Ruska njewojuje jenož přećiwo IS
Bagdad (dpa/SN/K). We wobydlerskej wójnje w Syriskej, kotrejež dla dale a wjace ludźi ćěka, jewi so zašmjatane wojerske połoženje. USA a jich zwjazkarjo atakuja z powětra pozicije bojownikow teroristiskeje milicy Islamski stat (IS), podpěrujo mocy přećiwnikow prezidenta Bashara al-Assada. Wot njedawna zapřijimuje tež Ruska z powětra a wot wčerawšeho z Kaspiskeho morja tohorunja raketowje přećiwo islamistiskim ekstremistam, pomhajo z tym Assadej a jeho wójsku.
USA nětkole twjerdźa, zo 90 procentow ruskich nalětow njeje zaměrjenych na pozicicije teroristiskeje milicy IS abo Al-Kaidy. Zwjetša bywaju stejnišća opozicionelnych skupin atakowane, kiž chcedźa za Syrisku lěpši přichod bjez Assada. Ameriske ministerstwo za zakitowanje zdźěli, zo USA swoju wojersku strategiju ruskemu postupowanju přiměrjeja. W znajmjeńša jednym padźe je ameriske bojowe lětadło kurs změniło, zo by „wěsty wotstawk“ k ruskim mašinam dodźeržało.
