W Donjecku prěnju róčnicu samostatnosće swjećili

Moskwa/Brüssel/Donjeck (dpa/SN/K). Mjez USA a Ruskej je so njenadźicy nowa diplomatiska iniciatiwa zrodźiła. Tak je w čornomórskim Sočiju dóšło k zetkanju mjez prezidentom Wladimirom Putinom a wonkownym ministrom USA Johnom­ Kerryjom. Prěni raz po dwěmaj lětomaj Kerry z hłowu ruskeho stata zaso rěči. Do toho bě wón ze swojim ruskim kolegu Sergejom Lawrowom wo napjatych poćahach mjez woběmaj sta­tomaj jednał. Moskwa a Washington zdźělištej přezjednje, zo je w srjedźišću rozmołwow kriza Ukrainy dla stała, kiž poměr mjez woběmaj krajomaj poćežuje. Dalšej temje běštej atomowe zrěčenje z Irano­m a konflikt w Syriskej a Jemenje.