Wuslědki Elmauskeho zetkanja rozdźělnje hódnoćene
Elmau (dpa/SN/K). Z připrajenjom, wuhla so poněčim wzdać, su staty G 7 dali signal přećiwo woćoplenju zemje. Poł lěta do Pariskeho wjerška UNO wo klimje postajichu statni a knježerstwowi šefojo sydom najwažnišich industrijnych krajow swěta za zaměr, „w běhu tohole lětstotka“ zmóžnić swětowe hospodarstwo bjez wužiwanja fosilnych energijow. Zwjazkowa kanclerka Angela Merkel (CDU) je so jako hosćićelka wjerška z wobzamknjenjemi wo klimje přećiwo wobmyslenjam Japanskeje a Kanady přesadźiła. Wona bě sej jasny signal G 7 žadała, hewak móhł wjeršk UNO zwrěšćić.