To a tamne (13.11.20)
Nakupowanskej wozyčkaj połnej čriji su swědcy na dwórnišću badensko-württembergskeho Klettgauwa našli. Jedna so wo cyłkownje 129 nowych čriji, a to nic w porach, ale jednotliwych. Na někotrych wisachu hišće płaćiznowe taflički. Policija z toho wuchadźa, zo jedna so wo rubiznu. Što pak pakostnicy ze 129 jednotliwymi črijemi chcychu, je wulke prašenje.
Dweju paduchow w kamorje cyrkwje našli su policisća w sewjerorynsko-westfalskim Krefeldźe. Swědk bě podhladny šćerkot słyšał a widźał, kak mužej žonje před Božim domom złoćany předmjet přepodaštaj. Přiwołani policisća móžachu 37lětneju paduchow hišće w cyrkwi zajeć, byrnjež so w kamorje schowałoj. Wobaj staj hižo podobnych njeskutkow dla wospjet zasudźenaj byłoj. Před cyrkwju čakaše 34lětna žona w awće. Jedne z woknow Božeho domu bě rozbite.
Minu Witkojc wopominali
Twarja nowe baterije za awta
Grünheide (dpa/SN). Wjetše a sylniše baterije po nowej technologiji chce ameriski twarc elektriskich awtow Tesla w swojej prěnjej europskej fabrice w Grünheidźe pola Berlina twarić. To je powěsćernja dpa z derje informowanych kruhow zhoniła. Eficientniše a zdobom tuńše baterije su wuměnjenje za to, zo so elektromobilita na masowych wikach poněčim woprawdźe přesadźi. Tesla hižo dlěje na polu nowych baterijow slědźi.
Namócnosće a zranjeni
Waršawa (dpa/SN). Po namócnosćach pólskich nacionalistow a prawicarjow na zakazanym tak mjenowanym pochodźe njewotwisnosće we Waršawje je policija 36 demonstrantow zajała. Při rozestajenjach bě so 35 policistow zraniło. Někotrych z nich dyrbjachu w chorowni lěkować. Policija rěči wo „hotowej bitwje“. Wčera běchu tysacy hooliganow po měsće ćahnyli, byrnjež Waršawski wyši měšćanosta Rafał Trzaskowski pochod zakazał.
Spahn: Lětsa žane swjedźenje
Sobudźěłaćerjo Techniskeho pomocneho skutka (THW) su wčera ...
Müller: Dalši serum trěbny
Berlin (dpa/SN). Zwjazkowy minister za wuwićowu pomoc Gerd Müller je swoje žadanje potwjerdźił, tež chude kraje ze šćěpiwom přećiwo koronawirusej zastarać. Při tym chce docpěć, zo serum fairnje po krajach rozdźěla, kaž politikar CSU powěsćerni dpa rjekny. „Njesměmy na ludźi w lěhwach ćěkancow zabyć. Nam dyrbjało wědome być: Koronawirus přewinjemy jenož po cyłym swěće abo scyła nic.“
Němska podpěruje rozdźělenje šćěpiwa na swěće přez platformu Covax, kotraž wuwiće a sprawne rozdźělenje zapłaćomneho seruma spěchuje. Němska wuwićowa politika je platformje 100 milionow eurow za nakup seruma w 92 wuwićowych krajach přewostajiła.
„Byrnjež nowy serum z Mainza wulke nadźije budźił, stej jeho transport a składowanje jara naročnej, wosebje hladajo na chłódźenje bjez přetorhnjenja. Jedyn serum njebudźe dosahać. Trjebamy dalše šćěpiwa, z kotrymiž móžemy jednorišo wobchadźeć, zo móhli je do wotležanych kónčin dowjezć“, Müller wuzběhny.
Biden sej swoje mustwo zestaja
Washington (dpa/SN). Najebać trajace spjećowanje mějićela zastojnstwa Donalda Trumpa sej wuzwoleny prezident USA Joe Biden swoje knježerstwowe mustwo zestaja. Tak je swojeho wjelelětneho sobudźěłaćerja a dowěrnika Ronalda Klaina za šefa staba w Běłym domje a tak za jednoho z najwažnišich politiskich poradźowarjow powołał, kaž přechodne mustwo Bidena wčera wječor zdźěli. Wón sam rozmołwješe so do toho ze statnymi a knježerstwowymi šefami Japanskeje, Awstralskeje a Južneje Koreje, kotřiž su jemu k dobyću gratulowali.
