Syć muslimskich dušepastyrjow
Halle (B/SN). Krajna syć migraciskich organizacijow Saksko-Anhaltskeje (Lamsa) čestnohamtskich muslimskich dušepastyrjow wukubłuje. W aprylu započnje so kurs z projektom „Amussa“, kiž ma syć dušepastyrjow wutworić a w statnych zarjadnišćach etablěrować.
Rozdźělny póstny čas
Berlin (B/SN). Pola ewangelskich a katolskich wěriwych započnje so póstny čas lětsa 14. februara a skónči so jutry, 31. měrca. Pola muslimow započnje so tón spočatk ramadana 11. měrca a skónči so 10. apryla ze swjedźenjom cokora. Ortodoksni křesćenjo maja w běhu lěta štyri razy čas posćenja, 46 dnjow do jutrow, po swjatkach, w awgusće a w adwenće stajnje tydźeń.
Tydźeń za žiwjenje
Hannover/Bonn (B/SN). 13. do 20. apryla zahajitej ewangelska a katolska cyrkej 30. raz wosebity tydźeń pod hesłom „Generacija přichoda: Zhromadnje, rozdźělnje a derje“ za młodźinu a młodych dorosćenych, předewšěm zbrašenych. Ewangelska cyrkej w Němskej wšak je připowědźiła, zo so klětu wjace njewobdźěli. Tuž cyrkwi wo přichodnej strukturje wuradźujetej.
Ekumena z bibliju
Faeser: Demokratow skrućić
Berlin (dpa/SN). Zwjazkowa nutřkowna ministerka Nancy Faeser chcyła hladajo na bój přećiwo prawicarskemu ekstremizmej wot knježerstwa planowany zakoń za spěchowanje demokratije spěšnje schwalić. Politikarka SPD rjekny nowinje Rheinische Post, zo dyrbjało so nětko wšěm tym rjap skrućić, kotřiž chcedźa demokratiju sylnić a ju wožiwić. Ze zakonjom chcedźa towarstwa a organizacije w boju přećiwo prawicarstwu přichodnje pjenježnje lěpje podpěrować.
Nalěty USA tema w UNO
New York (dpa/SN). Wojerske nadběhi USA přećiwo Iranej přichilenym milicam w Syriskej a w Iraku su tema na nuzowym posedźenju Bjezstrašnostneje rady UNO. Ruska bě zeńdźenje zwołała a wumjetuje USA, zo z nalětami konflikt na Bliskim wuchodźe zaměrnje přiwótři. USA porno tomu chcyli so z nalětami za nadpad milicow na zepěranišćo wjećić, při kotrymž běchu třo wojacy USA žiwjenje přisadźili. Nalěty USA su sej pječa tež wjacore ciwilne wopory žadali.
Nowe sankcije přećiwo Ruskej
Pod hesłom #B96zrunać je wčera dopołdnja wjace hač połsta ...
Kretschmer staja wuměnjenja
Tójšto mortwych wohenjow dla
Zawodam skutkownišo pomhać
Berlin (dpa/SN). Zwjazkowy financny minister Christian Lindner (FDP) chce zhromadnje z hospodarskim ministrom Robertom Habeckom (Zeleni) na tym dźěłać, němske předewzaća do mjezynarodneho wubědźowanja wukmanić. Lindner při wšěm namjet Habecka wotpokazuje, wurjadne zamóženje wjacorych miliardow eurow na dobro firmow zarjadować. Zasadnje pak je wón za to, wo namjeće Habecka rěčeć a z toho „něšto konstruktiwneho“ sčinić, rjekny Lindner wčera wječor w sćelaku ARD.
Habeck bě na debaće zwjazkoweho sejma minjeny štwórtk namjetował, wurjadne zamóženje zarjadować, z kotrymž móhli so strukturne problemy rozrisać. Wón chcył zawodam wosebje na polu dawkow pod pažu přimnyć. Lindner wurjadne zamóženje wotpokazuje, dokelž by to jenož dalše zadołženje wunjesło.
Habeck swój posudk potwjerdźi, po kotrymž njemóže němske hospodarstwo dosć inwestować. Nimo toho je dawkowe poćeženje mnohim firmam wo wjele wyše hač w druhich krajach.
