Składnostnje 75. róčnicy załoženja UNO a wopyta jeje generalneho sekretara Antonija­ Guterresa (srjedźa, za nim zwjazkowa kanclerka Angela Merkel) w Němskej je so zwjazkowy sejm dźensa w Berlinje wurjadnje schadźował. Guterres wuzběh­ny w swojej narěči prócowanja Němskeje, rozrisać mjezynarodne konflikty a wob­cho­wać měr na swěće. Foto: dpa/Jens Krick

Spahn šćěpjenski porjad podpisał

pjatk, 18. decembera 2020 spisane wot:
Berlin (dpa/SN). Jako prawniski zakład za rjadowanje šćěpjenja přećiwo koronawirusej je zwjazkowy minister za strowotnistwo Jens Spahn (CDU) dźensa šćěpjenski porjad podpisał. Z nim je rjadowane, koho chcedźa jako prěnich šćěpić. Prěnjorjadnje maja wobydlerjo starownjow a hladarnjow a ludźo nad 80 lětami serum pře wirus dóstać, Spahn na nowinarskej konferency informowaše. W rjedźe cyle prědku steji nimo toho personal z wulkim rizikom natyknjenja, na přikład w medicinskich objektach, w nu­zowych přijimarnjach abo na stacijach, hdźež na koronu schorjenych lěkuja. Rjadowanje je trěbne, dokelž je mnóstwo šćěpiwa hišće wobmjezowane.

Habeck přećiwo wobrónjenym trutam

pjatk, 18. decembera 2020 spisane wot:
Berlin (dpa/SN). Předsyda Zelenych Robert Habeck ma w zwadźe wo wobrónjenju truta Zwjazkoweje wobory Heron TP zrozumjenje za poziciju SPD. „Mam wobrónjenje trutow za jara kritiske“, rjekny Habeck powěsćerni dpa. Z dotal zasa­dźenymi trutami častodosć prawo ludow ranjace wotprawjenja z powětra přewjeduja, politikar šwikaše. „Hrozy dalša awtomatizacija wójny, bjez toho zo bychu jasne prawidła zasadźenja knježili.“ SPD wobrónjenje trutow blokuje, wadźo so wo tym z koaliciskim partnerom CDU/CSU. Robert Habeck namjetuje, zasadźenje wobrónjenych trutow mjezynarod­nje rjadować. To by z jeho wida „nadawk Europskeje unije był“.

Braniborska policija kontroluje

pjatk, 18. decembera 2020 spisane wot:

Podstupim (dpa/SN). Braniborska policija wot prěnjeho dnja krutych naprawow w boju přećiwo koronawirusej po cyłym kraju kontrole zesylnja. Za to zasadźa wotnětka wšědnje hač do sto zastojnikow, zdźěli rěčnik policajskeho prezidija Torsten Herbst na naprašowanje nowinarjow. Hłowny zaměr je, při zwěsćenych ranjenjach postajenjow zamołwite za­rja­dy podpěrać. K tomu słušeja tež kontrole w „małym namjeznym wobchadźe“, Herbst rozłoži. Wot předwčerawšeho dyrbja wšitcy do karanteny, kotřiž běchu tež jeno skrótka w susodnej Pólskej nakupować. Wuwzaći su powołanscy dojězdźowarjo a šulerjo.

Policija na wobydlerjow apeluje, prawidła koronapandemije dla dodźeržeć. „Jeno zhromadnje so nam poradźi dalšemu rozpřestrěću korona­wirusa zadźěwać.“

„Čorny štwórtk“ wopominali

pjatk, 18. decembera 2020 spisane wot:

Pólski prezident Andrzej Duda wopory masakra w Gdańsku počesćił

Waršawa. Tydźenja wukazane postajenja Budyskeho a Zhorjelskeho wokrjesa nastupajo wobmjezowanja na Božich słužbach koronawirusa dla su samo w Pólskej kedźbnosć zbudźili. Tak rozprawja katolski tydźenik Gość Niedzielny wo zakazu swjateho woprawjenja a wobrubja to z wulkim panoramowym wobrazom města Budyšina. Runje tak pak rozprawja wo energiskej reakciji Zhorjelskeho biskopa Wolfganga Ipolta, kiž je wosobinsce znapřećiwił a tak docpěł, zo bu zakaz dźeń pozdźišo zaso zběhnjeny. Přiwšěm wostanje spěwanje w cyrkwjach dale zakazane. Pólscy žurnalisća zhonichu wot němskeje katolskeje powěsćernje KNA, zo bě Ipolt „zasaha do swobody wěrywuznaća“ dla protestował a nimo toho skoržił, zo njeje so nichtó ze zamołwitych do wukaza z nim dorěčał. Pólskim žurnalistam je wukaz zdobom dopokaz, zo sej zamołwići w Němskej při pytanju za žórłami koronainfekcijow žaneje ži­weje rady wjac njewědźa.

