zakitowanskeho zwjazka 4. apryla wobdźělił.

Scholz: Bjez Wagenknecht

Ludźi ćerpja přestajenja dla

štwórtk, 28. měrca 2024 spisane wot:

Hamburg (dpa/SN). Nimale třećina ludźi w Němskej skorži w zwisku z přestajenjom časnikow na lětni čas strowotniskich problemow dla. To je wuslědk noweho naprašowanja instituta Forsa w nadawku chorobneje kasy DAK. Po tym 30 procentow ludźi w Němskej wosebje ćerpi, hdyž čas kóždolětnje wot zymsku na lětnju dobu přestaja. To je pjeć procentow wjace hač loni a najwyši staw ­minjenych dźesać lět. DAK zdźěla.

Žony su dwójce tak často potrjechene kaž mužojo. 74 procentow woprašanych ma přestajenje časa za njetrjebawše a by tole najradšo wotstroniło. 23 procentow ma prawidłowne přestajenje časa za zmysłapołne. W nocy na njedźelu w Němskeje časniki zaso wot 2 hodź. na 3 hodź. přestaja. Po tym knježi zaso lětni čas. Woprašeli su so tysac ludźi.

Biskop Koch za puć reformow

štwórtk, 28. měrca 2024 spisane wot:
Berlin (dpa/SN). Berlinski arcybiskop Heiner Koch je sej wěsty, zo njeje puć reformow w katolskej cyrkwi Němskeje najebać kritiku wohroženy. „Sym kruće přeswědčeny, zo njeje synodalny puć skónčeny“, rjekny Koch powěsćerni dpa. Sylniše zapřijeće lajkow je proces, kotryž bě bamž Francisku sam nastorčił, Koch rjekny. Swjaty wótc bě wěriwych pohonjał, sej wuměnić a cyrkej tak wukmanić, zo móhła wona swój nadawk – ewangelij do wšeho swěta njesć – tež spjelnić. Jednota cyrkwje njeje po słowach Kocha ­wohrožena. Při wšěm dyrbjeli němscy ­biskopja tutón swójski puć „w Romje ­lěpje hač dotal rozkłasć“.

Pytaja za přičinami njezboža

štwórtk, 28. měrca 2024 spisane wot:

Lipsk (dpa/SN). Po ćežkim busowym njezbožu ze štyrjomi mortwymi a wjace hač 30 zranjenymi na awtodróze pola Lipska steji prašenje za přičinami njezboža w srjedźišću. Dopóznaća lubja sej zamołwići z woprašowanja swědkow, štož pak móže hišće chwilku trać.

Dwuposchodowy bus bě wčera rano z jězdnje zjěł, po zelenej kromje smalił a so powalił. Policija rěčeše wo štyrjoch mortwych, šěsć ćežko zranjenych a 29 ­ludźoch ze snadnymi zranjenymi. Identifikowanje mortwych njebě wčera wječor hišće wotzamknjene. Šofer busa je wšě předpisane časy wotpočinka dodźeržał a sedźeše runje dwě hodźinje za wodźi­dłom. Wón njeje po dotalnych dopóznaćach mjez mortwymi.

Bus bě we 8 hodź. w Berlinje wotjěł, njezbožo sta so w 9.45 hodź. Bus bě z 50 pasažěrami po puću do Züricha. Po prěnich dopóznaćach njebě žane dalše jězdźidło na njezbožu wobdźělene. Awtodróha A9, wažny wobchadny zwisk mjez Berlinom a Mnichowom, bě po njezbožu dwanaće hodźin zawrjena.

Wo tójšto aktualnišo

štwórtk, 28. měrca 2024 spisane wot:
Słowa tehdyšeho předsydy Domowiny Jakuba Brankačka składnostnje ratifikacije sakskeho Serbskeho zakonja 31. měrca 1999 móžeš zawěsće wšelako interpretować. Wo hołej papjerje běše wón rěčał, hdyž so wo zwoprawdźenje a nałožowanje zakonja njeprócujemy a za to njezasadźujemy. Z wotstawkom 25 lět wopokaza so tale mysl skerje jako zažne warnowanje. Jakub Brankačk bě tehdy hižo to narěčał, štož nas dźensa trapi. To, štož jeho druhi naslědnik w zastojnstwje Dawid Statnik ze słowami „Móžnosće, kotrež nam zakoń skići, dyrbimy lěpje wužiwać.“ wopisuje. Warnowanje jednoho běše zažne, dopó­znaće tamneho je pózdne. Jubilej schwalenja a ratifikacije by hódna přiležnosć za dokładnu analyzu był. Kak wotbłyšćuja so jednotliwe wuprajenja zakonja we wšědnym žiwjenju našeho ludu, z kotrym wužitkom? Prezident krajneho sejma je w zwisku ze zakonjom serbske šulstwo naspomnił. Ale tam, zdawa so mi, su słowa Jakuba Brankačka dźensa bohužel wo tójšto aktualniše hač tehdy. Axel Arlt