Warnuja před sćěhami za dźěći
Planowane legalizowanje cannabisa starosća staršich a lěkarjow
Hannover (dpa/SN). Tójšto starši starosća so po přepytowanju chorobnych kasow planowaneho legalizowanja cannabisa dla, hladajo wosebje na swoje dźěći. 63 procentow wšěch woprašanych staršich z dźěćimi pod 18 lětami z tym liči, zo mjeza zdźeržliwosće mjez njepołnolětnymi woteběra, hdyž smědźa dorosćeni konop legalnje brać. Tole zwěsća woprašowanje instituta Forsa w nadawku chorobneje kasy KKH. 73 procentow ludźi boji so strowotniskich sćěhow na přikład w mozach, 70 procentow starosća so strachoćiwosće a chabłaceje nalady. Slědźer na polu mozow Martin Korte z Braunschweigskeje techniskeje uniwersity radźi, legalnu předań cannabisa hakle wot 25 lět dowolić. „Wuwiće mozow je hakle srjedź 20tych lět wotzamknjene. Młodostni, kiž prawidłownje konop bjeru, maja zniženu kmanosć, swoje skutki planować, problemy rozrisać a impulsy kontrolować. Nimo toho zawinuje cannabis halucinacije a psychotiske symptomy.
Akcija z přikładom
Jelizo chcu něšto změnić abo njejsym spokojom z něčim, dyrbju to zwuraznić. Předewšěm su to hladajo na protestnu akciju rjemjeslnikow, předewzaćelow, ratarjow a wobydlerjow minjeny pjatk w Radworju palace temy wjesneje ludnosće a zawodow we wjesnych kónčinach. Ze stron zwjazkoweho knježerstwa dóstawaja jednu plistu po druhej, štož njemóža dale znjesć. Derje tuž, zo swój protest tež tam pokazaja, hdźež so temy pala, mjenujcy na wsach.
Přitomny krajny rada Budyskeho wokrjesa Udo Wićaz (CDU) ma nadawk starosće ludnosće do Drježdźan a Berlina transportować. Zwjazkowe knježerstwo wšak njebudźe na 170 wobdźělnikow w Radworju reagować. Ale zarjadowanje móhło přikład być za hibanja po wšěch wjesnych kónčinach. Dale pak měło so na to dźiwać, zo so hibanje wot dwělomnych stronow njeinstrumentalizuje! Zarjadowanja měli dale měnjenja wjesnjanow wotbłyšćować! Bianka Šeferowa
To a tamne (05.02.24)
Wjace hač 3 000 lubowarjow motorskich je so minjeny kónc tydźenja při njepřijomnym wjedrje ze swojimi mašinami w Bayerskim lěsu na „zetkanje elefantow“ zhromadźiło. Wjacore dny trajacy spektakl zarjaduje cyłoněmski zwjazk motorskich. Miholenje postara so wo chětro błóćane wobstejnosće. Bayerski hospodarski minister Hubert Aiwanger přińdźe w gumijowych škórnjach. Zasadna ideja „zetkanja elefantow“ je dobra zhromadnosć při lěhwowym wohenju bjez piwoweho stana a wulkeho swjedźenja.
Njebojazni kuparjo w lódzymnej wodźe su so sobotu na brjoze Baltiskeho morja we Warnemünde zešli. Mužojo a žony přińdźechu zdźěla w pisanych kostimach. Morjo bě pjeć stopnjow zymne. Tole pak něhdźe 50 wobdźělnikow lodoweho kupanja njewottraši. Tysacy wćipnych su spektaklej přihladowali.
Stawk wobchad busow zlemił
Lipsk (dpa/SN). Zjawny bliskowobchad w Sakskej bě dźensa rano w dalokej měrje zlemjeny. Přičina bě cyłodnjowski stawk, do kotrehož běchu dźěłarnistwa namołwjeli. W Lipsku tramwajki njejězdźachu. Tež w Drježdźanach, Kamjenicy a Šwikawje wostachu busy a tramwajki stejo. W Budyšinje sobudźěłaćerjo zjawneho bliskowobchada stawkowachu, štož powołanski wobchad chětro haćeše. Busy priwatnych firmow jenož z městnami stawkowacych narunachu.
Cannabis legalizuja
Berlin (dpa/SN). Amplowa koalicija je swoje diferency nastupajo planowane legalizowanje cannabisa přewinyła. Zakoń móhł wot 1. apryla płaćiwy być, zdźělichu zastupnicy frakcijow SPD, FDP a Zelenych dźensa nowinarjam. Nětko dyrbi zwjazkowy sejm noworjadowanje schwalić. Cannabis potom z lisćiny zakazanych srědkow šmórnu. Dorosćenym je přichodnje dowolene, cannabis plahować a wěste mnóstwo wobsedźeć.
Hrozy strašne wuwiće
