Podstupim (SN/JK). Braniborscy přećiwnicy masoweho plahowanja skotu njepopušća. Po tym zo je ludowa iniciatiwa před Braniborskim krajnym sejmom zwrěšćiła, chcedźa nětko z pomocu ludoweho požadanja swoje zaměry přesadźić. Zwjazk agrarna změna přećiwo masowemu plahowanju skotu w Braniborskej a Berlinje je ludowe požadanje srjedź julija zahajił.

Za ludowu iniciatiwu trěbnych 20 000 podpismow su iniciatorojo spěšnje nazběrali, cyłkownje bě so 34 000 ludźi za iniciatiwu wuprajiło. Jeničce frakcija Zelenych w krajnym sejmje je za iniciatiwu hłosowała, z čimž sejm iniciatiwu wotpokaza. Nětko přewjedu tuž ludowe požadanje. Za jeho wuspěch trjebaja 80 000 podpismow, a te maja so zběrać na zarjadach, přetož na puću hromadźene podpisma braniborski zakoń njepřipóznawa. Za hromadźenje podpismow ma zwjazk poł lěta chwile.