Ličba katolikow přiběra

wutora, 05. apryla 2016 spisane wot:

Vatikan (B/SN). Ličba katolikow na swěće spěšnišo přiběra hač wobydlerstwo. To wuchadźa z najnowšich wozjewjenjow z Vatikana. Wot lěta 2005 do 2014 postupi ličba katolikow wo 14,1 procent na 1,272 miliardow. Swětowe wobydlerstwo rozrosće w samsnym času wo 10,8 procentow. Podźěl katolikow powjetši so wot 17,3 na 17,8 procentow.

Bamž přijědźe do Krakowa

Vatikan (B/SN). Bamž Franciskus přijědźe wot 27. do 31. julija na swětowe zetkanje młodźiny do Krakowa. Wopytać chce wón tež něhdyše němske nacistiske zaničowanske lěhwo Auschwitz-Birkenau a sanktuarij Božeje miłosće w Krakowje-Łagiewnikach. Na najwuznamnišim putniskim městnje w Częstochowje budźe swjaty wótc Božu mšu k 1050. róčnicy „wukřćića Pólskeje“ swjećić.

Wo lutheranu w Americe

Planuje hobersku cyrkej

srjeda, 30. měrca 2016 spisane wot:

Lobamba (B/SN). Kral Swasilanda Mswati III. chce při wšej wulkej chudobje w swojim kraju za 157 milionow dolarow cyrkej natwarić dać, kotraž skići 30 000 ludźom městno. Nětko namołwja wón ludnosć, za to pjenjezy zběrać. Aktiwisća Prawiznicy za čłowjeske prawa w Swasilandźe tutu namołwu zasudźeja, prajo: „Tuchwilu njemóže ani wjetšina woby­dlerstwa Swasilanda sama bjez jałmožny druhich přežiwić.“

Strach wostanje

Mnichow (B/SN). Atentaty přez sebje­mordarjow islamskeje teroristiskeje skupiny Boko Haram načinjeja w sewjernym Kamerunje dale paniku. „Je to kaž ko­lektiwna psychoza“, rozprawja biskop Ateba Edo, „mnozy njechodźa tam, hdźež so ludźo zhromadźuja.“ Jeho biskopstwo na hranicy k Nigeriji je hižo 55 000 ludźi wopušćiło. Wojersce je Boko Haram zničena, zwostanu jemu jenož hišće skupiny,­ kotrež skućeja sebjemordarske nadpady. To pak strašnu situaciju hišće­ pohórša.

Zadwělowanje na Ukrainje

Caritu podpěrać

wutora, 22. měrca 2016 spisane wot:

Magdeburg (B/SN). Zo njebychu čestnohamtske projekty Carity z financnych přičin zwrěšćić trjebali, eksistuje wot lěta 2010 fonds Carity w zwisku z awtotwarcom Hyundai. Tón podpěruje něhdźe 40 skupin po tysac eurach wosebje za projekty, kotrež spěchuja socialny angažement młodych ludźi, jich mjezsobne ze­znaće abo kubłanske šansy. Próstwy stajić za prěnje poł lěta hodźa so hač do 31. měrca pod www.caritas.de/ehrenamtsfonds/sozialcourage.

Cyrkwi zasudźatej hidu

Drježdźany (B/SN). Wobě wulkej cyrkwi w Sakskej stej zasudźiłoj njepřećelske zjawy cuzym napřećo w Clausnitzu a Bu­dyšinje. „Werbalne a psychiske wohro­ženje ludźi, kotřiž w našim kraju za škitom pytaja, a ludźi, kiž chcedźa jim škit skićić, njeměła naša towaršnosć na lochke ramjenja brać“, rěka w zhromadnej de­klaraciji. Podawkaj stej „pokazałoj hrózbnu hidu dźělow ludnosće ćěkancam napřećo­, štož će zastróža a rudźi“. Křesćenjo Sakskeje začuwaja wosebitu wino­watosć, so dale angažować za ludźi w nuzy a ćěkancow.

