Twornju TDDK w Nadróznej Hrabowce zaměrnje dale rozšěrjeja
Nadrózna Hrabowka (SN/BŠe). Twornja TDDK za němske klimowe kompresory w Nadróznej Hrabowce so zaměrnje dale wuwiwa. „Hladajo na šesty twarski wotrězk wšitko po planje běži“, wjeseleše so prezident TDDK Yoichi Terao minjeny pjatk na zběhance. Hačrunjež dyrbjachu w zymje wjedra dla dźěła na twarnišću přetorhnyć, swjećachu jenož dźesać měsacow po prěnim zarywje wažnu mjezykročel – zběhanku. Cyłkownje 70 dźěłaćerjow pod hłownym nawodom japanskeho twarskeho koncerna Takenaka so prócuje naprawu zwoprawdźić. „Na papjerje najprjedy wšitko mjeńše skutkuje, tola na městnje so dimensije twara wotbłyšćuja“, Terao zwurazni. Wón je nadźijepołny, zo je stejnišćo za přichod derje přihotowane. W septembrje 2022 su zamołwići twornje připowědźili, zo chcedźa dołhodobnje elektriske kompresory, leće a mašinelne wobdźěłanje aluminijowych wobtwarkow zhusćaka w stejnišću produkować. Jenož dźewjeć měsacow pozdźišo, loni w juniju bě prěni zaryw na twarnišću. Zmóžniło je tole twarski zarjad Budyskeho wokrjesa.
Budyšin (CRM/SN). 80. narodniny komponista, wučerja, dramaturga a intendanta Detlefa Kobjele wopominaše Serbski ludowy ansambl (SLA) minjenu sobotu w swojim domje a wčera w Choćebuzu. Tak so spominanje na žiwjenski skutk wobhnadźeneho a za hudźbu so horjaceho syna pjekarja z Rogozna pola Choćebusa po rozmołwnym kole minjenu srjedu (SN rozprawjachu) nětko z tym zjima, zo so to bytostne jeho kompozitoriskeho tworjenja předstaji. Dźiwadźelnik Měrko Brankačk program moderěrowaše.
Wjace hač 600 přihladowarjow je pjatk wječor w Biskopicach hornjołužiski koparski derby we wyšej lize mjez Biskopičanskim KT 08 a Budissu Budyšin widźało. Wrota pak přiwisnicy wobdźiwać móhli njejsu. Tež kapitan Biskopičanow Jonas Krawčik, tu při wólnym kopje, trěbne třělcowske zbožo njeměješe. Dale njeporaženi Biskopičenjo wostanu z dypkom zastatka dla najwjetši přesćěhowar načolnika VFC Plauen, kiž je pola FC Grimma tež 0:0 hrał. Foto: Konstantin Hrjehor
Bywši zwjazkowy prezident Joachim Gauck minjeny pjatk w BudyšinjeBudyšin (SN/bn). „Strach njeměli ignorować. Přiwšěm njeměł nam ze směrnicu być. Stworićel je nam mjenujcy dalšej daraj darił: swědomje a zamołwitosć.“ Z tymle słowami zakónči bywši zwjazkowy prezident Joachim Gauck minjeny pjatk 15. Budysku narěč w po dwěmaj třećinomaj wobsadźenej cyrkwi swj. Pětra, wotmołwiwši na prašenje z publikuma, „hač buchu woprawdźe wšitke móžnosće wučerpane, dalšej wojerskej eskalaciji w Ukrainje zadźěwać“.
43 młodostnym je Drježdźansko-Mišnjanski biskop Heinrich Timmerevers wčera sakrament firmowanja spožčił. Wulki dźěl holcow bě so družču drastu woblekło, wjele kmótrow a dalše kemšerki běchu we wuslěkanej drasće přišli. Po kemšach so biskop z młodostnymi do zhromadneho fota zestupa (na wobrazu). Tohorunja 43 młodostnych je Zhorjelski biskop Wolfgang Ipold wčera w Kulowje firmował. Tež tam mějachu serbske družki. Foto: Darius Budar
Manfred Hermaš, njesprócniwy wjelelětny wojowar za serbske naležnosće w Slepjanskej kónčinje, swjeći dźensa w Rownom swoje 75. narodniny.Manfred Hermaš bě ze slepjanšćinu doma w Brězowce wotrostł a so w njej pozdźišo wukmanjał. Tež hornjoserbšćinu sej přiswoji. Hižo čas žiwjenja skutkuje wón za serbstwo z horcej wutrobu, najintensiwnišo pak wot časa přewróta 1989. Hač do 2014 běše to zdobom jeho powołanski nadawk jako regionalny rěčnik Domowiny. Jeho powołanski wuspěch pak njeby tajki był, njeby-li wón na mnohich wšelakich polach serbskeho a towaršnostneho žiwjenja – w gmejnje, wosadźe, wokrjesu a na krajnej runinje – přeze wšě lěta hač do dźensnišeho čestnohamtsce aktiwny był.Tak bě na přikład wjacore legislaturne periody z čłonom Serbskeje rady w Sakskej a Zwjazkoweho předsydstwa Domowiny. Wot 2013 do 2021 skutkowaše jako župan na čole župy „Jakub Lorenc-Zalěski“. Hač do dźensnišeho je Hermaš čłon župneho předsydstwa. Nimo toho je zamołwity za serbske prašenja Ewangelskeje cyrkwje Be ...
Wjace hač dwaceći šulerjow 12. lětnika Budyskeho Serbskeho gymnazija je dźensa dopołdnja swoje pruwowanje w předmjeće stawizny w serbskej abo w němskej rěči pisało. Šulski nawoda René Wjacławk je młodostnym wotběh rozłožił a jim wulki wuspěch přał. Jutře wotměje so pruwowanje w předmjeće biologija, 23. apryla w matematice. Dźeń pozdźišo maja šulerjo w chemiji posledni pruwowanski termin za přirodowědne předmjety. Dnja 25. apryla pisaja maturanća poslednjej pisomnej pruwowani w němčinje a w serbšćinje. Foto: SN/Bojan Benić
Wuradźuje-li Zwjazkowe předsydstwo Domowiny w Delnjej Łužicy, zaběra so wone zwjetša tež z temami tamnišeje specifiki. Rěčny projekt „Zorja“ je tajka, za kotruž so tež w sakskim dźělu Łužicy zajimuja.Choćebuz (SN/at). 18 čłonkow a čłonow zwjazkoweho předsydstwa je so na posedźenju minjeny pjatk wobdźěliło, wosom na městnje w Delnjoserbskim internaće w Choćebuzu a dźesaćo online doma před wobrazowku. Dokelž někotři do toho přizjewjachu, posedźenje prjedy wopušćić dyrbjeć, wobjednachu wobzamknjenjakmanosće dla wobzamknjenja hnydom na spočatku dnjoweho porjada. Mjez druhim pomjenowa zwjazkowe předsydstwo Bernda Jurka, Kerstin Kosakowu, Margit Neugebauer, Freda Kaisera, dr. Hartmuta Leipnera, dr. Renate Harcke a Rainera Vogela w přihotach na wólby Rady za naležnosće Serbow Braniborskeje za dobu 2024–2029 z jednym hłosawzdaćom do wólbneho wuběrka.
