Wubranka štwórte městno wobsadźiła
Serbska koparska wubranka (SKW) je wčera na halowym koparskim turněrje w Kamjencu štwórte městno wobsadźiła. Za SKW, wo kotruž staraštaj so trenar André Strelow a mustwowy nawoda Bjarnat Deleńk, nastupichu wrotar Hubertus Čórlich (FSV Fortuna Pankow 46) a pólni hrajerjo Tom Henčl (SJ Chrósćicy) , Bosćij Cyž (SJ Chrósćicy), Fabian Korjeńk (Sokoł Ralbicy/Hórki), Fabian Bejma (Rakečanske KT), Simon Žur (SJ Chrósćicy), Robert Lejnart (SJ Njebjelčicy), Tomaš Bejma (Sokoł Ralbicy/Hórki) a Dirk Šołta (Wacker 09 Choćebuz-Strobice). Z Jonasom Krawčikom a Dennyjom Kralom (wobaj FC Hornja Łužica Neugersdorf), kaž tež Patrikom Wokom, Feliksom Hrjehorjom a Frankom Ričelom (wobaj Jednota Kamjenc) měješe Serbska koparska wubranka hišće dalšich akterow a trenarja na halowym parkeće w sportowej hali při Kamjenskim lětanišću. Nimo runje mjenowanych staraše so serbski koparski sudnik Matijas Kral ze Smjerdźaceje (Sokoł Ralbicy/Hórki) zhromadnje z kolegomaj-sudnikomaj wo nawod hrow. Zapósłanc krajneho sejma Alojs Mikławšk (CDU) bě patronat za turněr přewzał.
Widźał,słyšał, napisał (09.01.17)
Awtor dźensa
Jan Macka
Lubi sportowcy, wšitko w žiwjenju trjeba swój čas, zo by so wuwiło a zrawiło. W sporće je to zwjetša tak, zo wuspěch hakle po lětach, haj druhdy po lětdźesatkach žněješ.
Dwaj přikładaj k tomu. Štó drje by sej myslił, zo stanje so SJ Chrósćicy 1981 z.t., hdy z wokrjesnym mištrom w kopańcy? A to samo nětko we wulkowokrjesu Budyšin. Zawěsće nichtó? Tež pola zamołwitych Zapadołužiskeho koparskeho zwjazka nic. Tola strowy duch a koncentracija mocow našich hrajerjow a wjednistwa w zhromadnosći z čěskimi kaž tež němskimi sportowcami stej tónle wuspěch po 35 lětach spomóžneho dźěła zmóžniłoj.
Radworčenjo wuspěšni
Koparska młodźina A Radworskeho ST je sobotu w Kinsporku halowe wokrjesne mišterstwa dobyła. Tři hry su chowancy trenarja Inga Adama dobyli, jónu njerozsudnje hrali a jenož jónu přěhrali.
Dźeń pozdźišo wotmě so w Korzymju mjezykoło młodźiny F haloweho turněra Zapadołužiskeho koparskeho zwjazka. Sydom mustwow bě so za njón kwalifikowało: Rakečanske ST, Jednota Kamjenc, ST Bart 90, ST Ćisk 1993, LSV Hory, ST Radwor a Sokoł Ralbicy/Hórki. Kóždy přećiwo kóždemu hraješe jónu dźesać mjeńšin. Mustwje Kamjencskeje Jednoty a z Radworja docpěštej finalne koło, kotrež budźe 22. januara w Kamjencu.
Kónčne koło młodźiny A:
1. ST Radwor 10 dypkow
2. Rakečanske ST 8 dypkow
3. Póst Germania Budyšin 7 dypkow
4. HZ Ćisk/Běły Chołmc 6 dypkow
5. Biskopičanske KT 5 dypkow
6. Módro-běli Kulow 5 dypkow
Antonija Wjeselic
Marija Škodźina najspěšniša žona
Dwanatkarjo znowa najlěpši
Wo adwentnym volleyballowym turněrje na Serbskim gymnaziju Budyšin
Rjana tradicija na Budyskim Serbskim gymnaziju je, zo wubědźuja so šulerjo a wučerjo mjez sobu na wšelakich volleyballowych turněrach. W juniju 2017 změjemy na serbskim kubłanišću wosebity jubilej, hdyž nastupja dwanatkarjo 25. raz přećiwo swojim wučerjam při wysokim saku. Do hód přeprosy sportowy wučer Měrko Korjeńk štyri šulerske a jedne wučerske mustwo na adwentny volleyballowy turněr do sportoweje hale Serbskeho šulskeho a zetkawanskeho centruma. Dobyćer minjeneho lěta je so tež tónraz we wšitkich partijach přesadźił. Dwanatkarjo běchu na kóncu ći najlěpši, mějachu pak přećiwo 11. lětnikej po wuhraću poslednjeho dypka ze 17:16 tróšku zboža.
