Za reformu BND

wutora, 16. junija 2015 spisane wot:
Berlin (dpa/SN). SPD žada sej wot kanclerskeho zarjada hišće do přichodnych wólbow zwjazkoweho sejma 2017 zasadnu reformu němskeje tajneje słužby BND. Tole njesměło so dlěje wotstorkować, rěka w dokumenće SPD, kotryž powěsćerni dpa předleži. 16stronski koncept předwidźi jasne prawidła za dźěło BND, mjez druhim při wobčušlenju wukrajnych staćanow w Němskej.

Bičk dyrbi do jastwa

wutora, 16. junija 2015 spisane wot:
Darmstadt (dpa/SN). Namócneje smjerće studentki Tugce dla dyrbi 18lětny Sanel M. tři lěta do jastwa. Darmstadtske krajne sudnistwo jeho dźensa po młodźinskim chłostanskim prawje ranjenja ćěła ze smjertnym wukóncom dla zasudźi. 18lětny je před sudnistwom přiznał, zo bě 22lětnu loni w nowembru na parkowanišću do mjezwoča bił. Holca padny na to do komy, z kotrejež hižo njewotući.

Ludźi wuchowali

wutora, 16. junija 2015 spisane wot:
Berlin (dpa/SN). Němska fregata „Schleswig-Holstein“ je wčera w Srjedźnym morju 544 ćěkancow wuchowała. Ludźo, mjez nimi 61 dźěći, běchu z drjewjanymi čołmami z Libyskeje do Italskeje po puću. Dotal je marina 4 000 ludźi wuchowała.

To a tamne (16.06.15)

wutora, 16. junija 2015 spisane wot:

W měšćanskich wodomjetach a studnjach so kupać abo nic – wo tym so tuchwilu w morawskej stolicy Brnje wadźa. Mnozy so tam na horcych dnjach rady wočerstwjeja. Měšćanska policija pak kupanje w studnjach zakazuje. Nětko chcedźa w měšćanskej radźe wo tym wuradźować a naležnosć wotpowědnje rjadować, kaž morawske nowiny pisaja.

Spěwanje honača w Kamjeničanskej coologiskej zahrodźe je peticiski wuběrk Sakskeho krajneho sejma zaběrało. W susodstwje bydlacy muž bě so wospjet hary dla hóršił, kaž z rozprawy wuběrka wuchadźa. Tónkróć so muž nócneho spěwanja honača dla mjerzaše. Hižo do toho bě so na pawy a wopicy hóršił. Peticiski wuběrk jemu wotmołwi, zo wšak móže pola někotrych zwěrjatow hač do sto decibelow hary nastać. Přiwšěm so ze zwěrjencom dojednachu, honače jenož hišće wěsty čas pod hołym njebjom dźeržeć.

Łužica (16.06.15)

wutora, 16. junija 2015 spisane wot:

Předstajitaj zhromadny projekt

Zhorjelc (SN/ch). Zhromadny projekt „Zhorjelc ART“ přihotuja tuchwilu w Zhorjelcu a Wrócławju za lěto 2016. Město nad Nysu budźe potom europska kulturna stolica. Wrócławski měšćanski prezident Rafał Dutkiewicz a Zhorjelski wyši měšćanosta Siegfried Deinege staj z teje přičiny hižo lěta 2013 zhromadnu wustajeńcu wuměłskich twórbow w Zho­rjelcu­ wobzymknyłoj, kaž ze zdźělenki Zhorjelskeje radnicy wuchadźa. Při­chod­nu wutoru chcetaj wonaj projekt na zhromadnej nowinarskej konferency předstajić.

Wjele předewzaćow so zasydliło

Wikowanski koncern Metro je swoju wotnožku Galeria Kaufhof – mjez nimi tež Lipšćansku­ kupnicu – kanadiskemu wikowanskemu koncernej Hudson‘s Bay za 2,8 miliardow eurow předał. Nowy wobsedźer je připowědźił, zo chce w kupnicach inwestować­. Dźěłarnistwo ver.di sej wot njeho žada, zo dalewobstaće wšěch wotnožkow pisomnje zaruči a znajmjeńša pjeć lět dołho žane kupnicy njezawrje. Kaufhof ma w Němskej a Belgiskej 21 500 sobudźěłaćerjow. Foto: dpa/Jan Woitas

