Wobmjezowanja hač do hód?
Berlin (dpa/SN). K dalšemu redukowanju koronainfekcijow chcedźa tuchwilne wobmjezowanja zjawneho žiwjenja hač do hód podlěšić. Ministerscy prezidenća zwjazkowych krajow su so wčera wječor na to dojednali, hač do kónc nowembra wobstejace naprawy najprjedy raz hač do 20. decembra podlěšić. Doskónčnje rozsudźić chcedźa na jutřišim wuradźowanju ze zwjazkowej kanclerku Angelu Merkel (CDU).
By-li k podlěšenju wobmjezowanjow dóšło, bychu hosćency kaž tež wólnočasne a kulturne institucije, kotrež njesmědźa wot spočatka nowembra wjace dźěłać, dale zawrjene wostać dyrbjeli.
Ministerscy prezidenća ludźi namołwjeja, so do hodownych swjatych dnjow do wjace dnjow trajaceje izolacije podać. Silwesterski wohnjostroj měli na naměstach zakazać, zo njebychu so wjetše skupiny ludźi wutworili. Na šuli, předewšěm w rizikowych kónčinach, měli šulerjo tež we wučbje nahubnik nosyć. Dźěłodawarjo měli hodowne prózdniny podlěšić a ludźom dźěło doma zmóžnić.
Ptača gripa w Braniborskej
Wjacore zwjazkowe kraje mjeztym potrjechene – plahowarnje wohrožene
Podstupim/Berlin (dpa/SN). Třeći pad ptačeje gripy su w Braniborskej wobkrućili. Kaž ministerstwo za škit přetrjebarjow wčera zdźěli, su we wokrjesu Prignitz zahinjene pólne huso pozitiwnje na wirus H5N8 testowali. Friedricha Löfflerowy institut je podhlad po informacijach ministerstwa mjeztym wobkrućił. Huso běchu spočatnje při haće widźeli a wobkedźbowali, zo so chětro spodźiwnje zadźerži, krajnoradny zarjad informowaše. Něšto po tym běchu je zahinjene na kromje hata namakali. Mějićeljo wokolnych kormjernjow pjerizny su namołwjeni, swój wobstatk wobkedźbować a kóždužkuli njenormalnosć zamołwitym zarjadam hnydom přizjewić.
Dwě miliardźe dozow chudym
New York (dpa/SN). W boju přećiwo koronapandemiji chce UNICEF, dźěćacy pomocny skutk organizacije UNO, dwě miliardźe dozow šćěpjenskeho seruma do cyłkownje 92 chudych krajow pósłać. Logistiske přihoty su hižo zahajene, kaž UNICEF wčera zdźěli. Tež miliardu sykawow chcedźa tam pósłać.
„Samsny čas, w kotrymž dale na tym dźěłaja šćěpiwo přećiwo koronawirusej wuwiwać, zesylnja UNICEF swoje napinanja, zhromadnje z lětanskimi předewzaćemi, transportnymi firmami, łódźnistwowymi linijemi a dalšimi logistiskimi zjednoćenstwami tutón žiwjenje wuchowacy srědk tak spěšnje kaž móžno dodawać, rjekny direktorka zastaranskeje wotnožki UNICEF Etleva Kadilli. Tak chcedźa sej dosć transportnych móžnosćow za „historiski mamutowy nadawk“ zawěsćić. „Wobstarać, dodawać a rozdźělić serum přećiwo koronawirusej drje budźe najwjetša hdy zahajena operacija.“
Wot januara je UNICEF w boju přećiwo pandemiji po wšěm swěće srědki kaž škitne nahubniki, kitle, dychanske nastroje a srědki za testy w hódnoće 160 milionow eurow rozesłała.
To a tamne (24.11.20)
Noze za konopejom stej pytaneho skućićela w hornjofrankskim Kulmbachu přeradźiłoj. Policiju běchu rozestajenja dla do bydlenja wołali. Zwada wukopa so jako łahodna. Při tym pak wuhladachu policisća noze. 32lětny, kotrehož z wukazom zajeća pytachu, bě na wopyće w bydlenju a bě sej pjany za konopejom wusnył. Zastojnicy jeho spóznachu a jemu ruce sputachu. Potom jeho hakle wubudźichu.
Swojorazny foto transportera, kiž dalši transporter transportowaše, na kotrymž steješe wosobowe awto, je Krefeldska policija w interneće wozjewiła. Policija bě awto wažiła a zwěsćiła, zo je wozydło wo 30 procentow přećežke. Bychu-li zamołwići za awto předpisanu maksimalnu wahu dodźerželi, bychu z nim tež w tutej kurioznej formje dale jěć móhli, policija na naprašowanje zajimcow zdźěli.
Reichsbürgerojo su we wjacorych worštach ludnosće
Dohlady do sceny tak mjenowanych reichsbürgerow zmóžni minjenu wutoru webinar Sakskeje krajneje centrale za politiske kubłanje. Drježdźanski politologa Sebastian Trept je tam jara nazornje referował a wuwabi mjez něhdźe 40 wobdźělnikami tójšto prašenjow.
