Berlin (dpa/SN). Zwjazkowa kanclerka Angela Merkel (CDU) je hladajo na mjeztym lěto trajacu koronakrizu tež kritisku bilancu sćahnyła. W tym času je so w Němskej tójšto njedostatkow a sylnosćow pokazało, rjekny wona wčera na internetnym zetkanju swětoweho hospodarskeho foruma, kotrež dyrbješe tradicionalne zetkanje w šwicarskim Davosu narunać.

W Němskej móžachu so zamołwići na zhromadnosć ludźi zepěrać. Dobry zakład běchu nimo toho solidne financy, kanclerka wuzběhny. Tak móžachu předewzaćelam a ludźom pomhać.

Kritisce wupraji so Angela Merkel hladajo­ na wotběhi w Němskej. „Njejsmy prosće spěšni dosć.“ Procesy su často běro­kratiske a předołho traja. Na tym dyrbja dźěłać. „Hdźež njejsmy derje wupa­dali, a to so hač do dźensnišeho po­kazuje, je pobrachowaca digitalizacija našeje towaršnosće.“ Přikład za to je špatne splećenje strowotniskich a komunalnych zarjadow a kubłanišćow.

Štó drje njeje so hižo raz nad błyskačom mjerzał, hdyž je něhdźe trochu přespěšnje jěł, so žołteje swěcy dla snano stróžił a bórze na to list z namołwu domoj dóstał, warnowanski pjenjez abo samo pokutu zapłaćić. W najhóršim padźe su konsekwency hišće wobšěrniše, hdyž je měrjena spěšnosć dowolenu wo wěstu hranicu překročiła. Často słyšiš, zo je to jenož „wotkasěrowanje“ wbohich šoferow, zo by prawje wjele pjenjez do komunalnych kasow přišło. Mje su tež hižo błysknyli, z čimž wšak bě na zbožo jenož warnowanski ­pjenjez zwjazany. Přiwšěm bych sej za 25 eurow něšto lěpše popřeć móhł hač čornoběłe foto. Po mojim zdaću pak kubłanski efekt tak špatny njeje. Hdyž wěš, hdźe ­błyskač steji, jědźeš pomałšo, štož je zmysł cyłeje wěcy. A wosobinsce spytam so tež hewak na spěšnosć dźeržeć. Přečasto dźě dožiwjam, zo mje něchtó přesćehnje a při přichodnym křižowanišću tola zaso přede mnu steji. Tele sekundy nikoho njewu­móža. Marian Wjeńka

Zwjazkowa policija wotnětka mjezu překročacy wobchad ze susodneje Čěskeje wótrišo kontroluje, kaž tule na namjeznym přechodźe Schmilka pola Bad Schandauwa. Zakład je wobzamknjenje zwjazkoweho knježerstwa, z kotrymž su 20 krajow jako wulce rizikowu kónčinu koronawirusa dla zastopnjowali. Wot póndźele trjebaja powołanscy dojězdźowarjo kóždy druhi dźeń negatiwny koronatest. Wuwzaća płaća za Saksku, hdźež trjebaja tajki test dwójce wob tydźeń. Wotpowědnje wulki bě spočatk tydźenja nawal na testowanišća na čěskim boku. W Sakskej płaći hižo wot 18. januara za dojězdźowarjow tydźenska winowatosć so testować dać. Foto: Christian Essler

Do nadróžneje latarnje zrazyło je policajske awto w sewjerorynsko-westfalskim Hammje, jako přesćěhowaše moped. Zastojnikam bě tón napadnył, dokelž spodźiwnje jědźeše a žanu čisłowu tafličku njeměješe. Jeho šofer signale ­policistow ignorowaše a ćěkaše. Awto policistow suny so z jězdnje, prasny do sćežora a wosta stejo. Mopedist móžeše tuž woměrje twochnyć.

Wodu kisałych kórkow na hładke zymske dróhi pryskać to tež w Braniborskej zajim zbudźa. Nadróžna słužba w delnjobayerskim Dingolfingu hižo wot lońšeho kórkowu wodu regionalneho zawoda město sypanskeje sele wužiwa. Na te ­wašnje chcedźa tam hač do tysac tonow sele zalutować. Braniborski krajny zawod za dróhi móhł sej tajki projekt hladajo ­na błótowske kórkowe zawody tohorunja deje předstajić.