W minjenych dnjach je so wjele rěčało a pisało wo noworjadowanju směrnicow za spěchowanje sporta, předewšěm wukonoweho sporta w Němskej. Fakt je, zo je so podźěl wot němskich sportowcow dobytych medaljow na olympiskich hrach a swětowych mišterstwach w zašłosći pomjeńšił. Za wutworjenje lěpšich wuměnjenjow njejsu jenož lěpše treningowe móžnosće z wysoko kwalifikowanymi trenarjemi, ale předewšěm wjele wjac pjenjez trěbnych. Dźe mjez druhim tež wo to, kotre sportowe družiny lubja najwjace medaljow a kotre měli so najefektiwnišo spěchować. Zo njepóńdźe to bjez horceje diskusije a wótreje kritiki tych, kotřiž čuja so zludani, je jasne. Tola w zajimje zasadneho polěpšenja tuchwilneje situacije we wukonowym sporće budźe trjeba tworić jasne, byrnjež tež bolostne rozsudy.

Přezpólne kolesowanje

Wokoło Radworskeje bydlenskeje štwórće Młynske chěže zarjaduje Kolesowarske towarstwo Budyšin njedźelu, 30. oktobra, přezpólne jězdźenje z kolesami. Tež crossowe běhi změja tam zaso w poskitku. Wubědźowanja přewjedu wot 10 a 15 hodź.

Trenuja na Kaponicy

MC Jawora přewjedźe jutře na motocrossowej čarje Kaponica w Jaworje wot 9.30 hodź. treningowe lěhwo. Zwučować chcedźa tam wosebje techniku skakanja a techniku jězdźenja w křiwicach.

Saksojo přećiwo Prusam

Wutoru, 15. nowembra, wuhrajetej Pěskečanska a Sulšečanska młodźina koparski duel „Sakska přećiwo Pruskej“. Hrać budu w Pěskecach, a to wot 18.30 hodź. pod swětłomjetakami.

Kónctydźenska kopańca

29.10. 15:00 Kamjenc – Hohenstein-E.

29.10. 15:00 Mužakow – Chrósćicy

Pokalne hry

29.10. 14:00 Malešecy – Njebjelčicy

30.10. 13:00 Wachau II – Pančicy

30.10. 13:00 Nadr. Hrab. – Ralb./Hórki

Volleyballowe dypkowe hry

06.11. 10:00 Pančicy II

  – Pančicy III (žony)

06.11. 12:00 Pančicy II – MSV Budyšin III

W Biskopicach wotmě so njedawno třeći wosebity běh pod hesłom „Schiebock läuft extrem“.

Na štyri kilometry dołhim kołoběhu z 18 zadźěwkami wubědźowaše so wjace hač 450 atletow, mjez nimi tež horstka Serbow. Běharjo měrjachu swoju spěšnosć a wutrajnosć, wosebje pak tež wušiknosć na štyrjoch abo wosom kilometrach. Na 8 km dyrbjachu kołoběh dwójce zmi­štrować.

Cyłkownaj dobyćerjej a najspěšnišej na 4 km běštaj André Dutschmann z Hornjeje Hórki w 16:24 min a Tamina Polke z Ringenhaina w 20:03 min. Corinna Měrćinkowa z Chelna zmištrowa tónle kołokurs w 29:34 min.

Na 8 km dobyštaj Jonny Seitz z Drježdźan w 33:45 min a Franziska Kranich z Niskeje w 40:50 min. Najwuspěšniši serbski starter, 26lětny Jakub Čórlich z Němcow, doběža po 34:43 min jako druhi do cila. Roman Měrćink z Baćonja docpě cil jako wosmy w 37:29 min.

Jako prěnja Serbowka je před lětomaj Beata Čórlichec, pochadźaca z Němcow a nětko w Kölnje nad Rynom bydlaca, na swětowych mišterstwach triatlona na kupje Hawaii přewšo ćežke Ironman- wurisanje z brawuru zmištrowała.

Lětsa je so triatletka wospjet za tele hoberske sportowe wužadanje pod tropiskimi temperaturami w Kona kwalifikowała, kotrež bě 8. oktobra. A 43lětna Beata Čórlichec bě nětko hišće wuspěšniša. Swój cyłkowny wosobinski čas je wona porno lětu 2014 (11:30 h) wo 43 mjeńšin na 10:47 h polěpšiła (3,8 km płuwanje w 1:15 h – 180 km kolesowanje w 5:29 h a 42 km marathonowy běh w 3:53 h). Mjez 3 171 wobdźělnikami wobsadźi dobre cyłkowne 947. městno. W swojej starobnej klasy 40-44 lět docpě wurjadne 15. městno, a w njej bě wona samo najlěpša Němka. Z Němskeje je na swětowych mišterstwach wjace hač 190 sportowcow startowało.