Drježdźany (SN/at). Politiske kubłanje w cyber-rumje je Sakska krajna centrala za politiske kubłanje z druhej žołmu koronapandemije zaso do srjedźišća swojeho skutkowanja stajiła. Zazběhowa tema, zarjadowanje bě poprawom w Annabergu-Buchholzu planowane, bě na hibanje wusměrjena, wo kotrymž drje přeco zaso słyšiš, mnohim ludźom pak dokładniše informacije pobrachuja. Tu nawjazachu wuwjedźenja Sebastiana Trepta, kiž po swójskich słowach „wot lěta 2016 na reichsbürgerach lěpi“. Wot toho lěta wustawowy škit jich wobkedźbuje.
EKD-synodu skrótšić
Hannover (B/SN). Tež njewotwisnje wot koronapandemije chce ewangelska cyrkej swoje lětne zhromadźizny krótšić, dokelž dyrbi lutować. Ewangelska cyrkej w Němskej (EKD), Zjednoćena ewangelsko-lutherska cyrkej Němskeje (VELKD) a Unija ewangelskich cyrkwjow (UEK) doporučeja přichodnemu parlamentej, posedźenske časy skrótšić. Synoda woznamjenja zhromadźiznu, na kotrejž so 120 synodalow kóžde lěto na rozdźělnych městnach zetkawa. Lětsa činja to digitalnje. Woni wuradźuja wo prašenjach cyrkwje a towaršnosće. Synoda słuša k nawjedowanskim organam EKD.
Božu stwórbu bóle škitać
Zeleni z nowym programom
Berlin (dpa/SN). K zakónčenju swojeho tři dny trajaceho digitalneho stronskeho zjězda su Zeleni nowy zakładny program wobzamknyli. Tón předwidźi raznišu politiku za škit klimy kaž tež socialno-ekologiski přetwar towaršnosće a wičneho hospodarstwa. Hladajo na wólbne lěto 2021 chce strona šěrše woršty wolerjow narěčeć. Wodźacy politikarjo potwjerdźichu wolu, kanclerstwo přewzać. SPD Zelenym wumjetuje, zo chcyli so stronje CDU za móžnu koaliciju přilišćić.
Nowy wonkowny minister
Washington (dpa/SN). Antony Blinken ma so po informacijach medijow z nowym wonkownym ministrom USA stać. Woleny prezident Joe Biden chcył 58lětneho po informacijach medijow jutře do zastojnstwa powołać. Blinken Bidena hižo dołho we wonkopolitiskich prašenjach poradźuje. Wón bě wěstotny poradźowar Bidena, jako bě tón w lětach 2009 do 2013 wiceprezident prezidenta Baracka Obamy. Biden tuchwilu swoje knježerstwowe mustwo zestaja.
Sarkozy před sudnistwom
Tysacy opozicionelnych su wčera w Běłoruskej, kaž tule w stolicy ...
Naprawy drje wostanu – lětsa žane praskotaki
Berlin (dpa/SN). Do srjedowneho wuradźowanja ze zwjazkowej kanclerku Angelu Merkel (CDU) chcychu so ministerscy prezidenća zwjazkowych krajow dźensa wo dalšim postupowanju přećiwo koronapandemiji wothłosować a swójski namjet zdźěłać. Hižo kónc tydźenja běchu we wjacorych kołach wo tym rěčeli. W tym zwisku Berlinski knježacy měšćanosta Michael Müller (SPD), tuchwilny předsyda konferency ministerskich prezidentow, ludźi na to hotowaše, zo dyrbja so na podlěšenje tuchwilnych wobmjezowanjow zjawneho žiwjenja nastajić. Dotalne naprawy su drje raznemu rozšěrjenju wirusa zadźěwali, ličby su pak „přeco hišće přewulke. Tak njeje aktualnje předstajomne, zo wobzamknjene naprawy zaso zběhnjemy“, Müller wuzběhny.
We wobłuku najprjedy raz hač do kónca nowembra płaćiwych naprawow maja hosćency runje tak dale zawrjene wostać kaž dźiwadła, muzeje, koncertne žurle a kupjele. W Berlinje płaća dale krute kontaktne wobmjezowanja.
Spahn: Hišće lětsa šćěpić započeć
Berlin (dpa/SN). Němski zwjazkowy minister za strowotnistwo Jens Spahn (CDU) kruće z tym liči, zo móža hišće lětsa prěnich ludźi přećiwo koronawirusej šćěpić dać. „Mamy přičinu k optimizmej, zo šćěpiwo w Europje hišće lětsa dowola. Potom móžemy hnydom šćěpić započeć“, rjekny Spahn nowinarjam w Berlinje. Wón je zwjazkowe kraje prosył, šćěpjenske centry hač dosrjedź decembra zarjadować, štož drje so tež poradźi.
Tež financny minister Olaf Scholz (SPD) zbudźa nadźije na prěnje šćěpjenja w tutym lěće. „Hotujemy so na to, zo hišće w decembru šćěpić započnjemy. To drje spěšnišo póńdźe, hač smy sej před něšto časom hišće myslili.“
Spahn je zdobom optimistiski, zo njetraje hač do kónca 2021, doniž njejsu wšitke woršty wobydlerjow šćěpjene. Tójšto nowych lěkow njetrjeba chłódźenych być, čehoždla móžeš so tež w cyle normalnych lěkarskich praksach šćěpić dać. „Póńdźe to cyle spěšnje. Njezabudźmy, zo kóžde lěto w běhu někotrych tydźenjow hač do 20 milionow ludźi přećiwo gripje šćěpimy.“ Potom móžemy wobmjezowanja krok po kroku zaso zběhnyć.“
