Bamž Franciskus namołwja k solidarnosći a pomocy
Berlin/Mnichow (dpa/SN/K). Njepřestajny njesměrny nawal ćěkancow načinja tež Němskej njemało problemow, nic naposledk financielnych. Za miliardy eurow płaćiwe naprawy k zaměstnjenju a zastaranju migrantow chce koalicija tuž přidatnje šěsć miliardow eurow inwestować. Tři miliardy tychle srědkow z budgeta 2016 maja kraje a komuny dóstać. Nimo toho chce koalicija kruh tak mjenowanych wěstych pochadnych krajow wo Kosowo, Albansku a Montenegro rozšěrić.
Kónc tydźenja je nic mjenje hač 20 000 ćěkancow město 7 000 wočakowanych z ćahami najprjedy do Bayerskeje přijěło, zwotkelž buchu zdźěla na dalše zwjazkowe kraje rozdźěleni, tak tež do Sakskeje. W Mnichowje wočakuja dźens dalšich 11 000 azyl pytacych. „Hišće zamóžemy situaciju zmištrować, ale naše kapacity so kónča“, praji rěčnica bayerskeho krajneho knježerstwa Simone Hilgers.