Pomoc chorownjam zwyšić
Berlin (dpa/SN). Němska towaršnosć chorownjow starosća so wobmjezowanjow w hojernjach korony dla, wšako njemóža tam hižo regularnje hospodarić. Wjele operacijow je wotprajenych. „Jeli zwjazkowe knježerstwo pomoc jasnje njezwyši, njemóža chorownje hižo klětu w prěnim kwartalu mzdu personalej zapłaćić“, wuzběhny prezident towaršnosće chorownjow Gerald Gaß. Pjenjezy z regularneho zastaranja wšudźe pobrachuja a chorownje maja jenož hišće wobmjezowane financne srědki.
Ratarjo dale protestuja
Berlin (dpa/SN). Sta ratarjow protestuje tež dźensa w Delnjej Sakskej a Sewjerorynsko-Westfalskej a blokěruje ze swojimi traktorami zajězdy k składam kupnicow Aldi. Z tym skedźbnjeja na politiku niskich płaćiznow discountera. „Ratarjo wostanu tak dołho, doniž so Aldi njehiba a konstruktiwne namjety sposrědkuje“, zdźěli rěčnik protestneho hibanja w Delnjej Sakskej Anthony Lee. Přičina blokady je dalše zniženje płaćizny za butru.
Biden blokady Trumpa kritizuje
Na wikach přećow, kotrež su wčera w peruskim měsće Lima ...
Lědma štó wěri do wukrajneho dowola 2021
Berlin (dpa/SN). Jenož kóždy dźesaty wobydler Němskeje do toho wěri, zo budźe w lěću přichodneho lěta najebać koronapandemiju zaso wšudźe dowol móžny. Při woprašowanju slědźenskeho instituta YouGov w nadawku powěsćernje dpa bě jenož dźewjeć procentow ludźi měnjenja, zo budźe njewobmjezowane pućowanje po wšěm swěće potom zaso móžne. 77 procentow tole njewěri, 13 procentow njemóžeše k tomu ničo rjec.
Wysokich ličbow infekcijow dla je zwjazkowe knježerstwo nimale 150 ze wšěch 200 krajow swěta jako rizikowu kónčinu zastopnjowało a wotpowědne warnowanje před pućowanjom wuprajiło. We wosom dalšich krajach płaći tole zdźěla. Warnowanja wonkowneho ministerstwa pućowanje njezakazuja, maja pak turistow wot jězbow wottrašić.
Lockdown najskerje podlěša
Berlin (dpa/SN). Po słowach šefa kanclerskeho zarjada Helge Brauna budźe so korona-lockdown prawdźepodobnje podlěšić. Hač do přichodneho zetkanja ministerskich prezidentow ze zwjazkowej kanclerku Angelu Merkel (CDU) 5. januara njebudźe hišće móžno, zahajene wobmjezowanja doskónčnje posudźować. Hišće hač do 10. januara wostanu wobchody, šule a pěstowarnje zawrjene. Kak ma po tym dale hić, chcedźa zamołwići 5. januara diskutować.
Tež ministerski prezident Posaarskeje Tobias Hans (CDU) je so za to wuprajił, lockdown podlěšić. Aktualne ličby infekcijow njehodźa so tuchwilu konkretnje posudźować. Jeho zaćišć je, zo su so ludźo přez hody po postajenjach měli. Hans starosća so bóle wo silwester. „Boju so, zo budźe so silwester swjećić. Tole měli nuznje wuzamknyć“, wón wuzběhny.
Mjeztym su němske strowotniske zarjady dźensa 12 892 nowych infekcijow přizjewili. Ličba pak njeje wuprajiwa, wšako su zarjady minjene dny jenož mało ludźi testowali.
Priwilegi za šćěpjenych?
Priwatne předewzaća móhli w zrěčenjach wuwzaća postajić
Berlin (dpa/SN). Po zahajenju koronašćěpjenjow přiběra diskusija wo tym, hač měli šćěpjeni lěpšiny na přikład na zarjadowanjach, w hosćencach abo při lětach dóstać. Politikarjo SPD a Unije, kotřiž so we wobłuku prawow wuznaja, widźa njeregulowane postajenja, po kotrychž móhli tajke wuwzaća zmóžnić. Tež škitarjo přetrjebarjow warnuja. Porno tomu ma frakcija FDP wuwzaća zasadnje za woprawnjene.
Žane praskanje w městomaj
To a tamne (29.12.20)
Podhladne wačoki před policajskej stražu w Pforzheimje su so jako słódka překwapjenka wukopali. Njeznaty bě pjatk wječor kófer a wjacore kisty před stražu wotstajił a tak wulke zasadźenje policije zawinował. Kónčinu wokoło twarjenja zaraćichu, fachowcy za rozbuchadła dyrbjachu ze Stuttgarta přijěć. Po dwěmaj hodźinomaj bě alarm nimo: W kófrje a kistach běchu słódkosće a hrajki. Čehodla bě muž wěcy tam stajił a so potom spěšnje zminył, nětko přepytuja.
Wosamoćeny starc je w italskej Bologniji patoržicu wječor policiju wołał, zo móhł sej z někim na hody připić. Dźěći su daloko preč a wón čuje so deprimowany, 94lětny skoržeše. Na to so třo policisća k njemu podachu. Starc powědaše anekdoty wo swojich wójnskich dožiwjenjach a wopyt carabinierijow z widejowym telefonatom znatym hordźe prezentowaše.
Žłobik a hodowny štom stajili
Rom (B/SN). Na Pětrowym naměsće w Romje su na swjatočnej ceremoniji srjedź decembra žłobik natwarili a hodowny štom zaswěćili. Nadobne figury žłobika z keramiki su z regiona Abruzzow nad Adrijatiskim morjom, hodowny štom pak z južneje Słowjenskeje. 30 metrow wysoki šmrěk waži sydom tonow. Kardinal Giuseppe Bertello dźakowaše so darićelam a zwurazni, zo je žłobik kedźbyhódne wuměłstwo a šmrěk zwuraznja rjanosć Słowjenskeje.
Wulke a małe ćeže
Maas płunowoda dla kruty
Berlin (dpa/SN). Wonkowny minister Heiko Maas (SPD) wostanje w zwadźe z USA płunowoda Nord Stream II dla tež hladajo na bližacu so změnu mocy w Běłym domje njepowalny. „Njetrjebamy wo europskej suwereniće rěčeć, hdyž pod tym rozumimy, zo přichodnje jenož hišće to činimy, štož Washington chce“, rjekny Maas powěsćerni dpa. Hladajo na noweho prezidenta USA Joe Bidena minister potwjerdźi, zo njebudźe zwjazkowe knježerstwo swoje měnjenje k płunowodej z Ruskeje změnić.
Trump paket podpisał
Washington (dpa/SM). Amtěrowacy prezident USA Donald Trump je wot kongresa ze strony přesahowacej wjetšinu schwaleny konjunkturny paket we wobjimje 900 miliardow dolarow ze swojim podpismom do skutka stajił. Hewak bychu přistajeni knježerstwa wot jutřišeho swoje dźěło přetorhnyć dyrbjeli. Paket ma wot krizy potrjechenym wobydlerjam pomhać, hospodarstwu nowe impulsy dawać a šćěpjenja podpěrować.
Połojca systemow zasadźomna
