Drježdźany (B/SN). Krajny biskop Tobias Bilz pokaza so w přinošku za pokutny dźeń dźakowny za to, zo je tón w Sakskej přikazany swjaty dźeń. „To je wulki dar. Móžemy přidatny dźeń wužiwać, zo bychmy sej swój žiwjenski puć wuwědomili, a móžemy z Bohom wo tym rěčeć.“ Čas tuchwilneho nowemberskeho lockdowna ma biskop Bilz za wužadanje a za to, zo „wobmjezowanja ćešo znjesemy hač w nalěću. Mnozy storča na hranicy swojich mocow“. Bilz wabješe za sylnišu dowěru do Jězusa, kiž je wšitkich bědnych a trapjacych k sebi wołał. Nimo toho napomina wěriwych za kedźbliwiši mjezsobny wobchad.
Koronatelefon wotšaltowany
Zhorjelc (AK/SN). Planowane znowawotewrjenje Zhorjelskeje synagogi je na spočatk lěta 2021 přestorčene. Přičina je aktualne napjate połoženje koronawirusa dla we wokrjesu Zhorjelc. To zdźěli předsyda spěchowanskeho kruha Zhorjelskeje synagogi dr. Markus Bauer.
„Nowy termin hišće nimamy, zawěsće pak budźe tón bórze w nowym lěće. Synagogu wotewrějemy potom jako kulturny forum w režiji města Zhorjelca. Kuplowa žurla budźe za koncerty, přednoški a konferency k dispoziciji. Mjeńše zarjadowanja móžemy na žonjacej emporje wotměć, dźěłarnički w bywšej stwě rabinera“, podšmórny předsyda spěchowanskeho kruha. W modlerni bywšeje wšědneje synagogi budu židźa přichodnje swoje nutrnosće swjećić móc. Spěchowanski kruh so wjeseli, zo je zaměr, synagogu znowa wotewrěć, bórze docpěty. 82 lět po pogromowej nocy maja židźa w Zhorjelcu skónčnje zaso swójsku rumnosć, hdźež móža so modlić.
Brüssel (dpa/SN). Prezidentka komisije EU Ursula von der Leyen a britiski premierminister Boris Johnson chcyštaj dźensa wječor telefonisce rozjimać, hač njeje w poslednjej mjeńšinje tola hišće wikowanske zrěčenje mjez Brüsselom a Londonom brexita dla móžne. Tajke zrěčenje by chaotiskim poměram zadźěwało, hdyž Wulka Britaniska Europsku uniju kónc lěta doskónčnje wopušći. Dotal njeje žadyn wuspěch wotwidźeć.
Wjace za brónjenje wudali
Stockholm (dpa/SN). Wudawki za brónjenje po wšěm swěće su tež loni dale přiběrali, kaž mjezynarodny měrowy slědźenski institut Sipri informuje. Po jeho wobličenjach je 25 wodźacych brónjenskich předewzaćow w lěće 2019 nimale 300 miliardow eurow zasłužiło. To je 8,5 procentow wjace hač lěto do toho. Najwjetši wikowar bróni su znowa USA. Tamniše dwanaće firmow je 61 proc. wšěch bróni na swěće předawało. Němske firmy njejsu mjez 25 najwjetšimi.
Prawiznik Trumpa pozitiwny
Budyšin (SN/MkWj). Zapósłanc CDU w Sakskim krajnym sejmje Marko Šiman wobydlerjow z naležnym apelom prosy, wšitko činić, zo by so dalšemu rozšěrjenju koronawirusa zadźěwało. Hladajo na połoženje w Hornjej Łužicy a w Budyskim wokrjesu je bytostne, zo wostanje strowotniski system dale dźěłakmany, rjekny Šiman na telefoniskej nowinarskej rozmołwje w Budyšinje. „Wostanjemy-li wšitcy disciplinowani, móžemy chorosć přewinyć.“ Wosebje wažne su zapósłancej tež zawody, kotrež dyrbja schorjenych abo w karantenje přebywacych přistajenych narunać. Dźěło poradźowarnjow, častodosć jenički zwisk wosamoćenych ludźi, měło dale pjenježnje podpěrane być.
Berlin (dpa/SN). Politikarjo Zwjazka a krajow žadaja sej razniše wobmjezowanja za kónčiny z wosebje wulkimi ličbami koronainfekcijow. Bayerski kabinet bě hižo wčera nowe naprawy wobzamknył. Mjeztym wo tym debatuja, hač njedyrbjeli so ministerscy prezidenća hišće do hód znowa zetkać. Dotal maja woni dalšu konferencu hakle 4. januara planowanu. Bayerski ministerski prezident Markus Söder (CSU) bě konferencu ministerskich prezidentow nastorčił. Tajka budźe „prawdźepodobnje“ trěbna, dokelž měli so wšitcy hišće raz wo tym rozmołwjeć, što so hody a silwester stanje. Konferencu zwołać žada sej tež strowotniski fachowc SPD Karl Lauterbach. Wón měni, zo měli wšitke wobchody po hodźoch „znajmjeńša dwaj tydźenjej“ zawrjene wostać.
Ze suwadłom měškow w swójbnym drive-inje je swj. Mikławš w Allgäuju dary rozdźělał. 38 swójbow bě so za wčerawšu akciju při gratowni wohnjoweje wobory w Rettenbergu w Hornim Allgäuju přizjewiło a zamołwitym dary do toho přiwjezło. Wšitko wotmě so bjez kontakta: Kóžde awto měješe 15 mjeńšin chwile, sej po měšk darow při suwadle dojěć. Loni bě Mikławš na nawjes přijěł. Tónkróć dyrbjachu so korony dla z nuzowej wariantu spokojić abo akciju wupadnyć dać.
Pječwa dla biłoj staj so mužej w kupnicy žiwidłow w badensko-württembergskim Rheinfeldenje. 56lětny bě 22lětneho napominał, zo njesmě pječwo z rukomaj z regala brać. Tón jeho na to křiwdźeše. Połoženje so tak přiwótři, zo so wobaj na kóncu plistowaštaj a do so biještaj. Policija přepytuje nětko přećiwo woběmaj ranjenja ćěła dla.
New York (dpa/SN). Generalny sekretar UNO António Guterres je sej wěsty, zo njeby koronapandemija tajke rozměry měła, bychu-li kraje swój čas poručenja Swětoweje strowotniskeje organizacije (WHO) dodźerželi. WHO bě wot wšeho spočatka „fakty a wědomostnu orientaciju“ podała, rjekny Guterres wčera k zahajenju dwudnjowskeje wurjadneje zhromadźizny UNO. Zwjazkowa kanclerka Angela Merkel (CDU) namołwješe, rólu WHO w pandemiji dale sylnić.
Wjetšina za kruty silwester
Berlin (dpa/SN). Snadna wjetšina ludźi w Němskej wita, zo měli wobmjezowanja koronawirusa dla hody trochu zběhnyć. To je wuslědk reprezentatiwneho naprašowanja w nadawku sćelaka ARD. Tak ma 53 procentow prašanych planowane wolóženja za prawe, 44 proc. porno tomu za wopačne. Na wšě 68 proc. móžne zběhnjenje wobmjezowanjow chětro kritisce wobhladuje, jeničce 30 proc. je wita.
Rozsudźa wo imuniće