Heiko BengelstorffD 11

pjatk, 05. oktobera 2018 spisane wot:

1Zo bych tomu zadźěwał, zo rěč, tradi­cije a stare nałožki wotemrěja. Chcu aktiwnje k tomu přinošować, zo naša serbska mjeńšina dale zawostawa.

2Z tajkim parlamentom hodźa so kultura, tradicije a rěč w serbskim wobłuku lěpje spěchować.

3Mam skrućenje serbskeje rěče na šulach a w pěstowarnjach za wažne. Zasadźeć chcu so za to, zo w serbskim wobłuku dalše połnočasowe dźěłowe městna nastanu. Dalši wobłuk je turizm. Jón we Łužicy wožiwić, to sym sej w padźe wuzwolenja předewzał.

Edith PjenkowaD 13

pjatk, 05. oktobera 2018 spisane wot:

1Sym so za kandidaturu rozsudźiła, dokelž trjeba serbski lud demo­kratisce legitimowane zastupnistwo, kotrež jeho identitu ze zakonskej mocu skruća.

2Štóž njeje z čłonom Domowiny, nima­ hłós, zo by sobu postajował.

3Chcu so za to zasadźeć, zo so sy­dlenske kónčiny našeho ludu tež za přichodne generacije zachowaja (wnučkokmanosć). Z tym zwjazane su serbska rěč, kultura a přiroda, ale runje tak materielne kubła prjedownikow. Žana­ wjes, žadyn žiwjenski rum mjeń­šiny njesmě so hižo brunicy woprować.

Ilona UrbanowaD 14

pjatk, 05. oktobera 2018 spisane wot:

1Je dawno načasu, zo móža Serbja wo swojich naležnosćach sami rozsudźić, njewotwisnje wot bydlišća, kubłanja abo organizowanja. Serbski sejm skónčnje za to přiležnosć skići. Chcu ju wu­žić a ze žiwjenjom pjelnić. Prawa, kotrež teoretisce mamy, ale sej je ženje njewužadamy, ničo hódne njejsu!

2Lěpšina serbskeho parlamenta tči w tym, zo je jeho prawniski ramik cyle hinaši. Jako parlamentownicy móh­li so sebjewědomi a runohódni ze Zwjazkom a krajemi za swoje prawa zasadźeć, město toho zo nam – po tym, kak je pokładnja pjelnjena – tajke abo hinaše srědki za kulturu a kubłanje přewostaja, abo tež nic. Tež mjeńšiny ze swójskim parlamentom móža wróćo­stajene być. Šansa pak, swójske prawa přesadźić móc, wo tójšto přiběra.

3To najprjedy wot wólbneho wobdźělenja wotwisuje a wot toho, što móžemy na tym zakładźe scyła započeć. Rólu hraja dale wo­čakowanja našich wolerkow a wolerjow. Budu-li wuzwolena, budu so konstruktiwnje jako Serbowka zasadźeć.

Laura GrönertojcD 15

pjatk, 05. oktobera 2018 spisane wot:

1Kandiduju, dokelž mam za jara wažne serbsku rěč a kulturu za­chować. Mjeńšina ma tohorunja prawo na parlament. Nimo toho je bytostne, zo přisłušeja tajkemu sejmej tež młódši zastupjerjo a młódše zastupjerki.

2Tež ći ludźo, kotřiž zwisk k serbstwu maja, dyrbjeli do politiki sobu zapřimnyć móc. To je mi wažne. Ze serbskim parlamentom móžemy tradicije a rěč zaso na prěnje město stajeć a skedźbnjeć nimo toho na mjeńšinu, na kotruž su mnozy snano hižo pozabyli abo scyła znali njejsu.

3Za mnje ma kubłanje wosebje wulki wuznam. Dźěćom a młodostnym dyrbimy wjace šansow skićić, zo bychu sej hižo w pěstowarni abo w zakładnej šuli rěč a ludowe nałožki zbližili a so z nimi zaběrali.

Carola GeppertowaD 12

pjatk, 05. oktobera 2018 spisane wot:

Kandidatka njeje naprašnik najebać prócowanje redakcije Serbskich Nowin nastupajo swoju „wizitku“ bohužel wupjelniła a njeje ničo zapodała.

Hač do 27. oktobra je móžno, so jako woler/wolerka registrować dać.

Připósłane wólbne podłožki ma woler/wolerka hač do 3. nowembra 2018 z listom­ wólbnemu wuběrkej wróćić.

To a tamne (05.10.18)

pjatk, 05. oktobera 2018 spisane wot:

Tysacy litrow mórskeje wody chcyše Němc w Italskej pokradnyć, zo móhł z njej doma akwarije pjelnić. 48lětny bě minjeny tydźeń z nakładnym awtom do sewjeroitalskeho Triesta přijěł, na kotrymž měješe 24 sudobjow. Dohromady 24 000 litrow wody móžeš do nich pjelnić. Wobydler pak muža při klumpanju wobkedźbowaše a zawoła policiju. Ta pakostnikej přikaza, wodu zaso do morja pušćić. Nimo toho dyrbi 1 549 eurow pokuty płaćić. Muž jeničce rjekny, zo trjeba wodu za swój wobchod akwarijow.