Mjenje, ale moderniše jadrowe brónje

póndźela, 15. junija 2015 spisane wot:
Stockholm (dpa/SN). Atomowe mocy wuwiwaja po mjeńšej ličbje atomowych brónjow spochi na tym, swoje systemy modernizować. Tole wuchadźa z rozprawy šwedskeho měroweho slědźenskeho instituta Sipri, kotruž dźensa w Stockholmje předstajichu. Po tym su Ruska a USA swoje składy atomowych bróni wotpowědnje zrěčenju redukowali. Runočasnje stej pak wobaj krajej započałoj swój wojerski arsenal wobšěrnje modernizować. Spočatk lěta mějachu USA kaž tež Ruska­ po trochowanju fachowcow 15 850 nuklearnych bróni w swojich wojerskich­ składach.

Reforma škita datow wobzamknjena

póndźela, 15. junija 2015 spisane wot:
Luxemburg (dpa/SN). Justicni ministrojo Europskeje unije su na swojim dźensnišim posedźenju w Luxemburgu reformu dotalneho rjadowanja za škit datow wobzamknyli. Nowe postajenja maja wužiwarjam interneta lěpši škit datow skićić. Sobu najwažniši dypk je „prawo na zabyće“. Po tym smědźa wužiwarjo interneta na tym wobstawać, zo so jich wosobinske daty w syći zaso wotstronja. Přichodnje dyrbja ludźo dalewužiwanju swojich datow wuraznje přihłosować. Internetnym koncernam so chłostanja napołoža, hdyž postajenje ranja. Wobšěrne noworjadowanje naruna dotalne směrnicy za škit­ datow z lěta 1995, kotrež su zestarjene. Jednotliwe staty EU dyrbja nowym postajenjam hišće přihłosować.

Njehódna ćahańca

póndźela, 15. junija 2015 spisane wot:

Ćahańca grjekskeje zadołženja dla je spochi hórša – a zdobom dale a njezrozumliwiša. Pjenjezydawarjo wobstawaja na raznych reformach, Athenske knježerstwo ludnosći dalše wobćeženja njepřicpěwa.

Brüssel/Athen (dpa/SN/K). Wčera bě prezident komisije Europskeje unije spytał sposrědkować, wuspěcha wšak žadyn njedocpěł. Jeho rěčnik po tym w belgiskej stolicy Brüsselu rjekny: „Prezident Jean-Claude Juncker wostanje přeswědčeny, zo hodźi so ze zesylnjenymi prócowanjemi Grjekskeje wo reformy kaž tež z dobrej wolu wobeju stron do kónca měsaca rozrisanje namakać.“

Čas woprawdźe ćěka. 30. junija so dwójce podlěšeny pomocny program za Grjeksku kónči, potom hrozy jej statny bankrot. Nimo toho dyrbi Athen 30. junija měnowemu fondsej 1,6 miliardow eurow wróćić. Reformy pak su wuměnjenje za wupłaćenje sydom miliardow eurow pomocnych pjenjez.

BUGA po smjertnym njezbožu zawrjena

póndźela, 15. junija 2015 spisane wot:
Rathenow (dpa/SN). Teren zwjazkoweje zahrodneje přehladki (BUGA) w Rathenowje wostanje drje hišće hač do pjatka zawrjeny, po tym zo bě tam 49lětny muž sobotu smjertnje znjezbožił. Při sylnym njewjedrje bě jeho něhdźe 25 centimetrow tołsta hałza zarazyła. Jeho mandźelska poćerpje šok. Statne rěčnistwo pad přepytuje. K rumowanju škodow dyrbja ćežku techniku zasadźić. Nimo toho dyrbja skóncowane stólcy, blida a ławki zaso narunać. Fachowcy chcedźa nětko tež wěstotu štomow pruwować. Hałza bě so při sylnym wichoru ze zliwkami a krupami dźesać metrow wysoko wotłamała a na muža padnyła. Hakle wohnjowym wobornikam so poradźi hałzu wotstronić a muža wuswobodźić. Tón pak bě mjeztym wudychał. Organizatorojo njemějachu pokiwy na bližace so njewjedro. Jako so leć započa, su teren z wjacorymi tysac wopytowarjemi hnydom ewakuowali.

nawěšk

nowostki LND