Loni 223 konfliktow na swěće

Bamž ćěkancow witał

wutora, 15. měrca 2016 spisane wot:

Vatikan (B/SN). Bamž Franciskus je na Pětrowym naměsće ćěkancow witał. Wón apelowaše, zo njeměli woni při wšěch wobstejnosćach zmužitosć zhubić. „Njedajće sej wzać nadźiju do Boha a žiwjensku radosć, kotrejž wuchadźatej z nazhonjenja Bójskeje miłosće.“

Němski klóšter pomórany

Jerusalem (B/SN). Němski klóšter benediktinow Dormitio w Jerusalemje su njeznaći znowa atakowali z antikřesćanskimi parolemi. Woni pomórachu sćěny a durje klóštra z hebrejskimi parolemi kaž „křesćenjo do hele“, „smjerć křesćanam“ abo „wjećba za Israelitow“. Mniša žadaja sej nětko wjace škita wot israelskich statnych zarjadow.

Drježdźanska Caritas 100 lět

Reformowana cyrkej pyta ideje

wutora, 08. měrca 2016 spisane wot:

Emden/Drježdźany (B/SN). Z cyłoněmskej konferencu w Emdenje je Ewangelska reformowana cyrkej Němskeje zahajiła podralětny „proces do přichoda“. K zetkanju w Jasco bibliotece zetka so 200 delegowanych ze sewjerozapada kaž tež z Bayerskeje a Sakskeje. Cyrkej steji před daloko sahacymi změnami: Ličba sobustawow woteběra a tak tež dochody, rjekny jeje cyrkwinski prezident Martin Heimbucher. 145 wosadow po cyłej Němskej z dohromady 180 000 sobustawami je tuž namołwjene, přichod swojeje cyrkwje aktiwnje wuhotować.

Myto za integraciju

Essen (B/SN). 12. raz je črijace předewzaće Deichmann wupisało Spěchowanske myto Deichmanna za integraciju. Na zahajenju z 100 000 eurami dotěrowaneje cyłoněmskeje akcije rjekny patronka Nazan Eckes, zo je integracija hladajo na trajace připućowanja tak aktualna kaž ženje do toho. „Wona pak jenož funguje, hdyž so kóždy w towaršnosći praša: Što móžu ja přinošować?“, wuzběhny Eckes. Spěchowanske myto spožčeja šulam, iniciatiwam kaž tež małym a srjedźnym předewzaćam, staracym so wo zanjechanych młodostnych.

Wubědźowanje dobył

Wo ćěkancach wěcownje rěčeć

wutora, 01. měrca 2016 spisane wot:

Berlin (B/SN). „Alianca za swětowu wotewrjenosć, solidaritu, demokratiju a prawniski stat“ je zwjazk organizacijow a zhromadźenstwow nabožinow, sporta, kultury a hospodarstwa. K tomu słušatej tež wobě wulkej němskej cyrkwi. Tale alianca žada sej wěcownu debatu wo přijimanju ćěkancow: „Namołwjamy wšitkich, wěcownje wo ćěkancach a zapućowarjach rěčeć, zo bychmy migrantsku krizu rozrisać móhli“, piše alianca.

Pytaja kwartěry za zjězd

Lipsk (B/SN). Hosćo stoteho zjězda katolikow wot 25. do 29. meje w Lipsku maja tež we „łožach protestantow“ wotpočnyć móc. Ewangelsko-lutherski superintendent města Martin Henker podpěruje pytanje 4 000 priwatnych kwartěrow. Dosaha jednore łožo abo konopej, najlěpje kombinowane z małej snědanju. „My smy w měsće wikow zwučeni na hospodliwosć – tuž, lubi měšćenjo, zwěrće sej“, rjekny tež kulturny měšćanosta Michael Faber na zahajenju akcije „Priwatny kwartěr – hósć pyta hospodu“.

