Dospołnje wupalene leži pasažěrske lětadło na kromje ...
Strach wulkeje wody wostanje
Berlin (dpa/SN). W kónčinach wulkeje wody Němskeje so dale starosća, zo móhł staw wody w rěkach dale přiběrać. Němska wjedrarnja je hač do jutřišeho wjetše mnóstwa spadkow připowědźiła. Wosebje potrjechene su dźěle Delnjeje Sakskeje, Sewjerorynsko-Westfalskeje, na juhu Saksko-Anhaltskeje a na sewjeru Durinskeje. We wuchodnej Bayerskej su dźensa rano třeći warnowanski schodźenk wukazali. Hač do jutřišeho wočakuja na zapadźe Němskeje sylny dešć a hač do 60 litrow wody na kwadratny meter, na horach hač do sto litrow.
W kónčinach wulkeje wody na krajnej mjezy Saksko-Anhaltskeje a Durinskeje wostanu šule hač do kónca tydźenja zawrjene. Nuzowe zastaranje dźěći je zaručene. Wjacore mjeńše rěki w Durinskej su mjeztym swoje rěčnišćo wopušćili.
Hisbollah chce so wjećić
UNO za deeskalaciju w Ukrainje
Genf (dpa/SN). Wurjadny komisar UNO za čłowjeske prawa Volker Türk je Rusku a Ukrainu hladajo na najnowše mjezsobne nadběhi z ciwilnymi woporami k zdźeržliwosći namołwjał. „Alarmowace přiwótřenje njepřećelskosće, dźesatki morjenych ciwilistow w Ukrainje a Ruskej“, piše běrow Türka wčera wječor w internetnej zdźělence. Humanitarne ludowe prawa swojowólne nadpady na ciwilne objekty zakazuja. Za škit ciwilneje ludnosće a k dodźerženju ludoweho prawa žada sej Türk „hnydomne kročele deeskalacije“.
Do toho bě ličba nadpadow ruskich trutow a raketow na Ukrainu přiběrała. Po informacijach ukrainskeho prezidenta Wolodymyra Zelenskeho je Ruska minjene dny sta raketow a trutow do směra na Ukrainu startowała. Při tym je tójšto ludźi žiwjenje přisadźiło.
W ruskim měsće Belgorodźe su kónc tydźenja při wobtřělenju ze stron Ukrainy 24 ciwilistow morili. Bě to najwjetša strata tutoho razu za Rusku w mjeztym dwě lěće trajacej wójnje. Ruski prezident Wladimir Putin bě na to hišće sylniše nadpady na Ukrainu připowědźił.
AfD zakazać?
Berlin (dpa/SN). Najebać wólbne wuspěchi ma šefina SPD Saskia Esken za wažne, zakaz AfD pruwować. „Zo móhli strony scyła zakazać, dyrbja zamołwići dokładne prawniske postajenja wobkedźbować“, wona powěsćerni dpa zwurazni. „Je wažne, zo so wo zakazu AfD rěči a tak tež wolerki a wolerjo rozbudźa.“ Po słowach Esken je AfD přećiwo demokratiji. Jako wopodstatnjenje mjenuje wona, zo je AfD dźěl prawicarskoekstremneje syće a wjedźe lisćiny jej njelubych kritiskich žurnalistkow a žurnalistow a zarjaduje přizjewjenske portale za wučerjow, kotřiž so kritisce wo AfD wuprajichu. „Strona wužiwa kóždu temu a ludźi naškara.“
Rozsudnje jednać
Drježdźany (dpa/SN). Sakska chce po słowach wobswětoweho ministra Wolframa Günthera (Zeleni) wjace za škit družin činić. „Dźensa su w Europje škitane biotopy a družiny zwěrjatow a rostlinow sylnišo wohrožene hač w lěće 2009. Hač do lěta 2030 chcemy tónle trend změnić“, wuzběhny wón wčera w rozmołwje z powěsćernju dpa. Swobodny stat je škit družin wot lěta 2020 jasnje přiwótřił a přidatne resursy k dispoziciji stajił.