Demokrata Joewa Bidena běchu minjenu sobotu na zakładźe prognozow medijow za dobyćerja prezidentskich wólbow deklarowali. Trump so dotal spjećuje swoju poražku přiznać. Wón ma so za wopor systematiskeho wólbneho wobšudnistwa, bjez toho zo by za to dopokazy předpołožić móhł. Mjeztym wón we wjacorych statach USA přećiwo wólbnemu wuslědkej skorži, byrnjež jeho republikanojo na runinje senata a Domu reprezentantow wažne wuspěchi docpěli. Na žadanje Trumpa chcedźa w staće Georgia wšitke hłosy hišće raz wuličić.
Na wuchodźe dale snadne mzdy
Hoberske rozdźěle mjez zwjazkowymi krajemi dochody nastupajo
Düsseldorf (dpa/SN). Snadne mzdy su předewšěm na wuchodźe Němskeje widźomnje rozšěrjeniše hač na zapadźe zwjazkoweje republiki. Nimale kóždy třeći přistajeny we wuchodnej Němskej dźěła za jara mało pjenjez, na zapadźe dóstawa porno tomu jenož kóždy pjaty dźěławy minimalnu mzdu. To zdźěli institut za dźěło a kwalifikaciju Duisburgsko-Essenskeje uniwersity w swojej wčera předpołoženej rozprawje.
Minimalna mzda je hodźinska mzda, kotraž leži dwě třećinje pod přerěznej. Hranica wučinješe lěta 2018 w Němskej 11,21 eurow brutto na hodźinu, kaž wědomostnicy rozprawjeja. Tuchwilu je wona samo jenož 9,35 eurow na hodźinu.
Ličby dale wulke
Myto zmužitym wowkam
Berlin (dpa/SN). Iniciatiwu „Wowki přećiwo prawicarjam“ chce Centralna rada Židow w Němskej z Paula Spiegelowym mytom za ciwilnu kuražu počesćić. Tak chcedźa angažement staršich ludźi za demokratiju a čłowjeske prawa wuzběhnyć, kaž centralna rada wčera w Berlinje zdźěli. Koronapandemije dla pak ma so swjatočne spožčenje myta hakle w zažnym lěću 2021 wotměć.
„Wowki přećiwo prawicarjam“ zasadźeja so stajnje zaso z kreatiwnymi formami protesta za to, demokratiju zachować, a njedadźa so wo njepřećelskosćow zatrašić, rjekny prezident centralneje rady Josef Schuster k wopodstatnjenju. Iniciatiwu běchu lěta 2018 po přikładźe awstriskeje iniciatiwy ze samsnym mjenom załožili. Wona wobsteji dotal z něhdźe sto regionalnych skupin a wobdźěla so na demonstracijach přećiwo antisemitizmej a rasizmej kaž tohorunja za tolerancu a čłowjesku dostojnosć.
Z 5 000 eurami dotěrowane myto je po bywšim prezidenće centralneje rady Paulu Spiegelu (1937–2006) pomjenowane. Wot lěta 2009 spožčeja je ludźom, kotřiž so za towaršnosć zasadźeja.
To a tamne (12.11.20)
„Tule rěči wótc Francesco!“, takle je so bamž Franciskus telefonisce pola jednoho z Kölnskich fararjow přizjewił. Duchowny Regamy Thillianathan sej spočatnje mysleše, zo jeho mać zwoni, jako na konferency mobilny telefon klinkaše. Přizjewił pak bě so bamž cyrkwje. „Swjaty wótc měješe zbožo, zo sym scyła wotzběhnył.“ Franciskus poćahowaše so na list, kotryž bě jemu duchowny tydźenja na awdiency přepodał.
Smjertnje skónčiła je so za kruwu w Delnjej Frankskej ćěkańca před rěznikom. Wona bě před rězarnju z připowěšaka twochnyła, běhaše po zahrodach, přeprěči rěku a běžeše přez železniske kolije. Před šulu móžachu ju skónčnje popadnyć. Dokelž steješe masiwnje pod stresom a dokelž hrožeše strach za wobydlerjow, so policisća po dorěčenju z rězarnju rozsudźichu kruwu zatřělić.
