W zhromadźenstwje toči čerw njepřezjednosće

Brüssel (dpa/SN/K). Po tym zo běchu nutřkowni ministrojo Europskeje unije wčera rozdźělenje 120 000 ćěkancow z trěbnej wjetšinu wobzamknyli, wuradźuja dźensa wječor šefojo statow a knježerstwow zhromadźenstwa na wurjadnym wjeršku w Brüsselu wo krizy ćěkancow dla. Po woli předsydy wjerška Donalda Tuska dźe předewšěm wo lěpši a skutkowniši škit wonkownych hranicow EU kaž tež wo zestabilizowanje połoženja we wójnskich a krizowych kónčinach.

Politiscy eksperća maja za to, zo budźe dźensniši wječorny wjeršk chětro njeharmoniski. To z teje přičiny, zo rozsud nutřkownych ministrow nima přihłosowanje Čěskeje, Słowakskeje, Madźarskeje a Rumunskeje kaž tež nic Finskeje, kotraž bě so hłosa wzdała. Tak je čěski prezident Miloš Zeman hižo zwuraznił, zo waži wjeršk šefow wjace hač hłós ministrow. Słowakski premier Robert Fico připowědźi, zo njebudźe kwoty respektować a zo so „tomule diktatej“ njekłoni. Słowakskej su nutřkowni ministrojo něšto wjac hač 800 ćěkancow přidźělili, Němskej dobrych 31 000.