„Tema škit družin a škit biotopow je w Sakskej prezentna“, Günther wuzběhny. Škit družinow hižo w izolowanych kónčinach njepraktikuja, ale na wšěch wužiwajomnych přestrjenjach. „To wšitko je nuznje trěbne, přetož mrěće družinow a zhubjeny žiwjenski rum dźe tuchwilu jara spěšnje. Dyrbimy rozsudnišo jednać.“
Wot prěnjeho sakskeho programa za biodiwersitu z lěta 2009 je so połoženje hišće raz jasnje přiwótřiło. Połoženje wuskutkuje so tež na žiwjenje čłowjekow a hospodarjenje.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (03.01.24)
Powjaznicu zlemiła je myš w Awstriskej – runje silwester. Defekta dla dyrbješe něhdźe 150 hosći w panoramowym hosćencu na tysac metrow wysokej horje Karren pola Dornbirna dlěje wutrać hač planowane. Po informacijach medijow bě myš kabl překusała a elektroniski system powjaznicy zlemiła. Wopytowarjow dyrbjachu z awtami z hory dowjezć.
Plěsniwe całty za policistow w silwesterskej nocy w Berlinje drje změja prawniske sćěhi. Dźěl całtow bě skaženych. Swačinu za zastojnikow bě jedna z Berlinskich cateringowych firmow přihotowała a w chłódźenych jězdźidłach silwester připołdnju na policajsku stražu přiwjezła. Tam składowachu pakety w chłódźakach. Najebać to běchu całty skažene. W Berlinje bě silwester 3 000 zastojnikow zasadźenych. Kelko z nich je plěsniwe całty dóstało, njeje dotal znate.
Hody w Betlehemje
Jerusalem (B/SN). Najebać wójny su kaž kóžde lěto mnichojo němskorěčneje abtownje Dormitio w Jerusalemje lisćinu mjenow a naležnosćow 123 000 wosobow ze wšeho swěta na dźesać kilometrow zdalene městno Jězusoweho naroda donjesli. Akcija steji pod hesłom „Njesu twoje mjeno w Božej nocy do Betlehema.“ Wěriwi su swoje mysle napisali; lětsa zwjazachu je z próstwu wo składowanje pjenjez wosebje za socialne projekty.
Tradicija hodownych hrow
Zell am Main (B/SN). Předstajenje naroda Jězusdźěćatka je před 800 lětami Franz von Assisi zawjedł. W adwenće lěta 1223 bě wón wo to prosyło, z wołom a wóslikom za městnosću w skaliznatej kónčinje pytać. Wón chcyše hodownu stawiznu w swjatym kraju w pomjatku ludźi tak žiwu kaž móžno zachować. Mjeztym nimale kóžda wosada hodownu hru předstaja.
Kolebanje Jězusdźěćatka
Semester zakónčili
Praha (dpa/SN). Na Karlowej uniwersiće w Praze je zymski semester filozofiskeje fakulty zakónčeny. Přičina toho je nadpad 24lětneho studenta, kiž bě tam 21. decembra 14 ludźi zatřělił. Kaž filozofiska fakulta minjeny pjatk zdźěli, wotměja so pruwowanja a konsultacije jenož dobrowólnje. „Nikomu njehrozy njewuspěšne zakónčenje studija“, ze zdźělenki uniwersity wuchadźa. Hłowne twarjenje fakulty je techniskich přičin dla hišće hač do kónca januara zawrjene.
„FDP měła so bóle přesadźić“
Berlin (dpa/SN). Po naprašowanju čłonow FDP z prašenjom, hač ma strona dale w amplowej koaliciji wostać, ma předsyda FDP Wolfgang Kubicki jasne žadanja. Tak dyrbjała strona swoje zajimy bóle přesadźić. „Na tym dyrbimy dźěłać“, wón dźensa rano w sćelaku Deutschlandfunk wujasni. Wón namołwješe předewšěm Zelenych, kotřiž su minjene tydźenje dźěl zhromadnych planow cofnyli. Dale sej Kubicki žadaše, ratarjow w zwisku z lětušim zwjazkowym etatom njepoćežować.
Situacija dale napjata