Wosebje přećelny postrow napřećo policistam njeje 38lětnemu w Durinskej zajeće zalutował. Nawopak: Zastojnicy dohladachu so w Geraskej kupnicy postrowa dla muža, kiž zdawaše so jim znaty być. A kontrola wupokaza wunjese wěstotu, zo předležeše přećiwo 38lětnemu padustwa dla wukaz zajeća. Dowjezechu jeho k sudnikej a na to do jastwa.

Serbsku radu direktnje wolić

štwórtk, 04. oktobera 2018 spisane wot:

Wojerecy (SN/at). Serbscy čłonojo Lě­wicy z Budyskeho wokrjesneho zwjazka strony su specifiski bazowodemokratiski nastork­ za program strony ke klětušim wólbam­ Sakskeho krajneho sejma po­dali. Na regionalnej konferency „Baza je bos“ wutoru we Wojerecach sformulo­wachu pominanje za nowelěrowanjom sakskeho serbskeho zakonja ze zaměrom, serbske zastupnistwo zajimow skru­ćić. Swój namjet wobkrućichu tak, zo njewotpowěduje serbski zakoń z lěta 1999 hižo aktualnemu mjeńšinowemu prawu w Europje. Podatej stej runje tak zawjedźenje prawa, zo smě serbske zastupnistwo jako zwjazk skoržić, a wobšěrna kubłanska awtonomija Serbow wot dźěćaceho přebywanišća hač k maturje. Bytostny aspekt zakonskeje nowele ma być, wšoserbsku legitimaciju sakskeje Rady za serbske naležnosće z direkt­nymi wólbami jeje čłonow docpěć.

Sakska Lěwica zběra we wobłuku regionalnych konferencow temowe ćežišća, kotrež maja po woli čłonstwa we wólbnym programje zakótwjene być. Postupowanje bě krajny zjězd strony kónc awgusta we Wojerecach wobzamknył.

Dale dźěłać

štwórtk, 04. oktobera 2018 spisane wot:

Drježdźany (SN/BŠe). Ze swjedźenskej hodźinu je Sakski krajny sejm wčera na wuspěchi němskeho zjednoćenja dopominał. Čěski pósłanc Tomáš Podivínský bě lětsa na dnju jednoty swjedźenski rěčnik a je Němcow namołwjał dale na zjednoćenju dźěłać. Tak dopominaše na euforiju 5 000 wobydlerjow NDR, kotřiž běchu­ w Praskim pósłanstwje słowa němskeho wonkowneho ministra Hansa-Dietricha Genschera słyšeli. Wot toho časa su wobdlerjo tójšto zdokonjeli, na čimž měli dale natwarjeć. Zjednoćenje Němskeje je po cyłej Europje najwjetši a najlěpši podawk, z kotrehož su na zapadźe a wuchodźe kraja profitowali. Zjednoćenje a zhromadne dźěło mjez Němskej a Čěskej stej Europje přikład.

Rentowa reforma płaći

štwórtk, 04. oktobera 2018 spisane wot:

Moskwa (dpa/SN). Ludźo w Ruskej dyrbja wotnětka dlěje dźěłać. Prezident Wladimir Putin je wčera zakoń wo rentowej reformje podpisał, kaž Krjeml wječor zdźěli. Z noworjadowanjom so rentowa staroba we wjacorych kročelach zwyši. Žony póńdu potom ze 60 lětami na wuměnk, mužojo z 65. Dotal dźěłaja žónske w Ruskej hač do 55, mužojo hač do 60 lět. Knježerstwo bě reformu w lěću namjetowało, na čož bě k protestam dóšło.

Mjenje ludźi hač wočakowane

Berlin (dpa/SN). Na wobydlerski swjedźeń k Dnjej němskeje jednoty w Berlinje je mjenje ludźi přišło hač wočakowane. Wot póndźele hač do wčerawšeje srjedy zličichu něhdźe 600 000 wopytowarjow na swjedźenskej mili wosrjedź zwjazkoweje stolicy, hdźež wotměchu so koncerty, diskusijne koła a dalše zarjadowanja. Organizatorojo běchu milion ludźi wočakowali. Chłódneho a mokreho wjedra dla drje su mnozy doma wostali. Wčera, jako so słónčko hdys a hdys pokaza, přińdźe 500 000 wopytowarjow.

Mortwi při nadpadźe

Němska a Israelwušo hromadźe

štwórtk, 04. oktobera 2018 spisane wot:

Berlin/Jerusalem (dpa/SN). Němska a Israel chcetej we wobłukach hospodarstwa, wědomosće a internetneje wěstoty wušo hromadźe dźěłać. Na to staj so zwjazkowa kanclerka Angela Merkel (CDU) a israelski ministerski prezidentBenjamin Netanjahu wčera wječor w Jerusalemje dojednałoj. Kaž Netanjahu medijam zdźěli, steja mjenowane temy w srjedźišću dźensnišich knježerstwowych konsultacijow, na kotrež bě Merkel wčera do Jerusalema přilećała.

Wonkowny fachowc Zelenych Omid Nouripour je zwjazkowu kanclerku namołwjał, najebać wosebity poměr mjez krajomaj tež diferency mjez Němskej a Israelom jasnje pomjenować.

nawěšk

nowostki LND