Młodźina so zaso zetka

Prašeja so za biblijemi

wutora, 23. februara 2016 spisane wot:

Stuttgart (B/SN). Naprašowanje křesćanskich ćěkancow za darmotnymi biblijemi w Němskej je po informaciji bibliskeho towarstwa wulke. Naprašowanja přichadźeja wosebje z wosadow, přijimanskich zarjadnišćow, pomocnych skupin kaž tež z křesćanskich skutkow, kaž bibliske towarstwo w Stuttgarće zdźěli. Wjace hač třećina naprašowanjow poćahuje so na wudaća Swjateho pisma w arabšćinje a 21 procentow jendźelšćinje.

„Luther mnichow wuhnał“

Přewjele syriskich ćěkancow

wutora, 16. februara 2016 spisane wot:

Amman (B/SN). Kral Jordaniskeje Abdullah II. warnuje, wulkeje ličby ćěkancow w kraju dla, před sypnjenjom towaršnostnych strukturow. Jordaniska je docpěła hranicu poćežowanja. Syriscy migranća wučinjeja mjeztym 20 procentow wšeje ludnosće kraja. Štwórćina statneho budgeta běži do pomocy za migrantow.

Zwjazk měra 60 lět

Bamž do Šwedskeje

wutora, 09. februara 2016 spisane wot:

Vatikan (B/SN). Bamž Franciskus poda so 31. oktobra do Šwedskeje. Tam chce wón z nawodami Lutheroweho swětoweho zwjazka w Lundźe nawjedować ekumeniske wopominanske zarjadowanje k 500. róčnicy reformacije.

Myće nohow tež za žónske

Vatikan (B/SN). Bamž Franciskus změni za swětowu cyrkej oficialnje ritual myća nohow zeleny štwórtk. W přichodźe smědźa so tež žónskim a nic jenož mužam noze na Božej mši myć. Franciskus sam je hižo žónskim noze mył, bamžojo před nim běchu k tomu po tradiciji dwanaće měšnikow wuzwolili.

Putin přeprošuje Židow

Moskwa (B/SN). Ruski prezident Wladimir Putin je Židam w Europje poskićił, do Ruskeje wupućować. Nawodnistwo Europskeho židowskeho kongresa bě na rozmołwje w Krjemlu rozprawjało, zo je strach mjez europskimi Židami wulki před teroristami a radikalnymi prawicarskimi mocami. Ze Sowjetskeho zwjazka su Židźa emigrowali, nětko móžeja so woni zaso do Ruskeje nawróćić, dokelž je Putin fazu antisemitizma zakónčił.

Křesćenjo přimaja so bróni

Angažuja so za Boha a swět

wutora, 02. februara 2016 spisane wot:

Berlin (B/SN). W Němskej mamy po trochowanju Zwjazka němske załožby wjace hač 30 000 cyrkwinskich załožbow wšelakich prawniskich formow. Pod hesłom „Angažowane za Boha a swět“ wuda zwjazk knihu. Wona dawa wobšěrny dohlad do mnohotnosće cyrkwinskich załožbow, kotrež towaršnosć wobohaćeja.

Kak z ćěkancami wobchadźeć

Genf (B/SN). Zwjazkowy nutřkowny minister Thomas de Maizière (CDU) je warnował před towaršnostnymi konfliktami hladajo na ćěkancow. „Migracija ma tež swoju ćěmnu stronu“, rjekny de Maizière na konferency Ekumeniskeje rady cyrkwjow a UNO w Genfje. Knježerstwa měli strachi a starosće ludnosće chutnje brać. To nowe a cuze móhło tež křesćanow wohrozyć. Cyrkwjam Europy přicpěwa so nastupajo wobchad z ćěkancami wažna róla, rjekny de Maizière. Jako „rjap ciwilneje towaršnosće“ su to husto cyrkwinske wosady, kotrež pomhaja. Mnozy křesćenjo su čas a pjenjezy nałožili, zo bychu migrantow witali. Ze stron politiki, ciwilneje towaršnosće a priwatneho hospodarstwa pak ma so wjace činić.

Sta milionow migrantow

nawěšk

nowostki LND