Luxemburg/Praha/Budapest (dpa/SN/ K). Dźiwajo na dramatiskosć, kotruž je kriza ćěkancow dla nabyła, wuradźuja wonkowni ministrojo 28 krajow Europskeje unije wo tym dźensa a jutře w Luxem­burgu. Ćežišćo je połoženje w pochadnych a transitnych statach. Krótko do zahajenja zetkanja stej Němska a Francoska zhromadnje namjetowałoj, jednotliwym čłonskim statam EU postajić zawjazowace kwoty za přijimanje migrantow. Tomu so wuchodoeuropske­ kraje dotal spjećuja.

W Praze je so dźensa Vyšegrádska štwórtka schadźowała. Ministerskim prezidentam Čěskeje, Słowakskeje, Pólskeje a Madźarskeje zaležeše na tym, koordinować politiku napřećo ćěkancam. Kraje dyrbjachu sej naposledk za wotpokazanje kwoty raznu kritiku lubić dać.

Póndźelu, 14. septembra, budu so nutřkowni a justicni ministrojo statow Europskeje unije w Brüsselu wurjadnje schadźować, zo bychu nastupajo rozdźělowanje ćěkancow wuradźowali. Komisija EU chce jako přisłušna instanca hač do tohole termina předpołožić nowe namjety wo rozdźělowanju ćěkancow.