W mnohich namjeznych kónčinach Europy je maja: dwurěčne wjesne tafle, kotrež šoferow tež w mjeńšinowych rěčach strowja. Tak je tomu tohorunja w němsko-danskej namjeznej kónčinje – znajmjeńša južnje mjezy: W němskim Flensburgu wužiwaja tež danske Flensborg, a Niebüll na němskim zapadnym přibrjohu Sewjerneho morja rěka frizisce tež Naibel.

W danskim Sewjernym Schleswigu žadaše sej němska mjeńšina hižo před wosom lětami dwurěčnje popisane wjesne a měšćanske tafle, tehdy pak žadanje Němcow w Danskej raznje wotpokazowachu. Wuznamne wosobiny mjeńšiny dóstawachu samo hroženja.