Wjele infekcijow

pjatk, 18. decembera 2020 spisane wot:
Berlin (dpa/SN). Prěni króć scyła je Roberta Kochowy institut w Němskej wjace hač 30 000 natyknjenjoww z korona­wirusom w běhu 24 hodźin registrował. Institut přizjewi dźensa 33 777 nowych padow. W ličbje zapřijatych je 3 500 padow z Badensko-Württembergskeje, kotrež njemóžachu institutej techniskich přičin dla wčera dale posrědkować. Tak wučinja woprawdźita ličba nowoinfek­cijow 30 277. Wčerawšu ličbu na 30 423 skoriguja. Ličba smjertnych woporow je wčera z 813 padami druhi najwyši staw po wudyrjenju pandemije docpěła. Cyłkowna ličba pacientow, kotřiž su w zwisku z koronawirusom zemrěli, je na 24 938 rozrostła.

To a tamne (18.12.20)

pjatk, 18. decembera 2020 spisane wot:

Wohnjostroj cyle hinašeho razu planuja silwester w Kölnje: Město třělenja raketow a praskotatow měli wobydlerjo nowe lěto tak witać, zo wot połnocy pjeć mjeńšin dołho swěcu zapinaja a zaso hasnu. Město lubi sej tak „najwjetši swěco­wy wohnjostroj swěta“. Wabjensku akciju­ za njón su dźensa zahajili. Praskotaki njejsu zasadnje zakazane, přiwšěm su ludźo namołwjeni so jich wzdać.

Tempowi hrěšnicy su Braniborskej tež loni tójšto dochodow wobradźili. Jeničce krajnemu etatej su 49,8 milionow eurow přepokazali. To bě 674 000 eurow wjace hač lěta 2018. Pjenjezy pochadźeja z pokutow a porokow z popłatkom. Po­licija je loni cyłkownje 1,7 milionow ranje­njow předpisaneje spěšnosće registrowała. Chłostali su tež ignorowanje čerwjeneje ample a předpisaneho wěstotneho pasa.

Pawšala za homeoffice

štwórtk, 17. decembera 2020 spisane wot:

Berlin (dpa/SN). Štóž dyrbi koronakrizy dla wot doma dźěłać, móže swoje wudawki přichodnje lěpje w dawkowym wotličenju zakótwić. Němski zwjazkowy sejm je dźensa pawšalu 600 eurow za tak mjenowany homeoffice wobzamknył. Wona ma za dawkowe wotličenje w lětomaj 2020 a 2021 płaćić. Potom, tak so nadźijeja, budźe koronapandemija přewinjena a ludźo zaso na swojim dźěłowym městnje. Zwjazkowa rada dyrbi zakonjej jutře hišće přihłosować.

Šćěpjenje drje wot 27. decembra

Berlin (dpa/SN). Strowotniscy ministrojo zwjazkowych krajow so na to hotuja, šćěpić ludźi wot 27. decembra přećiwo koronawirusej. Wo tym je zwjazkowy minister za strowotnistwo Jens Spahn (CDU) informował. Wón z toho wuchadźa, zo Europska agentura za dohladowanje lěkow přichodnu póndźelu wužiwanje noweho šćěpiwa němskeho předewzaća Biontech a jeho ameriskeho partnera, farmakoncerna Pfizer, dowoli.

Sudnistwo: Software ilegalna

Sakska policija tele dny na mjezy swobodneho stata k Čěskej a Pólskej sylnišo kontroluje. Kaž tule w Zhorjelcu pruwuja, hač su šoferojo z wěsteje přičiny po puću, a informuja jich wo płaćiwych postajenjach karanteny dla. Do Němskeje nawróćacych so kontroluja, hač njejsu sej w susodnym kraju praskotaki wobstarali. Foto: Matthias Wehnert

Nuzowy staw hač do lěta 2022

štwórtk, 17. decembera 2020 spisane wot:

Podstupim (dpa/SN). Braniborski krajny sejm je dźensa na swojim poslednim ­lětušim posedźenju hospodarski plan kraja za přichodne lěto schwalił. Naćisk etata bě rekordne wudawki nimale 15,5 miliardow eurow předwidźał. Předwidźane su tež nowe kredity wjace hač 2,7 miliardow eurow koronakrizy dla, štož je tohorunja rekord.

Zo bychu płaćiwy zakaz znowazadołženja wobešli, je krajny sejm wurjadne nuzowe połoženje hač do lěta 2022 deklarował. Opozicija bě hižo etat rozjimujo njewšědnje wulke zadołženje kraja kritizowała, runje tak kaž plan koalicije SPD, CDU a Zelenych, wurjadny nuzowy staw hnydom na dwě lěće postajić.

W běhu dnja chcyše braniborski sejm tež wo nowych raznych naprawach koronakrizy dla rozsudźić, kotrež nětko w Němskej płaća. Powšitkownje liča z tym, zo knježaca „keniaska“ koalicija nowym naprawam přihłosuje.

Serbska debata

nowostki LND