Berlin/Mnichow/Bremen (dpa/SN). Nastupajo krizu ćěkancow hroža nowe rozestajenja mjez šefom CSU Horstom Seehoferom a zwjazkowej kaclerku Angelu Merkel (CDU). Hladajo na přiběracu ličbu ćěkancow chce Bayerska docpěć, zo tutych při němsko-awstriskej hranicy wotpokazaja. Nimo toho připowědźi bayerski ministerski prezident, zo nowych přichadźacych ćěkancow do druhich zwjazkowych krajow dale sćelu. Wotpowědne naprawy, wo kotrychž hižo tydźeń w Mnichowskim kabineće diskutuja, chcychu dźensa wobzamknyć. Kanclerka Merkel wobkrući před čłonami CDU we Wuppertalu, zo bywaju ćěkancy w Němskej dale witani.
Awstriska je na bayerske naprawy reagowała a připowědźa, ćěkancow wosebje na hranicy k Madźarskej krućišo kontrolować.
Nawal ćěkancow zawini w Němskej po słowach nutřkowneho ministra Lothara de Maizièra (CDU) přiběrace namócnosće přećiwo nim. Dotal zličichu 490 chłostajomnych deliktow napřećo domam za požadarjow azyla. Minister rěči w zwisku z wukročenjemi wo hańbje za cyłu Němsku.