To a tamne (28.03.24)

štwórtk, 28. měrca 2024 spisane wot:

Po dwanaće dnjach zaso namakali su psycu Famke, po tym zo bě wona z wulětniskeje łódźe do rěki Mosel skočiła. Wopytowarjo stanowanišća wuhladachu zwěrjo na kupje wosrjedź rěki. Wohnjowa wobora je Famke wuchowała. 15 lět stary cocker-spaniel je w poměrnje dobrym strowotnym stawje, zdawa so po dožiwjenju pak jara strachoćiwy być.

Agresiwnym wopicam so lěpje wobarać chcedźa w Thailandskej wotnětka z wosebitej policajskej jednotku. W prowincy Lop Buri maja wosebje wulku populaciju makakow. Zwěrjata ludźi přiběrajcy wobćežuja a wobkradnu. Dotalne pospyty, wopicy popadnyć, njejsu wočakowany wuspěch wunjesli. Nětko su zastojnikam katapulty sobu dali, z kotrymiž maja agresiwne zwěrjata disciplinować. Po najnowšim ličenju maja w potrjechenej prowincy wjace hač 5 700 makakow.

Scholz kontrole zakituje

srjeda, 27. měrca 2024 spisane wot:

Brdo (dpa/SN). Zwjazkowy kancler Olaf Scholz (SPD) je planowane pomjezne kontrole za čas europskeho koparskeho mišterstwa w Němskej w juniju a juliju zakitował. Zamołwići chcedźa wšitko činić, zo bychu wěstotu wobydlerjow zaručili, rjekny Scholz na wopyće w Słowjenskej. Do toho běchu w Berlinje nachwilne kontrole připowědźili, zo bychu potencielnych namócnych skućićelow na mjezach kraja zadźerželi.

Zelenskyj sekretara wuměnił

Kijew (dpa/SN). Po wjacorych personalnych změnach w nawodnistwje wójska je ukrainski prezident Wolodymyr Zelenskyj nětko tež sekretara Narodneje rady za wěstotu a zakitowanje, Oleksija Danilowa, pušćił. Danilowe zastojnstwje přewozmje dotalny nawoda wukrajneje tajneje słužby Olexander Lytwynenko. Zelenskyj je změnu w swojim wčerawšim widejowym poselstwje naspomnił, bjez toho zo by přičiny mjenował. Danilow přewozmje nowe nadawki, zdźělichu.

Farar AfD dla pušćeny

Po zražce kontejneroweje łódźe do mosta w Baltimore w USA pytaja tam dale za přičinami njezboža, kotrež je sej drje šěsć smjertnych woporow žadał. Łódź bě w nocy na wutoru do 2,5 kilometrow dołheho železneho mosta zjěła. Tón so zwjeze a wjacore awta do morja storhny. Natwar traje wjacore měsacy a płaći něhdźe 500 milionow dolarow. Foto: pa/AP/Steve Helber

Sakska: Žana změna wustawy

srjeda, 27. měrca 2024 spisane wot:
Drježdźany (SN/mb). CDU je dalši z koaliciskimaj partneromaj Zeleni a SPD dorěčany projekt cofnyła: změnu sakskeje wustawy (Serbske Nowiny rozprawjachu). Hłowny zaměr bě wjac direktneje demokratije w Sakskej a mjenje zadźěwkow ludowym wothłosowanjam. Tola štyri zapósłancy CDU su so tomu spjećowali. Tohodla njebudźe wotpowědny naćisk koalicije do kónca wólbneje periody lětsa nazymu na dnjowym porjedźe sakskeho krajneho sejma stać. Do toho je CDU hižo hotowy naćisk noweho zakonja wo zjawnych wupisanjach stata blokowała. Tež w koaliciji hižo dorěčany zakoń wo agrarnej strukturje, z kotrymž chcychu spekulaciju z polemi wotwobarać, su křesćanscy demokraća njejapcy cofnyli. Medije zjimaja situaciju tak: Koalicija je so na njepřezjednosć dojednała.

Serbska debata

nowostki LND