Sport (06.01.17)
Blidotenisowy wječor
Módro-běli z Kulowa přeprošeja wólnočasnych blidotenistow dźensa wječor na ludosportowy turněr do Kulowskeje małeje sportownje, a to we 18 hodź. Hry započnu so we 18.30 hodź.
Turněr wo pokal TCM
Towarstwo Cyrila a Metoda zarjaduje jutře, 7. janura, wot 14 hodź. w Chróšćanskej „Jednoće“ halowy koparski turněr wo pokal TCM. Přeprošene su wosadne a wjesne mustwa młodźiny kaž tež sportowych jednotkow.
W Čornym Halštrowje płuwać
Njedźelu, 8. januara, přewjedźe młodźina w Hózku nowolětne płuwanje Early blackbird, a to w Čornym Halštrowje. Za startowy pjenjez dweju eurow dóstanje płuwar/ka horcy napoj. Płuwanje je w 14 hodź. při wulkim spušćadle pola Hózka.
Sportowski start do lěta
Zajutřišim, njedźelu, přewjedu we Wojerecach 38. tradicionalny nowolětny běh, a to w sportowym forumje na Nišćanskej dróze. Poskića tam distancy na dwaj a šěsć kilometrow. Za pokalny běh 6 km zběraja organizatorojo startowy pjenjez třoch eurow, za 2 km nic.
Na S-mobil-cup
Přihotuja druhu połseriju
Z Enricom Krügerom, trenarjom prěnjeho koparskeho mustwa Wojerowskeho FC, je so w zymskej přestawce Werner Müller rozmołwjał. Cyłk hraje we wokrjesnej wyšej lize.
Sće z wuslědkami prěnjeje połserije spokojom?
E. Krüger: Zasadnje to sym. Ličba dypkow kaž tež zaměstnjenje w tabulce stej w porjadku. Jako postupnik stejimy nětko na jědnatym městnje z wrotowym poměrom 37:24. Běchmy přećiwnikam runohódni, štož za postupnika runjewon samozrozumliwe njeje. Z wjetšej koncentraciju pak by hišće wjac móžno było. Naš zaměr je klasu zachować. Z dotal pokazanymi wukonami smy na dobrym puću. Mamy pak potencial za wyše ligi.
Njejsće tuž cyle spokojom?
E. Krüger: Zmylki woraja koparjo w hrajnym natwarje a we wužiwanju šansow. Nimo toho su w někotrych hrach prěnje mjeńšiny zaspali.
Nadźijeće so, zo so to polěpši?
Budissa chce klasu dźeržeć
Z minusowym dypkom
Swójski turněr dobyli
Po hodźoch su wólnočasni koparjo Sportoweho towarstwa Rakecy halowy koparski turněr organizowali, a to w Radworskej „Slaviji“. Sydom mustwow pokaza fairne, ale tež bojowniske partije. A kóžde hraješe přećiwo kóždemu. Tež starša koparska garada so nětko zetka, zo by tohorunja něšto přećiwo přidatnym puntam z hodownych swjatych dnjow činiła. Hrajne sceny běchu wobhladanjahódne a wuslědki snadne. Wrotowy poměr je skónčnje nad turněrowym dobyćom za tradiciske mustwo Rakečanskeho ST rozsudźił. Z wjele prócu a zbožom poradźi so Enricej Angermannej w poslednjej mjeńšinje přećiwo FSV Šćeńcy 1956 ze zběhnjenym bulom 1:1.
Tež lětsa chcedźa zaso tak mjenowany solar-direktny halowy masters přewjesć. Su dźě na swoje wašnje znowa něšto za strowotu činili a runje tak za stare sportowe přećelstwa. Heinz Noack
Kónčny staw:
1. Rakečanske ST
2. FSV Šćeńca 1956
3. FC Wojerecy
4. SZ Bart 90
5. Stara garda Rakecy
6. Lok Wojerecy
7. Módro-běli Njeswačidło
